أخبار_عالريق

#أخبار_عالريق 870
✅يكتبها / #سعيد_الطويل

■الحمد لله خشينا اليوم بشهر 6 ، بعد كل حاجة حلوة ومش حلوة صارت بسنة شهر خمسة

■ كمان اليوم صرنا بأول شهر ذو القعدة يعني موسم العجول والخرفان والأضاحي طرق أبوابه

■ما علينا المهم أول خبر بشهر ستة تبشرنا فيه لازم انه جرة الغاز صارت ب72 شيكل واصلة للدار، والبنزين كمان صار بسبعة شواكل.

■مش بس هيك انت تخيل انه قلن الزيت صار ب23 شيكل وجرة الغاز ب72 يعني بقديش حيصير الفول والفلافل لواحد فاتح مطعم ع قرنة الشارع .

■فدوس الصيف بلش بمعظم مدارس الضفة والقطاع واحتفلوا فيه الطلاب بطريقتهم الخاصة ومزعوا كل دفاترهم وكتبهم بالشوارع.

■بأول يوم بالفدوس في نسوان سحبت حالها وراحت ع دار أهلها وسابت أولادها عند أبوهم ، وفي ناس شالوا حالهم وأغراضهم وراحوا كلهم عالبحر ، وفي ناس ماكلين هوا وضلوا قاعدين بالدار عشان عندهم حد توجيهي السنة وبنفعش يسيبوه.

■شب انقتل طعن بسكينة بطوشة مبارح بالقدس.

■بيقلك كمان خمس أيام ،اليــ ـهود بدهم يقتحموا القدس بنفس الطريقة

■عشان ترتاحوا فش حرب من هان لبعد امتحانات التوجيهي ،وإللي أكد المعلومة سواق قديم ع خط دير البلح

■اعتقلوا اليــ ـهود مبارح خمس صياديين من نص بحر رفح

■تفعل رابط التسجيل للفيزا التركية بكل أنواعها والرابط حتلاقوه بالتعليقات تحت

■حسين الشيخ بيقول انه احنا وضعنا ع حفة الحفة مع اسرائيل

■الجو إله من مبارح عنجد شوب من تبع زمان

-بعد اذنكم مطلوب شبر وجهاز لجرة اكسجين خاص لمريض للضرورة لو حابين تساعدوه والجرة بستفيد منها كذا شخص.

#يصبحكم و #يربحكم ويفتحها بوجوهكم يارب🌹

الأربعاء 1-6-2022