أخبار_عالريق

#أخبار_عالريق 1039 يوم
✅يكتبها / #سعيد_الطويل

▪︎لملموا أغراضكم وعبوا الشنط ومتنسوش الأواعي إللي على حبل الغسيل وخذولكم كم مرتبان مخلل وقزازة فلفل أحمر قبل ما تروحن من بيوت أهاليكن..خلصت الاجازة..وزهقوكم بكفي من الآخر يعني

▪︎بكرة أول يوم بدوام الفصل الجديد بالمدارس وخذلك عاد من هان لأسبوع تهاني ومباركات بالشهادات عالفيس بوك

▪︎بيقلك الأسبوع الجاي حتوصلنا شوية منخفضات جوية من إللي يحبها قلبك تخليك تقرقش من السقعة

▪︎التقرير الطبي تبع موضوع الطفلة ريماس والشيبسي اثبت انه في فأر مقلي جوا كيس الشيبسي وصار معها تسمم غذائي

▪︎تقريباً 300 طالب وطالبة سمعوا وسردوا القرآن الكريم من الجلدة للجلدة ما شاء الله مبارح بغزة بمشهد بيفتح النفس

▪︎خبر وفاة الشيخ محمد راتب النابلسي اشاعة وفش منه

▪︎فازت قائمة تحالف غزة هاشم في انتخابات الغرفة التجارية بغزة بسبع مقاعد

▪︎الأهلي المصري قدح الزمالك 3 قوان من إللي يحبهم قلبك

▪︎الاحتلا.ل مبارح رجع اعتقل ماهر يونس وحقق معاه وافرج عنه بعد ساعتين

▪︎كل يومين تلاتة بتطلع مظاهرات بالآلاف ضد نتنياهو بدهمش اياه و بيقولوا عنه فاشل

▪︎المنحة القطرية المفروض يعلنوا عن موعدها من هان لبكرة حسب المصادر

▪︎غضب واستنكار على حرق نسخة من القرآن الكريم من واحد متطرف في السويد

▪︎الواتس أب عامل خاصية مهمة للناس إللي بتعاني من الوحدة بتخليك تصير تحكي مع حالك بالمحادثة

▪︎بيقلك في دراسة جديدة لنج أثبتوا فيها انه الست بتعيط 64 مرة في السنة بس الراجل ب 6 مرات ..عليا الطرشاق في بنات بيخلصوا ال64 باليوم

#صباح_الخير وراحة البال وهداة البال والروقان والناس الحلوة إللي بتحب الخير لغيرها ..وربنا يعطيكم لما يرضيكم ..
الوصول معدوم والصفحة مقيدة لو وصلكم المنشور نورونا بالتعليق والايك وبس ..🙏

الأحد 22-1-2023