نشرة الاخبار

■منخفض جديد وصلنا مبارح ،ع كلام الأرصاد حيكون ساقع عالآخر والمطرة فيه مش زي المرة إللي فاتت وحيخلص بكرة المسا والله أعلم .

■الصيد زي كل مرة ممنوع ببحر غزة ،عشان الموج عالي والمنخفض بيقلب قلب.

■توفى شبين من القدس كانوا يشتغلوا بأراضي ال48 ،بعد ما وقعوا من فوق عمارة عالية.

■3 شباب زي الورد ،خشوا جوا الحدود وحرقوا سيارة هندسة تبعت اليــ ـهود ورجعوا تعشوا فراشيح شاورما بغزة.

■تسعطشر حالة ماتوا وأكثر من6000 اصابة كوو رنا جديدة بالبلد،مبارح أعلنت عنهم الصحة.

■نص مليون بني آدم مات من بس من يوم ما أعلنوا عن الأميكرون.

■يوم الأحد الجاي حيرجع التعليم الوجاهي من أول وجديد بالضفة

■المجلس المركزي بيقلك قرر وقف التنسيق الأمني وتعليق الاعتراف "بإسرائيل" ،كل علمي انه واقف من زمان .

■المهم حكومة غزة خصصت مبلغ (25 ألف دولار) عشان ينفذوا استطلاعات رأي لرضا المواطنين عن البلدية
عليا الطرشاق لو أعطيتوا 50شيكل منهم ل #أبو_فؤاد غير حيكتبلكم انه رئيس البلدية أحسن من صلاح الدين الأيوبي

■الدولار ارتفع ووصل 3.22 ، هذا الكلام للناس المريشة مش النا طبعا.

■مع انه الخبر ملوش لزوم بس شرين بنت عبد الوهاب مرجعتش لجوزها وكل الأخبار كذب

■وزارة الصحة بتقول انه المرحلة المقبلة من الموجة الرابعة حساسة وخطيرة بغزة.

■بتصدقوا انه فش ولا مسؤول فاضي انه يصرح ع موضوع الشؤون ولا موعدها.

#صباح_الخير و #هلا_بالخميس
وحسابنا مقيد وماكل هوا ..
لو وصلكم هذا المنشور بس ادعموه ،عشان نضل ندوشكم عالصبح بأخبارنا لو حابين..

الخميس 10-2-2022 🌹