كتبت رؤى الريماوي شقيقة القمرين جواد وظافر الريماوي

كتبت رؤى الريماوي شقيقة القمرين جواد وظافر الريماوي
الوجع اللي ما بتصور ولا بنحكى عنه:

- امي أول ليلتين ما نامت ضلت قاعدة عند الشباك تستنى جواد وظافر يرجعوا.

- أنا لهلأ مش قادرة أدعيلهم بالرحمة وأسبق اسمهم بألفاظ الشهادة والموت ، لساني مش قادر يحكيهم لإنه عقلي مش مستوعب انه جد هم مش راجعين، فانتو ادعولهم لحد ما الله يقدرني.

- رحت أدور عليهم بالمقبرة، لقيت ورد وصور الهم بس ما لقيتهم، دورت بالجامعة بكل وجوه الناس وبرضو ما لقيتهم، بقعدات صحابهم وبكل محل.. أنا لهلا بدور عليهم.

- بروح عغرفتهم كل يوم أول ما أصحى وبنصدم بكل مرة إنه الغرفة فاضية، هاد مشهد ما بعتاد عليه.

- الناس كلها بتحكيلك "اصبر، وكمل الحياة" بس محدا بحكيلك كيف؟ محدا بعلمك كيف؟ هاد الوجع مش طبيعي، اللي بصير مش عادي! مش عادي احنا كل يوم نقدم شهيد! هاد الوجع ممنوع حدا يعيشه! تمروش عأخبار الشهدا مرور الكرام وتكملوا اليوم عادي، هاد كله مش عادي!

الله يرحمهم ويرحم كل الشهدا
ويصبر اهاليهم يا رب😪