روحي طالعة روحي، قومي ارقصي قومي..!

انا مع انو العروس تضل ترقص بعرسها طول الوقت ، وما تقعد ولا دقيقة ، حتى وهي بتوكل ترقص ، وهي طالعة الدرج ، وبالزفة ، وهي عاللوج تكون تهز برضو ، وهو بلبسها ذهب ترقص ، وهي بتتصور برضو ترقص !

وما ترد على اللي بحكيلها : لازم تكوني راكزه بالعرس وتضلي قاعدة ، بلاش يقولو عنك قاتلة حالك!

يا سيدي قاتله حالها وين المشكلة؟! حره هي بدها تقتل حالها ع عرسها شو بدكم فيها؟! اذا ما رقصت بعرسها وين ترقص؟! بطابور القبول والتسجيل بالجامعة؟! ولا بعيد ميلاد مرت اخوها؟!

اوعي تتحركي من مكانك كثير ، اثقلي !!
لا يا عمي تثقليش ، وتحركي من مكانك ، هو انتي بمكتبة؟! ترديش عليهم هاد عرسك ، مش عرس العيلة!

اصلا قمتي او قعدتي بدهم يحكو ، ع جميع الجهات بدهم يحكو ، اصلا لو ضليتي قاعدة رح يقولو شكلها مش مبسوطة، والله ما هزت كتافها نص هزه!

مشان هيك قومي اعملي هزة ارضية بالصالة ، ارقصي فوق الطاولات عادي ، جيبي صاحبتك تحملك ع كتافها وتركض فيكي ، وتوقعو ، يجي وجهك بنص صحن كيك عادي ، وقومي امسحي الكيك وارقصي!

اوعي تضحكي كتير!!! بلاش يحكو علينا ويقولو البنت خفيفه!

ترديش ، ضلي اضحكي ، ضلي فاقعة ضحك زي المجانين عادي ، اذا ما ضحكتي بعرسك وين تضحكي؟! بمحاضرة الكيميا؟! ولا بتخريج اخوكي رمزي؟!

اوعي تردي ع اي تعليمات وانتي بعرسك ، ولك مهو عرسك انتي ، مش عرس الناس ، بدك تمشي تحت رحمة شو يحكو ، ولك اصلا نصهم جاي يزقف ، ويتصور ، ويوكل ، ويشوف كم بدو يلبسك ذهب ، ويسرق ورد عن الطاولة ، ويروحو! ويحكو عالكل !

مشان هيك خربانه خربانة ، ارقصي يا حصتي لانو جاييكي ايام اسود من قرن الخروب 😂
هو هاليوم ، استغليه بالطول وبالعرض وبالارتفاع !

قال تتحركيش قال ، ول هي قاعدة بباص جت!
ولك منتي فضحتي الدنيا بس خطبتي! واول شتوية مع خطيبي واول عيد استقلال جنب خطيبي ، ومع خطيبي رمضان احلى ، وصبغتي اشقر وعملتي رجيم قاسي!

هسا سقتي فيها الراكزة!!! ولك قومي!

عليم الله الواحد بفوت ع اعرس ، بلاقي العروس متبسمرة بهالكرسي تقول تفتيش قمل بالمدرسة!

ولك قوومي ميلة اللي تميل بختك قومي اخلعي بين هالطاولات يلعن ابو اللي الو عندك ، ولك ارقصي حتى لو متجوزة بالديون والقروض قومي.


هههه معه حق
تُحف عمر زوربا

مكسل اقراه هههه

يعطيك العافية

اقتباس   المشاركة الأصلية كتبت بواسطة m0m3n مكسل اقراه هههه يعطيك العافية

@m0m3n
هههههههه
يقطع شرك
تستحق لقب كسول قلب فلسطين وبجداره

اقتباس   المشاركة الأصلية كتبت بواسطة نقاء @m0m3n هههههههه يقطع شرك تستحق لقب كسول قلب فلسطين وبجداره

هههههههههههههه
اصبري بس هرجع نشاطي

هههههههههه
رح تروح مع أمها العروسة على هيك
نهفة حلوة
يسعدك

كل بنت بتحب تعبر عن فرحتها على طريقتها
وتخطيطها لليلة عمرها
أنا مع البنت الهادية اللي بتأجل مظاهر فرحتها لجوزها
واللي بتكون ملكة الكل بيشوفها وبيحس برزانتها وعقلها
مش اللي ترقص وتتنطط وتكون خفيفة
لأن من وجهة نظري محدش له الحق انه يشوف مظاهر فرحتها
غير اللي اختارته شريك لحياتها
شكراً وثآق

مشان هيك خربانه خربانة ، ارقصي يا حصتي لانو جاييكي ايام اسود من قرن الخروب ��
يحرق حريشه عمر زوربا ما الزو
مش عارفه من وين بجيب كلام
هو كلامه تحشيش صح
بس انا ضد انا ترقص بهالشكل
الفرح بالقلب
والركازه حلوه
خير الامور الوسط
ترقص وتضحك وتنبسط
بس باعتدال

يسلمو ع النهفه وثاق

معك حق اذا كل هالحكي ما عملتوا بعرسها وقتيش بدها تعملوا ،
ما هم بكل الحالات راح يحكو عنها وعن عريس وعن كل شيء بالعرس ،
سواء كانت راكزة او عملت هيك ،
خليها تفرح وتنبسط وتخلي هالليلة ذكرى ما تنساها ..

حلو تفرح بس برضو يكون باعتدال

مش حلو تكون العروسة روشة وتنط من هين وهين

يسلمو حنين زوربا للنقل