رسالة مطوية في دفتر قديم

رسالة مطوية في دفتر قديم
كلامها يا دوب باين
والورق دايب
بس متصانة
وشكلها بقالها سنين
ونصها من سطرها الأول حزين
بتقول في أولها
انا اسفة عشان هبعد
وانا عارفة
انك مش هتنساني
وهتبقى بعدي وحيد
وكانت كلمة وحيد
مشطوبة بقلم احمر
ومكتوب مكانها سعيد
وبتكمل
بس عشاني
حاول ان انت ما تظهرش
في حياتي
اصل ممكن تحن من تاني
واشوفك من بعيد
وملامح وشك
مخنوقة وحزينة
ويتوجع قلبي
علشانك .!
ومكتوب تحت الكلام
بخط يدوب باين
انا هبعد وانسى
ومش هاجي بساعات الليل
على مكانك
لا هاجي الصبح اشوفك
وانتي خارجة
وهحرم اسمك على لساني
مش هبعتلك صباح الخير
كما العادة
وان اتسألت
عامل ايه
هقول احسن من الأول وبزيادة
و انا مكمل
ولا فارقة معايا ولا حاجة
ولا قلبي كله بقى فاضي
من بعدك ..
ولا بفضل اشوفهم كلهم انتي
ولا بفتش عليكي في أماكن كنا بنروحها
ولا يمكن
..
وبتكمل
انا خايفة
مش سهلة اني اكتبلك
ان بعد سنين هوى
بعد سنين سوا
بعد اما كنا بنتقاسم
حتى الهوا
وضحكتنا وزعلنا
وعاندنا ظروف ياما
بس في الاخر نصيب
حبيبي على عيني
وهتفضل والله حبيب
بس احنا عارفين من الأول
ان الحياة ما بتضحكش للاخر
وترجع تخيب ..
انا مش عايزة تتعذب معايا
وانا شيفاك بتحاول
وبتحارب ومش قادر
وبتتشعلق في أي سكة
عشان توصل
وبتعافر
انا عارفة عملت كثير علشاني
بس العُمر مش واقف
ومش هفضل سنين واقفة
وبستنى وبستنى
وعُمري يضيع
فمعلشي خذها ببساطة
انا عارفة ان الفراق امر فظيع
والنسيان مش بسهولة الكلمة
وان الحنين اسهل
بس صدقني لو مش هتنسى
هتتعود
..
كلام كثير اوي مكتوب
بتحاول فيه
تطيب روحه
قبل ما تروح
وقفلت وراها الباب
برمل وطوب

..
كان من حقه
يسألها وعينيها في عينه
ويرد على كلامها
ويتجادلوا ويتحاسبوا
هو عمرها بس اللي ضاع
ما عمره ضاع
وتعبه علشانها ضاع
ولياليهم وكلامهم
واحلامهم
يلاا اهي عدت سنين فعلاً
ومتعود انها غايبة
بس مش ناسي
انها سايبة
وانها حتى معطيتهوش فرصة للعتاب
و يتفقوا او يتفارقوا
ويبقى ود ما بينهم
ولو كداب