أخبار_عالريق 1200 يوم ✅️يكتبها / #سعيد_الطويل

#أخبار_عالريق 1200 يوم
✅️يكتبها / #سعيد_الطويل

▪︎تيأسوش وخلوا أملكم بربنا كبير ..مبارح لسة راجل من غزة أجاه ولد بعد انتظار 20 سنة وواحد ثاني من الضفة خلف بنوتة بعد صبر 27 سنة ،يا الله ما أكرمك ..ربنا يطعم كل مشتهي

▪︎اقتحامات الاقصى والحرم الابراهيمي صارها فترة سداح مداح ليل نهار وحتى بيانات بطلنا نشوفهم

▪︎يوم 28-10 بدهم يغيروا الساعة وتقلب عالتوقيت الشتوي

▪︎الدولار سعره طالع فوق فوق ووصل مبارح ل3.87 شيكل

▪︎الليلة اقتحموا نابلس وقبر يوسف وطولكرم وشوية مناطق برام الله

▪︎تصاوب أكثر من 100 شب بالغاز والمطاط بعد ما طلعوا تصدوا للمستوطنين بنابلس

▪︎مبارح جماعة الأسمر عملوا عرض عسكري مرتب بغزة مليان شغلات وعتاد أول مرة يطلعوه

▪︎قتلوا أم وهي طالعة مع أولادها من صالة أفراح بمنطقة عرعرة بالداخل المحتل

▪︎دراسة جديدة لنج بتقلك انه الأحوال النفسية والمادية بتصير زي الزفت لما مرتك تروح ع دار أهلها يوم الخميس وتضل الجمعة وتقعد لحالك بالدار

▪︎فش عروض زي الخلق بالبلد إلا على قشاطة ومكنسة ومجرود وممسحة بعشر شواكل يم عماد

▪︎قطف البلح كامل انباع بخمس شواكل وعلقه وكول رطب يا معلم

من الآخر إذا نويت الخير لغيرك حيجيك الخير قبل غيرك
واوعك تتطلع لحاجة بايد غيرك ..ربنا يمكن مقدرك حاجة احسن منها

#صباح_الخير خص نص لكل معلمة مدرسة صحيت من الفجر صلت وكملت طبختها وصحت أولادها ولبستهم وحشتلهم الخبزة وجهزتهم وطلعتهم وتسهلت ع مدرستها ولسة حترجع تغديهم وتصحي جوزها ..

#صباح_الخير لكل طفل بيكافح وبيصمد وبيروح ع مدرسته البعيدة مشي ومش كل يوم بياخذ مصروفه لانه عارف ظروف أهله ..الله يجبر الخاطر ..

#هلا_بالخميس
5-10-2023