#أخبار_عالريق 100

#أخبار_عالريق 100
✅يكتبها /سعيد الطويل
■صارلنا 100يوم ورا بعض بنكتب هالأخبار وبننشرها والله وكيلك بتحس أنه تلت ترباع هالأخبار بتنشف الريق .
■بيقلك في اليوم منخفض جوي حيوصللنا الظهيرات ،بس أنا متوقع انه الجو يضل زي الفل.
■مبارح أكثر من 100اصابة بنابلس والضفة بمواجهات وتطبيش حجار عاليهود.
■يا بخته الي عيد ميلاد مرته اليوم ،لا تعب ولا مناهدة وكل أربع سنين بيحتفل فيه مرة والسلام.
■في محل بالبلد عارض البتنجان والبصل مع الفواكهة من كثر مهما غاليات.
■تقريبا البازيلا أكلة والوداع ،بعدين كل الي حينزل السوق حتكون ناشفة و بتنفعش الا للتخزين والطبيخ.
■يا غراب البين عدد الي صار معهم كورونا "باسرائيل" سبعة تنفار وربك يسترنا.
■وحدة ضفاوية مازعة جوزها موس وخابطاه هواية بشوبك العجين ، عشان متصل في الصحة وقايلههم مرتي معها كورونا تعالوا خذوها .
■احتمال تنصرف شيكات الشؤون بعد تاريخ 15 من شهر 3.
■الزمالك فاتحة معه وصاير يفوز يا معلم ،وهيهم مبارح فازوا بثلاث قوان عالترجي التونسي.
■اليوم حيلعب شباب رفح مباراة مصيرية مع الشجاعية ،وفي مباراة ثانية لإتحاد خانيونس مع أهلي غزة ،وطبعا مباراة الخدمات الي متصدر هي المباراة الثالثة.
■رواتب السلطة اذا ربك سهل حتكون يوم الثلاثاء الي جاي .
■من يوم ما التغت حملات عروض جوال ،..والترعيشات والمكالمات الي بتنطلب ع حسابك كثرت.
■بيقلك حاطين ملك المغرب بالحجر الصحي عشان راح عالصين يوم واحد صد رد .
■انقتل مجموعة كبيرة مبارح من تعون النظام السوري بقصف تركي في ادلب والأمور بتبشرش بخير .
■الحدود بين تركيا وسوريا صارت سداح مداح للي بدهم يهاجروا ويشردوا من القصف أو حتى من الديون.
■علبتين مناكير ملونة للبنات بنباعوا بشيكل واحد بس.
■ثلث علب فروالة من الي يحبها قلبك بخمسة شيكل.
■ كيلو سمك العصافير بسبعة شيكل ،بحق عشوة فول وفلافل يا معلم.
■ الفلفل الأسمر الموجود بالبلد شايفه لا طعم ولا ريحة ،اعملوا زي ام نضال جيبوا حب واطحنوه أريح الكم.
■بهمش يخوي فش فيها خجل ي خال ،بس للأسف مفيش أخبار ولا تصريحات لقياداتنا والمسائيل نقدر نكتبها وتفرح عشانها ولا تبل ريقك.
■الحجة مريم بتسأل وحدة جاية تخطب بنتها سهاد، ابنك شو بيتشغل يختي؟ قلتلها بياخذ 100دولار من العمادي .
■ص

#صباح_الخير لكل واحد متجوز أكثر من وحدة وقادر يسعدهن ويوفق بينهن.
-صباح الخير لأبو الصابر بياع الترمس و الفول النابت الي طلع يسرح عباب المدرسة يسترزق.
-صباح الخير لأم خالد الي جوزها محبوس ع ذمة مالية وهيا قاعدة بتحوش اجار البيت عشان تسده كمان يومين.
-صباح الخير لمنال الي بتروح عجامعتها قبل محاضرتها ب 3ساعات عشان تطلع الباص لأنه معهاش تدفع أجرة السيارة.
-صباح الخير للمهندس ناجي صاحب بسطة القهوة الي ع مفترق السرايا.
-صباح الخير لأكرم ابن أم جمال الي موعد عمليته بالكلى يوم الاثنين الجاي.
-صباح الخير لكل واحد صاحي موكل أمره ل الله وماشي بستره .


#يسعد_صباحكم_يا_رب🌹