ارضاء الناس غايه لا تدرك

*عرسهم بالشتاء*
الناس: في حد بتزوج بالشتا والبرد؟ رح تضل ملفلفة حالها.

*عرسهم برمضان*
الناس: حد بعمل عرس بشهر العبادة؟ الله يهدي الناس بس!

*عرسهم بالعيد*
الناس: حد بتزوج بالعيد؟ هي الناس فاضية تحضر عرسهم؟ عنا زيارات ومشاوير!

*عرسهم بالصيف*
الناس: بالصيف؟ بالأزمة والشوب؟ لا حول ولا قوة إلا بالله.

*عرسهم بالربيع*
الناس: ول! ما عرفتش تستنى اخوانها لييجوا من الخليج ع الصيف!

*عرسهم بالخريف*
الناس: يعني خلت اخوانها يسافروا من هون وحجزت عرسها من هون، جد اللي استحوا ماتوا.

*عرسهم الساعة ٥:٠٠*
الناس: في حد ضل يعمل عرسه عالـ٥؟ زي أعراس النوَر!

*عرسهم الساعة ٩:٠٠*
الناس: يعني متى العالم بدها تلحق تيجي وتروّح؟ بفكروا ما عنا ولاد ولا بيت ولا شغل؟

*عرسهم بصالة*
الناس: ول عليه ما ابخله! وهي التانية هبلة، يعني عملّها خطبتها بالبيت وقلنا ماشي، بس عرسها كمان بصالة؟ كيف قبلت ع حالها؟

*عرسهم بفندق*
الناس: واااال شكله مدكّن، بس ما اهبلهم لو حوشوا المبلغ ليشترولهم بيت مرتب مو احسن؟

*شهر عسل بتركيا*
الناس: ما ضل حد إلا وعمل شهر عسل بتركيا! هو فش غيرها! ما اهبلها كيف قبلت!!

*شهر عسل بتايلند*
الناس: والله غالية السفرة لهناك.. بكرة برجعوا مفلسين وما بلاقوا ياكلوا.

*ما بدهم يروحوا شهر عسل*
الناس: أبخل من هيك ما في! بعدين شو التياسة هاي؟ يعني اذا الوحدة ما سافرت هلأ مع زوجها متى تسافر؟ والله غير تضل محبوسة بالبلد وولا عمرها بتشوف اشي.

*شهر العسل مدته اسبوع*
الناس: بس اسبوع؟ الله اكبر! اسمه شهر! طب خليهم اسبوعين ع الاقل!

*شهر العسل مدته شهر*
الناس: واااال شهر! رح يزهقوا من اول اسبوع.

---------------------------------------

الحل؟
اعمل عرسك بالأدغال الساعة ١٢ بالليل مع الأسود والنمور والأفاعي، وارقص سلو ع الطبول الإفريقية وتعزمش حد.. 😜
وبعد العرس أفرش حصيرة محل ما إنت بالغابة، منه شهر عسل ومنه بيت، مشان ما حد يزورك ولا يعرف وين إنت 😂

#إرضاء_الناس_غاية_لاتدرك
#ملطوشة 😜

هههههههههههههههه
حششت ضحك عالحل
يا وردي عليهم الناس ...
بجد فشي حد بسلم من كلامهم
لهيك احسن شي الواحد يطنش مشان يعرف يعيش


عوافي ي حب

الناس بس بدهم يعطوا اراء و انتقادات
نادراً لأشوف حد بمدح بشخص عمل شيء
الا الإنتقاد و يضع لمساته و كلامه
لهيك انا بطلت اهتم لكلام الناس
تقديري

هههههه
الي بيرد على الناس بيتعب
مشكور للموضوع
تحياتي لك

والله صحيح
يلى بيسمع كلام الناس بيتعب
عوافى للطرح

ههها شي واقعي

عاطر التحايا

وعلى رأي اللي قال
كلام الناس لا بيقدم ولا بيأخر
شكرا نقاء

اي والله مستحيل يرضوا الناس ومستحيل ما يعيبو باشي مهما كان
يعطيك العافية لادراجك الحلوو ..

شكرا لمروركم جميعا
نورتوا موضوعي
دمتم