خيبة أمل لابد منها

احياناً إنت بحاجة ماسة جداً لخيبات الأمل، بحاجة أكثر تظن بشخص ويخيب ظنك فيه، بحاجة أكثر إنو تبني توقعات وتتخيل سيناريوهات وتعيش وتشوف عكسهم تماماً، بين الفترة والثانية إنت بحاجة ماسة لإنو تنصدم بتصرفات أشخاص، وتتفاجئ بكلامهم ! وبحاجة تعيش مواقف تهدم كل معتقداتك وتثبتلك عكس الصورة الي إنت راسمها براسك !

بتعرف إنت بحاجة لشو ؟

إنت بحاجة للمواقف المفصلية بالحياة، الي بتبينلك قيمتك ومعزتك عند الناس، بحاجة تعرف الحيز إلى بتشغلو من حياة كل واحد، وبحاجة تعرف قديش حياة الاخرين رح تتأثر لو ما كنت إنت فيها !

نصيحة هاد المواقف بتساعدك تحط نقطة بعلاقاتك، بتساعدك تتخلى أسرع وبتساعدك تفتح عيونك وتصحصح وتشوف مين إنت وشو إنت وتحط حد صارم للسخاء العاطفي إلي عم تقدمو بدون مقابل !

بحياتك ما تسمح لأي شخص بالكوكب يحسسك إنك مش كافي ! يقلل من قدرك، بحياتك ما تسمح لأي شخص يتحكم بسعادتك وبحزنك وبمزاجك ! يقدرك لما هو بدو ويهينك لما هو بدون ! إنت أهم من إنك تكون أداة مستخدمه وأعظم من إنو تسمح لحدا يتلاعب بمشاعرك

إوعى تعود حدا يتحكم بحالتك المزاجية، يوصلك السما بكلمة وينزلك سابع أرض بنظرة !

قاوم قلبك - مع العلم كلنا بنعرف إنو القلوب أعضاء عنيدة بس لاتستهينو بالتكرار .