كل وحده تشوف حالها

قسم الصبايا في جامعتنا إلى أنواع منها :

*القطاعة (النيردة) : ممكن تبكي وتقلبها مناحة وتسمع ل"مصطفى كامل" لمجرد انها جابت 18 من 20 بالفيرست . . بتدرس لساعات طويلة وكل كتبها مخططة بالالوان والملاحظات . . وبتجي قبل المحاضرة ب ساعتين لحتى تحجز بالمقاعد الامامية ، كلامها قليل ، لكن اسئلتها كثير بالقاعة ، الوقت المفضل عندها لطرح الأسئلة هو آخر 5 دقائق بالمحاضرة . . ؛ البريك عندها للمراجعه والقراءة والتأمل في المادة . . ودفتر محاضراتها بالنسبة الها "خط إحمر" . . وغالبآ بتخلص الجامعة ب 3.5 سنوات

* الكادحة : غالبآ متزوجة وبرقبتها 3 اطفال بما فيهم زوجها و بتكون موظفة ، وشايلة البيت فوق راسها وبرضو بتدرس وبتجيب علامات عالية . . (كيف ما بتعرف )

* الفاشينيستا : ملكة الايلاينر ، والإطلالات العالمية ، كل شيء على " الموضة " من لون المناكير لغاية لفة الشال . . وبين كل خطوة والثانية لازم توخذ سيلفي .

* منال العالم : أمبراطورة الطبخ في السكنات ، وبتعرف تطبخ كل شيء ودايمآ بتنقذ صاحباتها وقت المجاعة . . ومستقبلها باهر .

* السوسة : كل المشاكل من تحت راسها ، بتحب تجمعات البنات ونقل الكلام ، وهوايتها تخريب إي علاقة ناجحة في طريقها . . وكل موبايلها "سكرين شوت " للمحادثات .

* محامية دفاع الشلة : لسانها سليط دائمآ ، وما حدا بيطلع معها راس ، لا أمن جامعي ولا دكتور ولا حتى كونترولية الباصات . . وتعتبر المتحدثة الرسمية عن صاحباتها الخجولات .

كائن الباندا : وهذة تأتي للجامعه فقط للأكل ، واماكن إنتشارها في الشاورمجي / التجمعات / كافتيريا الجامعه ؛ محبة للمشاركات واللمات (طالما هنالك اكل) ، وشنطتها دائمآ مليئة بأنواع الشوكولاته والبسكويت . ..الخ

* المحايدة : دائمآ نادمة على اليوم اللي دخلت فيه الجامعه ، وبدها تخلص بسرعه وبأي طريقة وما فيها على لسانها إلا " الله يلعن أبوها من جامعه " . . وبتمر مرور الكرام

* إنجلينا جولي التخصص : لمساتها اللطيفة واضحة مع الجميع ودائمآ ملخصاتها للمواد معبية المكتبات . . و إي نشاط او حفلة عاملينها زملياتها بتشاركهم الفرحة و بتدعمهم . . بالذات حفلات الخريجين . . واعمل خير وارمي بالنافورة.
كل وحده تشوف حالها ✋😂