عيد سعيد ع اللي كل ملامحه كالحه حتي طعم فواكهه مالحه

#عيد_سعيد

ع القريب والبعيد
ع اللي شايل لينا فرحه
واللي شجرة حبه طارحه
ولسه بيقدم مزيد

عيد سعيد
ع اللي كل ملامحه كالحه
حتي طعم فواكهه مالحه
وشوكه باستمرار يزيد

عيد سعيد
ع العدو قبل الحبيب
ع اللي منا وع الغريب
ع اللي جوه قلوبنا ساكن
ع اللي عاشقاه الأماكن
نور بيسري في الوريد

عيد سعيد
ع اللي زي شموع تقيد
ع اللي مالناش فيه نصيب

عيد سعيد
ع اللي شاري وع اللي بايع
ع اللي جاي وع اللي ضايع
ع اللي صافح واللي قاطع
ع اللي حاطط إيد فى إيد
واللي شد إيديه بعيد

عيد سعيد
ع اللي سلم واللي علم
خط اسمه ف ميت نشيد
ع اللي عدي وفات مبلم
ع الجبين مكتوب بليد

عيد سعيد
علي أي حد
عيد سعيد
علي أي حاجه
ع اللي صدقناه بجد
واللي عاش بالكدب عاده

عيد سعيد
ع الناس بحالها
ع اللى حبيتنا بزياده
ع اللي ما خطرناش ف بالها

عيد سعيد
بشعار جديد
تهنئه من قلب صافي
جوه منه جراح قتلها

عيد سعيد
علي كل واحد
جوه منه ضغينه شالها
حوش الأحزان لنفسه
صدر الأفراح بدالها