ونحنُ أقربُ إليه من حبلِ الوَريد

- بحب الأشياء الروحانية ، بحب الإشارات الإلهية ، بحب لمّا تنين يقولوا لبعض نفس الكلمة ، بحب لما تفتح ع محادثة حدا لتحكي وتلاقيه عم يكتبلك ،
بحب التخاطر ، بحب اللحظة اللي بيخطر ع بالك حدا فيها وفجأة بتلاقيه قدامك ،
بحب أحس إنو متل ما حسيت فيك إنت حاسس فيي ، بحب فكرة المشاركة بالحب والفرحة ، بالحزن والدمعة .

- لحظات الحزن مؤقتة صدقيني بس الأشخاص اللي بيوقفوا معك فيها ، هدول هم اللي بيستاهلوا منك وسام الأبدية وبجدارة .

- احنا منتعافى بحُب الناس الطيبة لإلنا ، بالدعوات الحلوة اللي بتطلع عالسما مختومة باسامينا ، بأحضان أمهاتنا ، بضحكات إخواتنا ، بوجود أصدقائنا ، احنا منتعافى بالمضادّات الإلهية اللي بكون مصدرها السما

- الصديق أخ وعائلة وحبيب ، الأخ صديق وحَبيب وعائِلة .

- " ونحنُ أقربُ إليه من حبلِ الوَريد"
إنت مو لحالك، الله أقرب من وريدك إلك .

- الكلمة بتسند وبتهدّ ، الكلمة بتحيي وبتموّت ، الكلمة بتعمل كتير ، إختار كلامك بلطافة

- قلب صادق ، طبطبة صادقة ، دعوة من القلب ، بتكفي

- في ناس ذهب صافي ، في مواقف بتصنع أبطال مجهولين عن عيون العامّة ، بس موشومين بقلبك
في قلوب بتستاهل تحبها وتوقف معها وتدافع عنها وتحميها
في ناس منيحة بيستاهلوا قلب لإلهم يحبهم وينشغل فيهم لحالهم

- كل مشكلة وإلها حل ، إقعد شوي مع حالك ، إكتب اللي جواتك ع ورقة صغيرة وإحرقها ، في مشاعر بتستاهل تنحرق مو لأنها رخيصة ، بس لأنها كانت تجاه ناس ما عرفوا قيمتها ولا رح يعرفوها .

- قد ما تسكرت أبواب بوجهك ، لا تنسى وضلك متذكر ، وتيقّن من إنّو باب الله مفتوح إلك ع طول

ورح تضل هالدعوة ببال كل حدا منا :

اللهمّ قوّة ..

دُلنا عليك ، تاهت الخُطى إلا إليك . 💙