#أخبار_عالريق 536 يوم ✅يكتبها/سعيد الطويل

#أخبار_عالريق 536 يوم
✅يكتبها/سعيد الطويل
■انتوا عارفين انه قصة مقطع الفيديو تبع الخمس ثواني اللي صوره واحد متخلف لمرته وهي شالحة بمنتجع بيانكو قلب الدنيا قلابة مبارح وهي أكثر قصة انتشرت مبارح عالفيس .
■طبعا الزلمة ومرته محبوسين والقصة صار ملهاش بحدا انتهتك خصوصية حدا ،يعني طلعت القصة منهم فيهم وحيتحاسبوا على نشر الفيديو عالعام .
■المهم المباحث سكرت حسابهم تبع خالد وسارة اللي ع تويتر ولسة بدهم يعرفوا بقية التفاصيل.
■الجو اليوم حيكون شوب وكمان شوب بزيادة من تبع الرطوبة والعرق والصماط المقرف.
■اليوم أول يوم بيداوموا فيه الأساتذة والنظار بالمدارس ،بالضفة وغزة وبعد بكرة ان شاء الله دوام أولادكم.
■شب غرق بالبحر مبارح اسمه نصار عبد ربه ،عمره يا دوب سبعطعشر سنة ،من جباليا،الله يرحمه.
■اليهو د وافقوا انهم يعطوا تصاريح ل1000تاجر جديد من غزة ،المهم يكونوا متطعمين للكوو رنا.
■الأمور خربانة وفيها تصريحات سخنة واليهو د بيماطلوا والفصائل بتقلك انه صبرنا خلص عالآخر.
■الأمور مش طيبة ،اذا ضل الوضع زي هيك .
■بكرة السلطة حتصرف رواتب المتقاعدين العسكر في البنوك.
■في اسرائيل الكو ورنا طالعة ترند ،عدد الاصابات صار يقلط الست تلاف حالة باليوم.
■الله يستر عنا من اللي جاي ،لانه بصراحة النسبة بترتفع ومحدش مدور ولا حد ملتزم.
■الناس قرفانة حالها ومش عاجبها الوضع وبدها حل جذري للروتين الرمادي اللي دبحهم دبح .
■كيلو البندورة بأربعة شواكل، زي سعر كيلو التين والمانجا بالضبط .
■الجزائر الحمد لله طفت كل الحرايق اللي عندها ،الله يجبر عنهم.

#بدنا_نصبح على الناس اللي نامت مهمومة ودعت ربنا انه يفرج كربها ،والحمد لله صحيت راضية مرضية ،ربنا لا يكسر خاطر حدا ،ويبعد شر بني آدم عنا وعنكم

#تصبحية خص نص للناس اللي بتتدخلش بغيرها ولا بتحط مناخيرها بشغلة ملهاش فيها ولا بتفتي بحاجات بتفهمش فيها ،الناس اللي مريحة راسها من كل حاجة بتخصهاش

#صباح_الخير لكل واحد صاحي موده معكلن ومتنكد ،ان شاء الله بيجيك اتصال بيريح بالك وبيخلي ضحتك من الشيق للميق ..

#صباحكم_سعادة 🌹
السبت 14-8-2021