صارت حرب كله بيحكي كله بيفتي وانا وحدي

ماما ..
هُوَّا المَنْدِي
هُوَّا الزَّرْبْ ؟
شوف
الفكرة يا ماما
إنّو الاتنين
بندفنوا تحت الأرض
بتصير اللّحمة
مَهْلوطَه
مَهبوكَه
وتحت الأرض
منفوخَه
بس يجي العيد
بَندَهلَك تجهِّز البرميل
وبَشرَحلَك أكتر يا أميـر
وإجا العيد ..
وما لبسنا توب جديد
وصار في حارة بالحارة
صوات كتير
وطيّارة
اولاد حافيه
غَطَى صَلَا بِمشي لحالُه
وخوف كبيـر
طول بعرض
بِدعِي السنّة
وبِدعِي الشّيعة
وبِدعِي الفَرض
ورِجْلين كُل فَردَة شِكِل
وناس بتخبُط
ناس بتعبُط
شورت بيركُض
ورا شَبّاح
يا دوب لِبِسهُم
هاني بثواني
والدكتور عبد الفتّـاح
وصارت
غاغَه بالحارة
صوت
غارة
وضَرْبْ إِفْ ضَرْبْ
ونِسْيِتْ ماما تشرحلي شو هُوَّا الزَّرْبْ ..!
اللّي مِتزَكْرُه
إنّو الطاولة نامتْ
تحت الأرض
وماما تحتيها
وبابا حاضن مازن
ونايم واخواتي
تحت الكراسي
ومَهدي مْخَشِّبْ
وبتُمُّه المصّاصه بوضعية عَضْ
وبالسّماعة
وبالإذاعة
كُلُّه بِحكي
صارت حرب
كُلُّه بِحكي
كُلُّه بِفتي
وأنا وَحدي
شامِمْ مَنْدي
شامِمْ مَهدي
وشامِمْ ماما
وهيّا بتِشرَح
معنى الزَّرْبْ


بقلم / أكرم الصوراني

الي ما فهمها يحكيلي وانا بوضحها له