الحكاية من البدااية

ونبتدي سرد الحكاية
من البداية
لما كان القلب مليان طيابة
واللسان بيتكلم سعادة
والعيون بتضحك سعيدة
والابتسامة تاخد الوش كله
بس يعدي اسم حد بنحبه
على ودانا
يتخربط كلامنا
ويفقد القلب اتزانه
ويبتدي الشوق يسوق قلوبنا
وياخدنا من مكانا
لمكانه
والروح تطير تسابق نجوم
وتسيبنا عشانه
واحنا يا دوب نعرف نعوم
على اول شط الغرام
كنا عشان نقول كلام
نكتب رسالة
كنا نكتب عن انتظارنا
عن كم ليالي سهرنا
نكلم في روحنا
هو الحب في اوله يكيفنا
وحبة حبة يكتفنا
ويبتدي حبل الوصال
يتقطع ما بينا
وبعد ساعات سهر طوال
وليالي حب طويلة
كنا نتعاتب على الغياب
دلوقت مش فارق معانا
كنا نتخانق بالساعات
مين يحب التاني اكثر
ومين شوقه اكبر
دلوقت يلا يلا بنقول السلام
وعادي لو اتقابلنا صدفة
نكمل طريقنا
والعين بعد ما كانت
تشتهي نظرة
بقى عادي لو عدى قصادنا
ومخدناش منه بالنا
ذكريات كثيرة جمعت ما بينا
كنا نتكلم ونتقابل
نتعاتب ونتغازل
كنا نتخانق ونتصالح
مكانش القلب يوميها جارح
كنا ندعي في صلاتنا
كل ليلة
كنا نبني في احلامنا بيتنا
كنا نتخانق عليه
ومين هياخد الجمب اليمين
في السرير
وكنا نتخانق عن ولادنا
هيبقوا شبهه واللى شبهي
هحبوا اكثر
فينا مين ..
اصلهم قالوا اللي يحب التاني
اكثر
بيبقوا شبهه
وياخدو صفاته وشكله
بس هما هيبقوا ليا ويبقوا ليه
اصلها محبة سنين
بس الزمن كان كفيل
يتقلب كل اللي فات
وينتهي الحب الطويل
ما بين كام يوم وليلة
ويخلص من سكات
بس مين ينسى بسهولة
حب عاشه من الطفولة
او حتى كانوا يومين
صحيح بنعيش حياتنا
وعادي جداً
بس انه ننسى
حاجة مستحيلة
والمشكلة ما بتكرهوش
حتى لو عدى عليك
واتجرحت منه ما بتكرهوش
مهما عدى عليك سنين
ومهما حولت ما بتنساهوش
ومفيش للحكاية نهاية
بنفضل ندور بمكانا
ونفتكر كان وكنا
هي دي الحاجة الآخيرة ..