اخر اخبار اليوم

#أخبار_عالريق 165
✅يكتبها/سعيد الطويل
■شب اسمه أدهم المصري كان مرابط شمال غزة ،طلعت طلقة من البارودة بالغلط ،واستشه.د بمكانه.
■شايف انه بطل في هيبة للكورونا بالبلد .
■تحرروا مجموعة جديدة من المحجورين بفندق المتحف بعد ما خلصوا كل أمورهم وفحوصاتهم.
■مبارح شب حاول ينتحر لما طلع ع طنطوشة عمارة عالية بغزة والشباب اقنعوه ينزل وربك ستر.
■في مجموعة مسلحين هجموا بالليل ع استديو تصوير بنص غزة وضربوا صاحبه وسرقوا أجهزة وشغلات تانية من محله والشرطة بتحقق.
■الدفاع المدني لحق حريق كبير ببيت حانون وطفاه، والحمد فش اصابات عندهم.
■اليوم حتتحرك البلد شوية عشان الرواتب وتبلش النسوان تلفلف عشان تدور ع أواعي العيد لأولادها .
■الشمام بغزة صار زي الفراولة يزرعوه تعليق مش أرضي.
■طوشة مبارح ع صلاحيات وشغلات تانية بين موظفي غزة ورام الله بوزارة التنمية اللي بغزة ،ويارب الأمور تخلص ع خير .
■ايطاليا حترفع الحظر عن الناس من اليوم الصبح.
■طلاب الأزهر تعون الماجستير عاملين اعتصام قدام بوابة الأزهر، عشان بدهم أبحاث بدل الامتحانات.
■احتمال كبير انهم يمددوا حالة الطوارئ بالبلد كمان شهر حسب ما رفع التوصيات اشتيه.
■والله يخوي في معلومات انه المعبر مش حيفتح غير بعد العيد ،حتى لو خلصت فترة الحجر اللي هلحين موجودة.
■فش حد ملتزم بلبس الكمامات قد شباب الشرطة الجداد اللي بالبلد وتعون المؤسسات لما يتصوروا.
■الخوخ الملس نزل عالبسطات وعبى السوق ونازل بخمسة الكيلو ،صح حادق بس طعمه زاكي .
■525اصابة بفلسطين بعد ما اكتشفوا حالات 3 جديدة .
#صباح_الخير للناس اللي بتصوم مش بس عن الأكل وبتصوم كمان عن أذية الناس وكسرة الخاطر والتجريح والحسد والغيرة.
-صباح الخير للناس اللي نواياها صافية وقلوبها بيضة وبتحبش تعيش بوجهين.
-صباح الخير لأولاد الأصول اللي بينسوش المعروف وبيصونوا العيش والملح.
-صباح الخير للناس اللي صاينة لسانها عن البرم ع غيرها.
-صباح الخير لكل واحد بعيد وبحبنا والله يبعد عنا كل واحد عامل حاله قريب وبتربصنا وبتربصكم .
#صباح_الخير والزرق وراحة البال 🌹
وحياكم الله

الله يكون بالعون و يفرجها
شكراً للمتابعة

يسلمو لنقل والمتابعه

يعطيك العافية لادراجك ..

شكرا الأمير للنقل والمتابعة
وردي