أخبار_عالريق 112

أخبار_عالريق 112
✅يكتبها/سعيد الطويل
■حيوصلنا اليوم منخفض جوي نادر و عميق جدا بيقلك اسمه "التنين"،ديروا بالكو ع حالكم ي حبايب .
■اليهود قتلوا مبارح ولد صغير عمره (15 سنة) بنابلس اسمه محمد عبد الكريم حمايل ،واستشهد بدم بارد ومشفناش الا كم بيان عالنت و الحسرة بتضل بقلب أمه.
■ اشعار أخير للبنات المتجوزات انهم يغادروا بيوت أهاليهم بكرة بعد غدا الجمعة عطول ،السبت في مدارس يختي.
■الليلة الي فاتت توفى بحادث سير بمصر طالب بيدرس هندسة اسمه عبد الرحمن سامي الغرباوي من غزة،الله يرحم روحه ويصبر أهله.
■الرئيس أبو مازن مبارح صرح انه حنهزم فيروس كورونا زي مهزمنا حاجات صعبة قبل هيك واحنا بنقدر على انه تجاوز هذه المحنة..ربنا يسهل.
■شب انقتل بنابلس مبارح بعد العشا والشرطة والنيابة بيحققوا لسة بالحادث.
■في صور لقاء كانت مبارح للنخالة مع وزير خارجية روسيا بيقلك حكو فيه عن صفقة القرن والوحدة الفلسطينية.
■منظمة الصحة العالمية قالت انه فيروس كورونا حنصنفه أنه وباء عالمي..الله يجيرنا.
■حتى الآن هذه احصائية الكورونا بكل العالم ..4291 حالة وفاة و118 ألف حالة إصابة هدول موجودات في 114 دولة .
■ أتليتكو مدريد مبارح هلك حامل اللقب ليفربول ودمره وطلع ع ظهره وتأهل لدور ال8 بعد ما فاز على الريدز بثلاث قوان محترمين مقابل اتنين .
■بالرياضة كمان ..باريس سان جيرمان الفرنسي حط قونين في بروسيا دورتموند الألماني ،وبرضه طلعوا من الدوري وعلم عليه.
■اليوم معبر رفح مسكر عشان الجو في مصر ومعبر الكرامة مسكر عشان الكورونا .
■حتى الآن فش موعد لصرف شيكات الشؤون وكل المواعيد الي بتسمعوها فشنك للأسف ومش رسمية.
■الجاج غلي شوية تقريبا سعره الكيلو صار ب9شيكل ويمكن بكرة يغلوه كمان شوية.
■سكروا كل مطاعم الأكل في لبنان وايطاليا كلها عليها منع تجول ومدينة وهان بالصين رجعت الحياة الها من أول وجديد.
■هذا يخوي في مطعم فتح جديد بغزة قرر ينافس مطاعم سويسرا والحمد لله نجح بسعره ،يعني بتقدر تقول فخدة الجاج بتطلع عليك ب15شيكل بدون الكولا الكلوب.
■لتر شامبو وكمان لتر شامبو جسم القزازتين ب2شيكل .
■علبة الططلي ب2شيكل ،وخمس علب صلصة مش من الزغيرة ..بعشرة شيكل،يعني برضه ب2شيكل.
■الفراولة الي للعصير معبية السوق بس خرخش مصاريك واشتري برضه الكيلو ب2شيكل.
■مبارح بلشوا بحملات عشان الأمن والسلامة وأي مطعم حاطط جرار الغاز تبعته برة أو مخزن كمية بيسكروه ع طول ،والناس مبسوطة عالحملة .
■الحمد لله فش ولا حالة كورونا بغزة ،والأمور تمام وربنا يبعد عنا وعنكم الشر.

#صباح_الخير لكل واحد صحي من النوم نيته خير ..ومش شايل بقلبه الا الحب لغيره .
-صباح الخير للناس الطيبة ،ولاد الأصول الي بيعرفوش الا الكلمة الحلوة والضحكة الي بترد الروح.
-صباح الخير لكل ست مبتحبش تنكد ع جوزها ،وكل زلمة مش منشف ريق مرته.
-صباح الخير لكل واحد نزل يبوس ايد امه قبل ما يطلع من الدار ويسمع كلمة الله يرضى عليك قبل ما يتسهل ع شغله.
-صباح الخير لكل أخت قايمة بشغل البيت وكاتبه جدول علاج امها وملزقاه ع الثلاجة عشان متنسهوش.
-صباح الخير لكل مريض سكري بيتغزز كل يوم ابرة وتنتين من الأنسولين ..الله يعينه.
-صباح الخير لمرضى الكلى الي موعدهم اليوم يغسلوا الكلى بالمستشفى ..الي من الله يا ما محلاه ..الحمد لله ..
#صباح_الخير_صباح_الرضا 🌹

يسعد صباحكم بكل خير
سلمت عالمتابعة

صباحك ورد مؤمن
الله يفرجها علينا من واسع كرمه

ماننحرم متابعتك
وردي

في مدارس السبت :o
انشالله يارب

يسلمو عالاخبار
ويرحم الشهيد

مشكور مراسلنا من غزة مؤمن ع كم هذه الأخبار التي لم أجد فيها ولوخبر واحد سار ههه يالله

اخبار بتنفعش عالريق ابداً لانه غالبتها بتسد النفس
يعطيك العافية لادراجك ..

وبعد الصباح
يسعد مسا كل اهل غزة والضفة
وربنا يجيب اللي فيه الخير
عوافى الك