أخبار_عالريق

#أخبار_عالريق 211
✅يكتبها/سعيد الطويل
■مبارح عالساعة تسعة بالليل طلع صاروخ من عنا عالغلاف وزمرت صفارات الانذار .
■بعد أقل من ساعة تحججوا اليهود وقصفوا موقع بالشمال من الدبابات وموقع بالدير عالخفيف وبعدها خبطوا موقع اسمه التل بخانيونس بخمس صواريخ هزت الدنيا هز ؛والحمد لله فش اصابات.
■820 واحد مصاب بالكورونا بالخليل لحالها ،الله يشفيهم .
■وفي تسع حالات خطيرة بالخليل وبيت لحم كمان.
■بالنسبة لموضوع انه بفتح معبر رفح بالاتجاهين من بعد بكرة ،مش صحيح وفش حد أكده .
■قصة سيارة الun اللي دبت الدنيا بالفيديو المنتشر ،مش عنا ،هذه سيارة جوا بلادنا المحتلة يعني عند اليهود.
■الاتحاد الأوروبي بده يدعمنا بميييت مليون دولار ..100 مليون يا معلم.
■اليوم حيبلشوا صرف بمصاري العمادي من البريد.
■البطختين بينباعوا بشيكل،بس بعرفش كيف طعمهم ولا لونهم
■كيلو الجاج مبارح صار بتمنية شيكل ،يعني بعوه بأقل من راس ماله وبرضه مكانش حركة بالسوق.
■الشرطة حيعملوا حملة قوية عقصة سرعة السيارات الجنونية والناس اللي معهمش رخص سواقة.
■طلعوا قرار سكروا فيه بيت لحم لمدة يومين عشان يضبطوا الوضع لأنه في حالات جديدة.
■ في غزة شب دفع مهر لعروس بنت أصول 1300شيكل ،وواحد ثاني تأجر بس فستان فرح ب4700شيكل لبنت الأصول برضه ، قلها صاحب المحل هذا أول لبسة لسة.
■دراسة :حالة الفلس والزهق مسيطرة على تلت ترباع البلد .."المصدر أم العبد بتخرف جراتها قدام الدار"
■الجو اليوم حيكون شوب بزيادة ؛ والله أعلم.

#صباح_الخير للناس اللي راح ع شغلها اليوم وفش عندها اجازة يوم السبت.
#صباح_الخير للناس اللي نفسها يصير عندها شغل وتداوم حتى لو يوم الجمعة ،يارب يرزقهم .
#صباح_الخير للشباب اللي بيشتغلوا بالكافتيريات عالبحر وبيناموا طول الأسبوع بالمكان عشان يوفروا المواصلات.
#صباح_الخير للزهقانين عالآخر واللي ضاويين ومضلش معهم ولا شيكل واللي عليهم ديون متلتلة ..الله يفرجها.
#صباح_الخير للناس اللي بتفرح وبتبسط حالها واللي حوليها بأبسط الحاجات .

#صباح_الرضا والله يرزقنا ويرزقكم 🌹