القمر الضاوي (شعر شعبي جزائري)

القمر الضاوي :
ـــــــــــــــــــــــــــــــ
شعر شعبي جزائري
ـــــــــــــــــــــــــــــــــ
. . . . . 01 . . . . .
اَلْحَمْدُ لِلَهْ كَانَتْ امْعِيشْتِي هَانْيَه
عَايِشْ فِي نِعْمَه وُالدُّنْيَا مَابْهَاهَا
دُنْيِتِي جَنَّه وَاحْيَاتِي ضَاوْيَه
أُبَّيْ هُوَ القَمَرْ الْلِي ضَوَّاهَا
. . . . . 02 . . . . .
أَنَا وُابَّيْ لَمَّتْنَا فِ الدُّنْيَا غَالْيَه
فَرْحُ اوُسَعَادَه السُّرُورْ امْلَاهَا
كَلْمَة أُبَّيْ فِ الْحَيَاة حَالْيَه
نِسْمِعْهَا فِ وُذْنِي لْسَانِي حَلَّاهَا
. . . . . 03 . . . . .
وُالْيَوْمِ اتِّخْطَفْ وُالدُّنْيَا خَالْيَه
هَادِمْ اَلْلَذَّاتْ خَطْفُو وُخْلَاهَا
وَلَّاتْ امْعِيشْتِي وُاحْيَاتِي طَافْيَه
اَلْقْمَرْ الْلِي ضَاوِي رَاحْ اوُخَلَّاهَا
. . . . . 04 . . . . .
غَسَّلْنَاهْ اسْتَرْنَاهْ ابْكِتَّانَه وَافْيَه
هَزَّيْنَا زَيْنِ الرْجَالْ ابْخَشْبَه وُاعْلَاهَا
وُالْحَاضْرِينْ اِدْعَاوْلُو بِالْمَغْفِرَاتْ الرَّاضْيَه
وُالصَّلَاة اعْلِيهْ فِ الحِينْ صَلَّيْنَاهَا
. . . . . 05 . . . . .
اَسْكِنْ دَارْ الحَقْ حُفْرَه ثَارْيَه
اَلفِرَاشْ اتْرَابْ وُالحَجْرَاتْ اغْطَاهَا
ثَبْتُو يَا رَبِّي بِالبَسْمَه لِلتَّالْيَه
اِيْجَاوُبْ عَ السُّؤَالْ وُالكَلْمَاتْ اَمْعَاهَا
ــــــــــــــــ
محمد جعيجع من الجزائر ـ 25 أكتوبر 2024م

كل الشكر و التقدير

يسسلموو دييااتكك
+ وردهه