هما كده صحاب العمر

ومين يسندك
في اول بدايات الطريق
غير صديق
بدأت معاه اول رحلتك
ومين يسندك
لما يميل غصنك
ويعدلك
لما تميل عن الطريق
وتيجي صحبة سوء تسحبك
تلاقيه سد وباب في الطريق
يوقفك
ويرجعك
صديق معاه اول ضحكة
اول صورة معاه
معلقة في اوضتك
صديق من اول سنة
في المدرسة جمبك
ومين يحفظك
ويصون سرك
غير صديقك
كلام كثير ما بيتقالش
غير ليهم
كلام ما بتعرفش
تقوله لحد من اهلك
تلاقيه هو
اول حد يقول سامعك
تفضل بالساعات ترغي
كلام فاضي
وهو يقول كمل
من غير ما يتملل
ولو جيتله يوم بمشكله
يقول سهل
نحلها
مبيهربش ويسيبك
وان يوم لقاك موجوع
يبقى عليك موجوع
ما بيضحكش على وجعك
ما بيقللش بمشاعرك
يبقى معاك للصبح
يطبطب على قلبك ..
بتتفقوا ع خروجة
وتيجيله بعد المعاد بساعة
يكلمك تلفون يسألك فين
تقوله اهو قربت اوصلك
وانت يا دوب نازل
من البيت
وناسي تيلفونك ومحفظتك
وراجع تجيبهم تاني
ويستنى ما بيغضبش
عادي بيعذرك ..
هما كده صحاب العمر
مهما تعدي سنين
مهما ايه يمر ..
يفضلوا يطمنوا
على بعض ..
ما ينسهمش البُعد