أخبار_عالريق 268

#أخبار_عالريق 268
✅يكتبها/سعيد الطويل
■أول حاجة الحظر تمدد تلت تيام جداد ،يعني حاولوا تأقلموا حالكم وتتعايشوا مع الوضع بالبيوت.
■الصراحة داخلة كورونا تقيلة علينا وأعلنت الصحة مبارح بس عن وفاة اتنين رجال كبار بالعمر واحد من الشمال والتاني من غزة. .الله يرحمهم.
■مبارح برضه اكتشفوا فوق العشر حالات كل حالة من منطقة مختلفة عن الثانية.
■هذا يخوي حسب ما قال وكيل الوزارة بالمؤتمر بالليل، الكورونا طعلت عايشة معانا وعايشين معها من أول شهر 8.
■يعني المفروض الست اللي من دار النادي نشكرها ونشكر مستشفى المطلع انهم بلغونا انه معها كورونا لانها مش هيا أول الشرارة.
■لو ضل الوضع زي هيك متوقع تزيد عدد الحالات بغزة وهذه الشغلة متوقعاها الوزارة من أول ،عشان هيك ضلك بالدار وتطلعش.
■فوق ال3500 اتصال استقبلتهم الوزارة والوكالة من اول يوم الكوورنا لهلحين ،بس بيقولوا في ناس بتنكش راس عليهم ،وعيب هالكلام مش وقته.
■جدول الكهرب للأسف مش حيكون الا أربع ساعات وصل وستطعشر ساعة فصل مش اطنعش.
■العمادي صارله تلت تيام بغزة بفندق المشتل ولسة مروحش ولا اتفقوا على حاجة .
■7.ماس بلغت العمادي بطلبات جديدة اهمها انهم يدخلوا أجهزة تنفس وكتات فحص للكورونا.
■احتمال يصرفوا رواتب غزة تبعت 7..ماس من هان للسبت الجاي و بنص الأسبوع الجاي رواتب السلطة بس لسة محدش أكد الموضوع.
■ابو نعيم صرح انه ممكن يضطروا انهم يسكروا مربعات وبيوت كاملة اذا زادت القصة .
■فصلوا رفح عن كل القطاع بشكل كامل وحطوا متاريس وجبال رمل بالطرق الفرعية كمان.
■شب جدع من نابلس طعن حاخام كبير في "بتاح تكفا" وقتله عالمطرح.
■اليهود شنوا بالليل حملة اعتقالات مش طبيعية بالضفة
■حادث فزبة برفح ،وولد صغير وقع من فوق الدار وربنا ستره ،وزلمة وقع من فوق بلكونة بالوسطى والحمد لله فش وفيات.
■ابو نعيم قال انه حنوفر مساعدات للناس اللي حينحجروا بالبيوت لو لزم الأمر.
■بعز المؤتمر محمد كان متقاتل مع حمدية وكانت بتابع بالمؤتمر عالمباشر راح بعتلها مسج عالعام عشان ترد،وكل خلق الله شافوها.
■مبارح في طلعت بلاليين من عنا ،بس مصارش قصف لأول مرة من أسبوعين .
■اليوم الجو حيكون حريقة أكثر من كل الفترة اللي فاتت وحتيجي موجة حر حتضل لآخر الأسبوع الجاي .
■خلوا مستشفى الأوروبي بس لحالات الكورونا وفضوها بالكامل من كل المرضى.
■البلديات عملت نقاط بيع للخضرة والفاكهة بكل مناطق القطاع ونشروا أرقامهم عالعام عشان لو بدك تتصل وتطلب ديلفري.
■عند أهلنا بالضفة مبارح تلات حالات وفاة وفوق ال600اصابة جديدة.
■بالعاصمة كمان اعلنوا عن 100اصابة جديدة.
■ست من الضفة الله لا يكسبها قتلت ابنها الرضيع اللي عمره خمس شهور بطعنة بقلبه.
■اعلنوا عن اصابة 12أ.سير بفيروس كورونا جوا سجن عوفر وسكروا قسم رقم 21.
■الجوامع طبعا والمدارس والجامعات برضه حتضل مسكرة حتى اشعار آخر.
■في شوية بياعين وتجار بيغلوا السعر عالناس وبيحتكروا البضاعة ،اذا بتلاقوا حد زي هيك بلغوا عنه ع طول .
■رفح وخانيونس لسة مفش فيهم ولا حالة كورونا والحمد لله .
■الوكالة وميلادينوف بيطالبوا انه يتدخل العالم ويقدموا مساعدات وينقذوا غزة.
■قبل شوية لسة اعلنوا عن اصابة واحد من الطواقم الطبية بالكورونا.

#صباح_الخير للملائكة البيضا اللي شايلين ارواحهم ع كفوف الراحة ،وبيناموش الليل حبابينا الممرضين اللي بيضحوا بحالهم عشان حياتنا ،وللدكاترة اللي بيكونوا لابسين أزرق وعرقهم بيصب صب من تحت بدلة العزل ومش قادرين يمسحوه ،واحيانا بيناموش يومين عشان يقوموا بدورهم في هذا الوضع الخطير.

#صباح_الخير للشرطة الزرقا والمرور والدوريات والشباب اللي بتضل واقفة عالمفترقات يوم كامل من الصبح لآخر الليل عشان سلامتكم ومحدش يضل طالع نازل خاصة من الولاد الصغار بالحارات.

#