اخبار اليوم

#أخبار_عالريق 169
✅يكتبها/سعيد الطويل
■صياد اتصاوبت براسه من اليهود مبارح وهو بيسترزق بعرض البحر وهيو بيتعالج بالشفا.
■ثلث أعداد اللي معهم كورونا بالكرة الأرضية موجودين بأمريكا لحالها .
■بيقلك مجموعة الاتصالات الفلسطينية تبرعت بتمنية مليون شيكل لصندوق وقفة عز بعد ما انحرجوا.
■الخضرة رخصانة وسعرها ع قد الإيد ،وبتنباع البندورة والخيار والبطاطا والبصل بشكيل بس الكيلو والنظيفة اكثر التمنية بمية.
■بعد الكلب الي قتله الشب وسلخه بغزة،انتشرت صورة بنت وهيا بتفعص ببسة برجليها.
■توجيهي ضايل بموعد وهذا تأكيد آخر مرة ويكون بس 10 أو 12طالب بالصف .
■حيجيبوا 1000مراقب زيادة وحيفتحوا فوق ال40مدرسة للوكالة غير الحكومة عشان توسع الطلاب.
■قصة تجميد حسابات الأسر.ى عملة بتخزي وقصة مش وطنية ولا أخلاقية عملتها ادارة البنوك ولازم تتراجع عنها .
■رئيس الوزرا اشتيه أمر وعد انها تنحل قصة البنوك وأمر بالتراجع عنه القرار ع طول.
■اليوم أول يوم دوام للقدس المفتوحة بعد تعطيلها شهرين عشان الكورونا.
■هذه احصائية الي ماتوا من الفلسطينية اللي عايشين برة البلد بالكورونا 72 حالة وفاةً و1339 إصابةً و544 حالة ربنا شفاهم.
■ابو نزار بيقلي انه محلات أواعي الولاد الصغار فضت بضاعتها تبعت الموسم من كثر ما اجو اشتروا النسوان للعيد.
■ترمب مش راسيله ع بر مبارح بيقلك في لقاح عنا بشهر ستة للكورونا واليوم غير كلامه بيقلك الفايروس حيخلص لحاله بدون اي ابر ولا لقاح.
■فش صفقة تبادل قريبة شكلها الأمور خربت وحتملدن زي متقول.
■العرب خسروا من يوم الأزمة يعني قبل شهرين تقريبا 323مليار دولار .
■فوق الأربعة مليون واحد حتى الان صابتهم العدوى ع مستوى العالم.
■شرطي من شباب الدوريات بيقلي تلت ترباع المشاكل والطوش بتنعلمش الا قبل الفطرة بشوية صغيرة.
■الأسبوع الجاي حتنزل الرنجا والفسيخ المملح عالسوق بس لسة الشرية بعد ٢٠ رمضان .

#صباح_الخير لبياعين وبياعات الجرجير والفجل والخس والبصل الأخضر والنعنع وورق الدوالي وتبعون التوت والجميز اللي بيبسطوا جنبهم.
-صباح الخير لسواقين باصات الجامعات والأعراس اللي بطلوا يسترزقوا لا الصبح ولا المغربية ..الله يفرجها عليهم
-صباح الخير لتعون تنجيد الكنب والخياطين اللي عليهم ضغط تفصيل وجوه الفرشات عشان موسم العيد.
-صباح الخير للعرسان اللي بيتسنوا يقبضوا جمعيتهم بعد العيد عشان يكلموا امور فرحهم عالسكت .
-صباح الخير لكل صبية كان عليها الجلي مبارح بعد عزومة يوم الجمعة.

تسلم لنقل والمتابعه

يعطيك العافيه

يعطيك العافية ع المتابعة '

شكرا لك ع المتابعة
لاخلا ولاعدم

تسلم لادراجك
يعطيك العافية ..

شكرا لك ع المتابعة

تحياتي

شكرا للمتابعة

يعطيك العافية

	السلام عليكم ورحمة الله وبركاته يسلموووا ع الخبرية والمتابعة يعطيك الف عافية بانتظار جديدك دائما تحيتي