أخبار_عالريق 423 يوم ✅يكتبها/سعيد الطويل

#أخبار_عالريق 423 يوم
✅يكتبها/سعيد الطويل
■زي اليوم قبل سنة بالضبط اكتشفوا أول حالة كوو.رنا بفلسطين وسكروا بيت لحم وبعدها كرت السبحة.
■بآخر احصائية تجاوز عدد الإصابات كلها بفلسطين 216 ألف إصابة، وماتوا تقريبا 2320 حالة من الكو.ورنا لهلحين.
■بغزة بطلوا يفحصوا كور..ورنا إلا رفعان عتب ،وبالضفة محدشش داقق والحالات قاعدة بتزيد.
■الكمامة صرنا لما نشوف حد لابسها ننكش عليه راس.
■الصحة العالمية بتحذرنا من موجة ثالثة ورابعة للكو..ورنا، عأساس خلصت الثانية يعني.
■بيقلك الجو من اليوم حيكون مزبط ودافي شوية.
■وحدة حاولت تخنق جوزها بحبل غسيل مبارح وربك ستره .
■اليهود طخوا مبارح ع حسكة صيد بشمال غزة وصاوبوا اتنين صياديين غلابا كانوا بيسترزقوا.
■أم الفحم مبارح طلعت بمشهد فلسطيني بصراحة بيرفع الراس رد ع جرايم شرطة الاحتلا.ل.
■ناصر القدوة بيقول انه دحلان مش مقبول عند الناس عشانه مدعوم من الامارات إللي طبعت مع اليهود.
■شباب تفريغات 2005 حطوا الخيم بالسرايا بنص الليل عشان يعتصموا ويطالبوا بحقوهم.
■اليوم حيسكروا كل مراكز الوكالة من السبعة الصبح للساعة احدعش احتجاج على قطع الكابونة الصفرا.
■أسامة القواسمي بيقول انه في لجنة أمنية حتيجي ع غزة عشان تقابل المقطوعة رواتبهم وتشوف أمورهم.
■تبعون المخللات بلشوا يجهزوا أمورهم لموسم رمضان الجاي.
■واحد مبارح شفته كاتب تسقط شركة جوال ،لقيت كل التعليقات بتضحك بتفكرها نكتة.
■انتخابات 7...ما..س الداخلية عندها خلصت ضايل مرحلتها الأخيرة.
■أكثر شغلتين شفتهم عالفيس اليومين اللي فاتوا ،الشب اللي ضعف 90 كيلو والزلمة الطيب اللي أعطى لموظفينه ذهب وأيفونات .
■القيادات مش فاضية للناس كل واحد بيدور ع مصلحته وين واللي بيطلعش نائب بيحجزله وزارة.
■موظفين السلطة نعنشوا لما أخذوا حقوقهم والحركة بالبلد تنشطت بشكل مش طبيعي.

#

	السلام عليكم ورحمة الله وبركاته يسلمووووا ع النشرة الاخبارية المنوعة يعطيك الف عافية بانتظار جديدك دائما تحيتي

مشكور للمتابعة و النقل امير
يسعدك ربي

تسلم لنقل والمتابعه امير

الله يخليلنا سيادة الريس يارب
يطول بعمره ويشله إنشآلله
شكرا ع النقل أمير
يعطيك العافية