كيف بنقدر نوقف العدوان ع غزة ونساعد أهلها؟

اقتباس   المشاركة الأصلية كتبت بواسطة مُبتسِم 1. كيف بنقدر نوقف مع أهلنا بغزة؟ وهل في طريقة حقيقية نوقف هالحرب نهائيًا ونحمي الناس؟ الوقوف مع غزة بيكون بكل الطرق الممكنة، سواء بالدعم المالي، نشر الوعي، أو الضغط على الحكومات للتحرك. إنهاء الحرب نهائيًا مش بيد الشعوب لحالها، لكنه بحاجة لضغط سياسي كبير على الاحتلال وداعميه، ووقفة عربية وإسلامية موحدة. 2. شو أفضل طريقة بنقدر نساعد فيها أهل غزة؟ التبرعات للمؤسسات الموثوقة، دعم حملات الإغاثة، نشر التوعية، ومقاطعة الشركات الداعمة للاحتلال. وأهم شي نحكي عن جرائم الحرب اللي عم تصير وما نخليها تمر مرور الكرام. 3. بتحس إنه الإعلام بوصل حقيقة يلي بصير بغزة؟ وإذا لا، كيف ممكن نوصل الصورة الصح للعالم؟ الإعلام الغربي منحاز وبيشوه الحقيقة، بس وسائل التواصل الاجتماعي صارت سلاح مهم. كل شخص فينا لازم يكون صوت لغزة، ينشر الفيديوهات والحقائق، ويتأكد إنها توصل لكل مكان. 4. كيف ممكن الشعوب العربية والإسلامية تتحرك بشكل أقوى لدعم غزة؟ المظاهرات، المقاطعة الاقتصادية، التبرعات، والضغط على الحكومات لوقف التطبيع والتحرك سياسيًا. الوحدة الشعبية بتشكل ضغط كبير وبتجبر الحكومات تتحرك. 5. بتحس إن الحكومات العربية والعالمية بتعمل يلي عليها عشان توقف الحرب؟ ولا في تقصير؟ بكل صراحة، في تقصير كبير. أغلب الحكومات العربية ساكتة أو مكتفية بالتصريحات. اللي عنده تأثير حقيقي لازم يستخدمه، مش بس شجب واستنكار. 6. برأيك، هل المظاهرات والضغط الشعبي بالدول المختلفة ممكن يغير أي شي؟ أكيد، المظاهرات إلها تأثير كبير، شفنا كيف الناس بكتير دول غيروا سياسات حكوماتهم بسبب الضغط الشعبي، فلازم نكمل وما نوقف. 7. الفلسطينيين يلي عايشين برا كيف ممكن يساعدوا غزة بطريقة فعالة؟ يوصلوا صوت غزة بالإعلام، يدعموا أهلهم ماليًا، ينظموا حملات ضغط سياسي، وما يسكتوا على التزييف الإعلامي. وجودهم بره فرصة لإيصال الحقيقة للعالم. 8. شو الحل الحقيقي عشان غزة تعيش بسلام وما تضلها تحت الحروب كل فترة؟ إنهاء الاحتلال بالكامل، مش مجرد هدنة مؤقتة. الاحتلال هو سبب كل المعاناة، وطالما موجود، غزة وباقي فلسطين رح تظل تعاني. 9. شو أكتر الإشياء يلي بتحسوا إنه الناس في غزة بحاجتها اليوم؟ الأكل، الدواء، المأوى، والأمان. كل شيء تقريبًا ناقص، حتى أبسط الاحتياجات اليومية صارت صعبة. 10. شو دورنا كأفراد عاديين سواء كنا في غزة أو برا عشان نساعد أهل غزة؟ كل واحد فينا عنده دور، سواء بالتبرع، نشر التوعية، الضغط السياسي، أو حتى الدعاء. الأهم إنه ما نكون متفرجين، وكل شخص يسأل نفسه: "أنا شو عملت لغزة؟" وبالاخير بقول شعبنا ب 48 الهم دور كبير لو طلعوا كلهم مرة واحدة راح توقف الحرب بأول يوم ...لكن لا حياة لمن تنادي دمتي بخير

كل النقاط يلي ذكرتها مهمة كتير
الاعلام الغربي فعلا منحاز وبحاول يشوه الحقايق بس وسائل التواصل الاجتماعي قلبت الطاولة عليهم
صار واضح للعالم حقيقة الاحتلال لأنه الناس بتوثق كل شي بالفيديوهات المباشرة من غزة والناس بتصدق يلي بتشوفه بعينها
ومسؤوليتنا نحنا انه نكون دقيقين بالمعلومات اللي بننشرها ونرد على التزييف بالأدلة والوثائق
المظاهرات إلها تأثير كبير بس لازم تضل مستمرة عشان تعطي نتيجة حقيقية
بالدول العربية متل الأردن الناس نزلت مظاهرات كبيرة ،، كتر الله خيرهم ، وكمان بمصر حاولوا يعبروا عن موقفهم ضد الاحتلال بس للأسف كل مرة بيواجهوا قمع واعتقالات مش بس بالأردن ومصر،، هاي الحالة موجودة بدول عربية تانية لأنه في دول بتخاف تاخد موقف قوي بسبب الضغوطات الدولية عليها أو مصالحها الاقتصادية
حتى بالدول الغربية يلي دايما بتحكي عن الديمقراطية وحرية الرأي ،، شفنا كيف صارت اعتقالات ضد الناس يلي بتناصر غزة
ما في شك انه في تقصير كبير من الحكومات والتصريحات بدون أفعال ما الها قيمة
الدول العربية يلي قريبة منا وممكن يكون الها دور كبير متل مصر والأردن وقطر لازم تاخد مواقف أقوى وما تكتفي بالوساطة بس
المهم انه ما نفقد الأمل وما نوقف ،،، كل خطوة مهما كانت صغيرة ممكن تساعد
والأهم من كل شي كل واحد فينا يسأل حاله أنا شو عملت عشان أرفع الظلم عن غزة ؟

شكرا خالد ع مشاركتك الوافيه
نورت موضوعي

مُبتسِم معجب بهذا