أخبار_عالريق 151

#أخبار_عالريق 151
✅يكتبها/سعيد الطويل
■راجل ومرته من غزة مبارح اكتشفوا معهم كورونا ،كانوا جايين من مصر الأسبوع اللي فات وأمورهم كويسة الحمد وكانوا قاعدين بفندق البلوبيتش المنحوس.
■ست كبيرة بالعمر عمرها "90 سنة" اسمها زينب رشوان من خانيونس الليلة اللي فاتت وقعت من فوق عمارة عالية والله أعطاكوا عمرها .
■بنص الليل شب جدع من دار عاشور من تعون 2005 صار معه أزمة قلبية وتوفى عالمطرح.الله يرحم روحه.
■تقريبا فش قرار لفتح الجوامع هذه السنة برمضان لا بغزة ولا بالضفة ،لعله خير.
■بأوروبا أفتوا انه يوم الجمعة الجاية أول يوم برمضان.
■الكلبة لولو اللي كانت موجودة بالحجر ماتت .
■الشباب المغتربين بالإمارات والطلاب اليي ضلوا بمصر بيناشدوا الجميع عشان بدهم يروحوا ع غزة زهقوا حالهم.
■مبارح وصل جثمان طالب العلم فراس العويني من مصر ودفنوه عند أهله برفح.
■المكافحة قضت عالكيفك اللي بغزة لشهرين جاياتم ومسكت 240 فرش حشيش وفوق ال200حبة روتانا ع اترمال ع شغلات تانية.
■في مفتي بمصر بيقول انه اللي بيخاف من الكورونا يفطر ،طيب واللي بيخاف من مرته شو فتوته يا شيخ ؟
■طلعوا قرار يأجلوا فيه دفع أقساط مدينة حمد بخانيونس لسنة جاية .
■الفليفلة واللمون أغلى من نص الفاكهة والحمضيات اللي بالسوق.
■أكثر حدث صار بفترة الحجر وهذه الأزمة الجيزة اللي عالسكت وبيع الدهبات الي مع مرتك وتوعدها "بكرة بجيبلك أحسن منه "
■أبلات الروضات وضعهم ماكل زحل ؛وبيناشدوا المسؤولين يشوفولهم حل.
■حتى الآن أمريكا مسيطرة ع أكبر عدد اللي بيموتوا من كورونا بالعالم.
■فوق ال80في المية من اللي صار معهم كورونا بالضفة هما من عمال "اسرائيل"واللي خالطوهم.
■تقريبا في قرار انه ما تفتح الشاليهات هذا الموسم بغزة(صيفوا بالبانيو)
■بالنسبة لخبر انه الخمس علب الفول بمية هذه اشاعة لسة الدنيا بخير والست علب بمية والأمور لوز.
■اللوز الأخضر هذه السنة ملوش طعم ومخشب .
■الزحمة والضغط ع بيع المكياجات مستمرة .
■الجو اليوم شوب وجاف ،بس اوعك تخفف من أواعيك وتفلوز.
■بيقلك بدلة وحدة لونها كحلي انزف فيها هذه السنة 25 عريس من الشابورة وكلهم رفعوا روسنا ،بس كانوا لون القرفطة.
■محمود ابن خالي جودت حتكون صبحيته أول يوم برمضان ،مبروك يا معلم.
■أم محمد جارة أهلى قايلة لأمي بدهم يصرفوا لكل دار قلن كلور كبير ودستة كمامات وجل من تبع الايدين كل واحد علبة ،بس بعرفش من وين جايبة هالخبر.

#صباح_الخير للدكتور والممرض والعسكري والشرطي وتبع الكهرب وسواق الأسعاف وعامل النظافة واليي معه المفاتيح وسواق سيارة الأكل وتبع العهدة واللي بياخذ حضور وغياب واللي بيوزع الفطور وصاحبه اللي بيوزع العشا والناس اللي سخرت حالها لتخدم غيرها بالحجر.

#صباح_الخير لبياع البسطة اللي قدام المدرسة ولصاحب كروسة العوقا اللي كانت عجالها مكسرة ولتبع الخروب اللي كان يبيع بسوق الأربع وللشب الغلبان اللي كان فاتح كشك صغير عباب الجامعة يسترزق منه ولأبو منار اللي عنده كوم لحم وكان يشتغل بمطعم ولمحمد الخريج اللي كان يشتغل بالكفي شوب من عشر سنين ولأبلة الروضة اللي كانت شايلة مصروف أهلها وعلاج أمها..صباح الخير لكل هذه النخبة الكادحة اللي قعدت عن الشغل والله يكون بعونهم بهذه الأزمة.

#صباح_الرضا 🌹
لو سمحت اذا وصلتك النشرة من الصفحة اضغط اعجاب عالمنشور(بيعنك الله)👍