أخبار_عالريق 523 يوم

#أخبار_عالريق 523 يوم
✅يكتبها/سعيد الطويل
■بصراحة اليوم الوضع أروق من الأيام إللي فاتوا ،لكن برضه بعبشت ع شوية أخبار منيحة ، ما لقيت أحسن من انه نقول الحمد لله انه احنا لسة بخير ،خليها تمشي بتساهيل ربنا يا جماعة.
■ صرنا كل يوم نودع شـהــيد ،مبارح شيعت رام الله شب صغير بالعمر اسمه يوسف نواف محارب بعد ما انقتل برصاص الاحتلا ل .
■بالنسبة للجو حيضلوا زي هيك من هان للجمعة بعدين حتيجي موجة شوب بيقلك أصعب من إللي راحت.
■المهم عشان نذكركم ،حاولوا اليوم ماتسبحوا بالبحر ،عشان فيه دوامات كثير ووضعه مش تمام والبلديات نزلت كذا تحذير بالموضوع.
■مصر وافقت انها تزيد عدد المسافرين بالمعبر ل100 نفر زيادة كل يوم ،عشان يسلكوا الأمور .
■إللي اله مصاري وقدم عليهم لمستحقات الزواج يروح ياخذهم من البنك اليوم ويزبط أموره وينعنش .
■البحر لسة مش مغلق عالآخر بس في تضييق والصيد لسة عالستة ميل.
■رجعوا يضخوا بنزين وسولار من المعبر بس محملينا مليون جميلة .
■اليهود منشفين ريقنا لسة ع قصة المعابر والبضايع ،واذا بضل الوضع زي هيك ،بقلكم اياها ع قولة أبو ناجي ...#مش_مطولة
■مصر بتحاول انها تضغط أكثر ع "اسرائيل" عشان قصة الاعمار والمعابر والقصص الثانية.
■غانتس فاضي أشغال وكل بالون بيطلع من غزة قاعد بيصرح انه حيرد بقصف ع غزة بنفس اليوم.
■سكروا مبارح مطعم بغزة ، بعد ما اكتشفوا فيه أكثر من حالة تسمم من الأكل اللي بيقدمه للزباين.
■محكمة إسرائيلية بدها تخلي السلطة تدفع غرامة مليون شيكل عشان عملية خطف نفذتها الجبـהـة الشعبية بالزمانات
■الهيئة المستقلة لحقوق الإنسان بتطالب النيابة إللي بغزة انها تحقق في وفاة المواطن عماد الطويل بعد ما اعتدت عليه مجموعة من شرطة حكومة غزة بالضرب.
■توفى مبارح بسكتة قلبية شب جديد زي الأيام اللي فاتوا اسمه "عبدلله نبيل عمر زيدان" عمره 32 سنة ، من دير البلح .
■رئيس تونس مولعة معه ،وبيقلك أي طلقة حتطلع من أي حد ،حيرد عليه الجيش بكبشة رصاص.
■وحدة بمصر تقاتلت مع جوزها ،راحت قتلته وشوت كل أعضاءه ،بس مش عارف أكلتهم ولا لا بصراحة.

👈ومن الآخر خذلك نصيحة عالماشي
فش حاجة بتفش غلك وانت قرفان حالك ومفلس إلا علبة كولا كلوب متلجة عالآخر تصحى بعز الشوب تشربها وتبل ريقك ،غير هيك فش حاجة حتزبط معك ..

#صباح_الخير لأم سحر ،اللي بتستنى بنتايج التوجيهي ع أحر من الجمر عشان تفرح ببنتها الوحيدة هذه السنة .

#صباح_الخير للناس اللي بتستنى كل يوم الصبح خبر يبشرهم بشيكات الشؤون وللاسف بيطلع مسؤول بصدمهم انه لش فش ولا موعد رسمي ،معلش سلموا أمركم لله ،محدش حاسس فيكم .

#صباح_الخير لكل مسؤول انتفتح نفخ من السقعة، وبطنه من الصبح بيكركع من شدة برودة التكييف ،بس عشان تعرفوا انه مش لحالكم يا جماعة حتفطسوا من الشوب ،شوفوا كمان كيف المسؤولين التكييف منكد عليهم ..

#صباح_الخير_والسعادة رغم كله حاجة
الثلاثاء 27-7-2021 🌹