ما هى الاستفادة من طوفان الاقصى ؟! دعوة للنقاش

تصرف صبياني واللي خطط معندهوش بعد نظر!
وجهة نظرك غريبة بجد يا كبرياء

هو أي حد كان أكيد هيبقى متوقع إن ديه هتبقى ردة فعل إسرائـ.ـيل على اللي حمـ.ـاس عملته
لإنها مش أول مرة تحصل وأكيد حمـ.ـاس كانت متوقعة حاجة زي ديه مش اتفاجئوا بيها عشان اللي خطط مكنش عنده بعد نظر!

أبو جوليا اليوتيوبر اتكلم على الموضوع ده بحاجة عجبتني أوي..
لو أنت دلوقتي عندك بيت وحد جه اخده منك بالغصب وقعد معاك فيه، ومش كده وبس لأ ده في الرايحة والجاية قاعد يضرب فيك أنت وأهل بيتك، وجاتلك فرصة تضربه بالقلم
وأنت عارف إن القلم ده مش هيأثر في حاجة بالعكس ده هيقوم وهيضربك أكتر، هل هتخاف وتقول بلاش أحسن ولا هتستنى أي فرصة تجيلك تشفي غليلك منه؟

وده نفس اللي حصل، أنت بتقول إن الموضوع كان تصرف صبياني، بس شوف التصرف ده وجع قلبهم قد ايه ورعبهم وخوفهم ازاي
خلاهم يحسوا ب٥٪ حتى من اللي بيعملوه في الفلسطنيين

وعامةً إسـ..ـرائيل من غير حاجة بتضرب وبتظلم وبتقتل بسبب أو من غير، بس طوفان الأقصى كان فرصة ياخدوا بيها حقهم حتى لو جزء بسيط
وعشان تشوف الموضوع مؤثر قد ايه اسأل على رقم الوفيات والإصابات في إسـ..ـرائيل.
ربنا ينصر أهل غزة ويحفظهم.

وحاجة كمان يا كبرياء، فلسطين قضية إسلامية ونصرها واجب على أي مسلم مش مجرد بلد اتربينا على حبها من صغرنا، بس محدش فينا في ايده حاجة دلوقتي يعملها..
فاللي في ايدهم حاجة يعملوها زي حمـ..ـاس بيعملوها، حتى لو اللي عملوه ده مش هيحرر فلسطين دلوقتي، بس زي ما قولتلك كفاية وجع قلوبهم وخوفهم اللي عاشوه الكام يوم دول
وكفاية كمان احساس الفرحة والعز والنصر اللي كانوا الفلسطينين وأحنا كمان حاسين بيه
وبصراحة زي ما لونلي قالت، لو كلنا فكرنا بنفس التفكير وكلنا خوفنا من ردة الفعل وإن العواقب هتبقى أسوء يبقى فلسطين مش هتتحرر.