ممكن رأيكم بهادا الموضوع

قبل وفاة اختي الله يرحمها باربع اشهر تقريبا دار بيني وبينها حوار عن مرض السرطان
وقتها طلبت مني اعمل فحص للجينات وكانت دايما تتطلبه مني باستمرار وانا كنت ارفض علشان اعرف احتمالية اصابتي بالسرطان
واتعالج من بدايته لحتى ما اوصل للمرحله يلي هي وصلتلها
خاصة وانه هي وخالتو وماما وتيتا امو لبابا عندهم نفس المرض
انا وقتها رفضت وقلتلها ما بدي اعمله وما بدي اعرف اذا ممكن اكون مصابه فيه وبدي اموت من دون ما اعرف وحتى لو عرفت ما بدي اتعالج بالكيماوي
هي كان رأيها انه الواحد احسن يعرف ويتعالج من البدايه وهي لو كانت عرفت من اول المرض ما كانت وصلت لهاي المرحله
انا كان جوابي بناء ع الوجع والعذاب والحالة النفسيه يلي كنت اشوف اختي فيها وصحتها يلي عم تفقدها يوم ورا يوم
يومها في اخر نقاشنا عن هالموضوع اختي عصبت وادايقت كتير من كلامي وكانت اول مرة بشوفها بهاي الحاله
حكتلي وما بنسى كلامها ابدا انتي ما بتعرفي الاحساس يلي بحسو وصارت تبكي
في هداك الوقت انا الوحيده بالبيت يلي ما كنت اعرف انه الدكتور حكى الها ولبابا انه خلص ما في علاج وما في امل وانها كانت وقتها عم بتقضي وقت
كنت مفكره انه وقفت العلاج لحتى ترتاح متل ما كانت تعمل كل مرة
ما بعرف مش قادره انسى كلامها وما بروح من بالي كل ما بتذكر هالموقف بتوجع كتير وببكي وبلوم حالي ع الكلام يلي قلتو الها
حسيت اني ما كنت حاسه فيها واني غلطت بطريقه كلامي او اني جرحتها بشي كلمه
معلش طولت عليكم كانت مجرد فضفضة لا اكتر

عندي كم سؤال حابه اسألكم اياهم
قبل كل شي الله يبعد هالمرض عن الجميع ويشفي جميع المرضى يا رب

برأيكم

// الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟
// شو الامور يلي ممكن يقدمها الاهل والاصدقاء بهيك حاله ؟

حبيبتي لونلي الله يرحمها ويجعل مثواها الجنة يا رب
وربنا يبعد عنك شر المرض ويحفظك ويحميكِ لأهلك
ويهون عليكِ ويصبر قلبك


الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
حاسة انو من الأفضل انو ما يعرف عشان نفسيته ما تتعب ويمارس حياته بشكل طبيعي هيك رأيي


// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
عن نفسي بنهيها


// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟
بوكل أمري لله وما خاب عبد ٌ على الله اتكل


// شو الامور يلي ممكن يقدمها الاهل والاصدقاء بهيك حاله ؟

الدعم نفسي والمعنوي


ربنا يحفظك لونلي

صارلي فتره كتير بتخطرلي هالاسئله
خاصه انه احنا متلكم
هالمرض اخد منا كتير
ابوي وخواتي ال 2
وزوج اختي وابن عمي و و
فعلا في اسئله محتاحه اجابه ومن تجربه
راجعه اجاوب ان شاء الله
وربنا يبعد المرض والوجع ع الجميع
وربنا يرحم اختك وكل امواتنا يا رب العالمين

الله يرحمها لونلي ويجعل مثواها الجنة
ويكف عنك وعن جميع المسلمين شر الامراض

بالنسبة لاسالتك

// الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
ذنب اختك انها عرفت بمرضها لهيك ااحبطت وانه العلاج ما بنفع
ثانيا في اشياء ممكن تخلينا متمسكين بالدنيا وبتخلينا نتشجع ونقاوم لحتى نشفى ونوصل لهالاشي
واختك يئست وهاجس الموت حق وراح يكون واستسلامها توفت

// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
ما بعرف بوقتها راح استمر
لكن ساعرض ذلك على خطيبتي ان ارادت الاستمرار ام كلا

// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟

ممكن يجيني يأس واحباط ... بس ما في اشي صعب على رب العالمين ما زال الله موجود فالامل قائم
// شو الامور يلي ممكن يقدمها الاهل والاصدقاء بهيك حاله ؟
يقدموا الامل والتفاؤل والتشجيع على البقاء ومجاراة المرض واني انا قادر على الشفاء باذن لله



دمتي بخير

الله يرحمها لاختك ويغفرلها وان شاء الله
مافيكي الا الصحة والعافية لونلي

// الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
لا ما يعرف العمر واحد وجلسات الكيمي بتموت ببطىء الله يعافينا
// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
بنهيها بدون نقاش ولا تردد
// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟
بتكون صدمة كبيرة ب بالاخر بحمدالله لانو مابينفعني غير الحمد والرضا
// شو الامور يلي ممكن يقدمها الاهل والاصدقاء بهيك حاله ؟
البعد عن المريض لأن وجوههم بيحسسو احاسيس مؤلمة وبيصير يبكي ويحس حالو بيموت اليوم وهاللحظة
يعيشو حياتهم عادي ويتعاملو عادي

عوافي

بداية الله يرحم اختك ويعافيكم من هالمرض ،
والله يعافينا ويعافي الجميع منه ،

\

// الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
هو المفروض انه كل شخص يعمل فحص شامل كل فترة
حتى لو صابه مرض يلحق حاله من البداية ..

// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
بنهيهها خاصة ان ما كانش في امل بالعلاج ،

// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟
ما بعرف هالشيء اللي انحط بهيك موقف وجربه ،

// شو الامور يلي ممكن يقدمها الاهل والاصدقاء بهيك حاله ؟
ما في غير انهم يدعموه ويعطوه شوية امل ويدعوله بكُل وقت
انه الله يشفيه لانه قادر ع كل شيء

الله يرحمها أختك
ذاكرها وكنت معها في منتدى قديم
ما شاء الله عليها كانت مثال للأخلاق الطيبة والمعاملة الطيبة
والله زعلت كثير لما عرفت بالخبر
ربنا يرحمها ويجعل مثواها الجنة
وكثير انت بتشبهيها على فكرة
ربنا يرحمها ويغفر لها وكلنا في النهاية ميتين هم السابقون ونحن اللاحقون


بخصوص اسئلتك



// الواحد افضل يعرف انه مريض بالسرطان خاصة لو كان في مراحله الاخيره وانه رح يموت
ولا من الافضل ما يعرف انه مريض وليش ؟
انا برأيي أنه يعرف أقل القليل يكون مستعد للقاء ربنا في اي وقت
ويهيئ نفسه لهذا الشئ
صحيح الامر صعب
لكن في النهاية هذا قضاء ربنا وقدره
والأفضل انه يتنبه ويحاول يحسن خاتمته
احسن ما يظل غافل
// لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟
لو كنت خاطب بفسخ الخطوبة
ما برضى أن بنت الناس تستمر مع واحد حياته كلها مستشفيات وممكن يقابل ربنا في اي وفت
// لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟
في الغالب رح اسلم بقدري
واتقرب من ربنا وابعد عن اي معصية او ذنب سواء مهما كان صغير
واهيئ نفسي اني ممكن اقابل ربنا في اي وقت
// شو الامور يلي ممكن يقدمها الاهل والاصدقاء بهيك حاله ؟
الدعم النفسي والدعاء لك
ما اظن في شئ اكبر من هذا ممكن يقدموه
وممكن يقدموا لك الأمل لو كان المرض جديد ويمكن السيطرة عليه
اما لو في مراحله الأخيرة
ما في عندهم شئ يقدموه إلا الدعاء والدعم النفسي
لو هيقدموا لك الامل بيكونوا بيخدعوك



لا تفكري في الموضوع هذا كثير
ولا تخليه يشغل بالك
ولو متوجسة من شي
افحصي او حللي مش غلط


اتمنى ما تكون مشاركتي او اجاباتي ضايقوكي

مششعآرففه ششو أردد
اللهه يرححمهآآ ححبيبتي نتي ')
و متففكريي ههيكك
مبعرف اششي بسس متففكريي !
اللهه بححمآآككي أأكيدد و ههآدد كلووو لآزمم
تتطلععي منن رآسسكك !
ممبدي ءءحككي كمانن
ووردهه

لونلي العزيزة

الحياة والموت بيدالله
من جاء أجله فلن يستقدم ساعة أو يستاخرها
رحم الله اختك وجميع موتى المسلمين
بالنسبة لاسألتك
انا برأيي الواحد يعمل بالاسباب والباقي على الله
الواحد يعمل فحوص من فترة لأخرى
وليش الخوف ربنا مقدر النا شو بيصير معنا
وبالنسبة لاخفاء المرض انا ضده لانا ناس مؤمنة
بالعكس هالشي رح يقربني الى الله اكتر
وبالنسبة للإستمرار بأي علاقة ارتباط كالخطوبة فانا بعتقد بستمر الا إذا الطرف الآخر كانت رغبتو غير
وعلى فكرة الأهل لازم يعطو الثقة ومايحسسوه بالضعف ويكون إيمانهم قوي
ربنا يعافي الجميع ويحميهم
شكرا لقلبك الجميل والاحساس الرائع وطرحك لونلي

اقتباس   المشاركة الأصلية كتبت بواسطة وتر حبيبتي لونلي الله يرحمها ويجعل مثواها الجنة يا رب وربنا يبعد عنك شر المرض ويحفظك ويحميكِ لأهلك ويهون عليكِ ويصبر قلبك الواحد افضل يعرف انه مريض بالسرطان خاصة لو كان في مراحله الاخيره وانه رح يموت ولا من الافضل ما يعرف انه مريض وليش ؟ حاسة انو من الأفضل انو ما يعرف عشان نفسيته ما تتعب ويمارس حياته بشكل طبيعي هيك رأيي // لو كنت خاطب او خاطبه وبفترة الخطوبه عرفت انك مريض بالسرطان بتستمر بهاي العلاقه ولا بتنهيها ؟ عن نفسي بنهيها // لو كنت مريض بهادا المرض وحكالك الدكتور انه خلص ما في امل من العلاج شو رح تكون ردة فعلك ؟ بوكل أمري لله وما خاب عبد ٌ على الله اتكل // شو الامور يلي ممكن يقدمها الاهل والاصدقاء بهيك حاله ؟ الدعم نفسي والمعنوي ربنا يحفظك لونلي

امين يا رب العالمين
تسلميلي حبيبتي والله يحفظك يا رب
وانا رأيي من رأيك انه ما يعرف ويمارس حياته بشكل طبيعي لانه هالخبر كتير رح يأثر ع حالته النفسيه
شكرا ع تواجدك ومشاركتك الحلوه
نورتي موضوعي