أخبار_عالريق ✅يكتبها/سعيد

#أخبار_عالريق
✅يكتبها/سعيد الطويل
■اليوم اللي راح مليان أخبار وأحداث وشغلات صارت بالبلد من مبارح لهلحين ونصيحة اللي بدوش يسم بدنه عالصبح ما يقراش هذه النشرة لانه بصراحة فش فيها ولا خبر يسر العين .😔
■صبحنا مبارح على فاجعة بالخليل بدير العسل مات فيها ست شباب من عيلة شوامرة بعد ما وقعوا بجورة امتصاصية ،والحزن خيم على القرية والخليل وبقلوبنا كلنا.
■مبارح الصبحيات طلعت أم الصياديين الثلاثة المفقودين تناشد كل الدنيا عشان مصير أولادها ،بعد الظهر أجاها الرد المش متوقع اتنين منهم شهد.اء والثالث ضلوا معتقل بمصر.
■مبارح وصل لغزة جثامين للأخوة الصيادين محمود وحسن الزعزوع واخوهم الثالث يا حسرة أمه مجاش معاهم ضل محبوس .
■كل الفصائل أدانت استخدام الأشقاء بمصر القوة بهذا الحادث الموجع ضد الصيادين.
■توفت الحجة مريم حمدان عمرها "90 سنة" بمستشفى غزة الأوروبي من الكورونا.
■بحادث سير صعب انتشر الفيديو تبعه توفى الحاج عبد الحي أبوعيطة وعمره 55 سنة بعد ما اندهس من شحن في بيت لاهيا.
■انقتل بالليل شب بطوشة ونقلوا كمان خمس اصابات للمستشفى ببلدة زعيم بالضفة .
■في كمان بنت اندهست بحادث من سيارة بنابلس.
■اليوم أول يوم بفتحة المعبر للي رايح والي جاي وللتنسيقات .
■الحجر حيكون للناس اللي جاية ع غزة بس أسبوع واحد وبعد هيك بيروح ع داره.
■اللي بيلاقوا معاه كوورنا بيودوه عالعزل بالمستشفى .
■سواق بيشتغل ع سيارة بمكتب تاكسيات بدير البلح لقيوا معاه كوورنا وربك يستر.
■مطعم التايلندي رجع يشتغل تاني بعد ما طلعت كل نتايج عماله سلبية.
■احتمال كبير يفعلوا احكام الإعدام الفترة الجاية بغزة للناس اللي عليهم قضايا قتل مع انه قالت 7.ماس انه أبو مازن رافض تصديق الأحكام.
■بيقلك الحكومة ألغت التقاعد المالي إداريا.
■بالمناسبة اليوم في وقفات عشان الغاء التقاعد المالي بكل مستشفيات القطاع .
■الإعلام العبري بيقول انه الجيش تبعهم بيستعد لتصعيد جديد في ‎#غزة الشهر الجاي.
■تلت ترباع الناس قرت خبر التصعيد بنكشة راس يا إما فرحوا يا إما عرفوا انه تهديد هامل زي اللي قبله.
■اليوم صار للأ.سير ماهر الأخرس تلاتة وستين يوم مضرب عن الطعام بسجون الاحتلا.ل ومحطش ولا لقمة بتمه
■كمان اليوم صار ست تيام للصحفي أحمد الاسطل مختفي بتركيا .
■مبارح برضه في كم طوشة هان وهناك صارت بغزة.
■اللي بده يشتري حبش أو جاج طازة من خانيونس المحلات فاتحة بالسوق بس تلت تيام بالأسبوع سبت اتنين اربع من السبعة للوحدة الظهر والمجمد الأيام التلاتة التانية بنفس الموعد.
■أصحاب المحلات والبسطات بسوق فراس بيطالبوا بحل إلهم عشان يرجعوا بطريقة سليمة لمصالحهم ويترزقوا حتى لو يفتحوا تلت تيام بالأسبوع.
■اليوم حتتساوى عدد ساعات الليل مع ساعات النهار بالضبط وحتغرب الشمس بنفس الساعة اللي طلعت فيها ..الليل حيكون اطنعشر ساعة والنهار زيه بالضبط.
■الورد بيدبل بالمزارع والمحلات ومحدش بيشتريه ..حبوا بعض ورخصوه شوية.. وخلي الدنيا تمشي.

#صباح_الخير لأم الصياديين الثلاثة اللي وجعت قلوبنا بحسرتها ومناشدتها ووجعها وقهرها وصبرها وكسرة خاطرها وفراقها وفراقهم الله يقويكي يا حجة ويربط على قلبك.

#صباح_الخير لأمهات وأولاد وزوجات وأحباب الشباب الستة اللي ماتوا بالضفة بالحادث الجلل المحمدين وفوزي ورسمي وأمجد وحماد .

#صباح_الخير للناس اللي حتوصل أحبابها اليوم لغزة ومش حتقدر لا تشوفها ولا تبوسها عشان على طول عالحجر ،ربنا يجيبهم بالسلامة.

#صباح_الخير للناس اللي حتتسهل اليوم من غزة والله يعلم متى حترجع ومتى حتشوف حيطانها وشوارعها وبحرها ثاني ..بكل الأحوال ربنا يسهلها معاكم ويريح بالكم ويرزقكم .

#صباح_الخير والحمد لله عالحال وكل حال 🌸
الأحد 27/9/2020

لا حول ولا قوة الا بالله العلي العظيم
الله يكون بعون الناس
ويصبرهم على ما ابتلاهم


عوافي الامير

اخبار بتسم البدن كلها
يعطيك العافيه

يعطيك العافيه...

يعطيك الف عافية

كل الشكر والتقدير

عوافي لنقل امير ماننحرم

	السلام عليكم ورحمة الله وبركاته يسلمووووا ع النشرة الاخبارية المنوعة يعطيك الف عافية بانتظار جديدك دائما تحيتي