الأربعاء 11/11/2020

#أخبار_عالريق 335
✅يكتبها/سعيد الطويل
■اليوم ذكرى استش.هاد رئيس فلسطين ورمزها ياسر عرفات ،بعد 16سنة بنقلك محتاجينك يا حج.
■اليوم حيشيعوا جثمان الدكتور صائب عريقات ويدفنوه بأريحا.
■الأردن ومصر والكويت والرئاسة ودحلان و7.ماس والجها.د والجبهات كلها نعت أبو علي عريقات.
■ استش.هد جوا سجن اليهود الأ.سير كمال أبو وعر،بعد ما أهملوه وما عالجوه.
■هيك بيصير عدد الأسر.ى اللي
استش/هدوا جوا السجن 226 بطل.
■وزيرة الصحة بتقول انه "إسرائيل" أصرت أنه يموت الأ.سير أبو وعر بالسجن ورفضت علاجه.
■البلد شكلها جاية ع تصعيد ،وفي ناس بتستنى فيه استني ،بس بظنش حد فاضي يصعد .
■الكورونا شادة حيلها عنا بزيادة والعينات العشوائية مملية البلد.
■مدير المستشفى الأوروبي بيقلك انه صار يوصل المستشفى حالات كوورنا من الشباب فش فيهم مرض قبل هيك ،لكن حالتهم بعد الكوورنا صارت صعبة وحطناهم بالعناية المركزة.
■المستشفى الأوروبي اللي بخانيونس تعبى بالمرضى تبعون الكوورنا ومضلش فيه وسع.
■عادل قبل اعتذار شركة جوال والموضوع تسكر.
■مباحث الكورونا سكرت 47 محل وحبست 16 واحد مخالفين التعليمات بغزة.
■كل سواق مش لابس كمامة أو الي راكبين معه مش لابسينها حيدفع خمسين شيكل مخالفة.
■وزارة المالية اللي برام الله وقعت اتفاقية بمليون يورو عشان يقدروا يدفعوا شيكات الشؤون .
■فش قرار بفتح صالات الأفراح عالأقل بهذا الشهر .
■الجو اليوم حيكون سقعة شوية زي ما حكوا بالأرصاد.
■مبارح مات بإيطاليا بيوم واحد بس 580 نفر .
■هيئة كبار علماء السعودية بتقول انه جما.عة الاخو.ان المسلمين ارهابية وملهمش علاقة بالاسلام.
■شب توفى من سلفيت بحادث سير مبارح بالليل وهو مروح عالدار.
■في حالتين كل وحدة بمكان وقعوا مبارح من فوق عمارات ووضعهم لسة صعب.
■اليوم حيصرفوا رواتب طموح 2 بكل مكاتب البريد بعد الساعة 11.
■البندورة والخيار صاروا الخمسة كيلو بمية .

#صباح_الخير لكل أم صحيت تلبس أولادها الصغار اللي بالابتدائية وتجهزهم للمدرسة وتحشيلهم خبزة وتعطيهم مصروفهم وتصغرلهم الكمامة وتعطيهم قزازة المية بأول يوم دوام لمدارس الحكومة من يوم ما أجتنا الكورونا .

#صباح_الخير لكل رب عيلة بيحب بناته زي أولاده وبيقصرش مع حد فيهم ولا بيفرق بينهم وبيجمعهم بالليل حواليه وبيشوف شو ناقصهم حتى لو معوش ولا شيكل .

#صباح_الخير للناس اللي بتأذيش حد وبتحكيش بظهر حد و موكلة أمرها لربنا من أول يومها لآخره ،ربنا يوقفلها اولاد الحلال ويجعللهم بكل خطوة خير وسلامة.

#صباحكم_خير_وسعادة 🌸
الأربعاء 11/11/2020

	السلام عليكم ورحمة الله وبركاته يسلمووووا ع النشرة الاخبارية المنوعة يعطيك الف عافية بانتظار جديدك دائما تحيتي

يسلمو ع متابعه الامير
الله يبعتلك ايام حلوه
و
سنين احلى

صباح الخير
كل الاخبار موت ووفيات ومرض ودفن
الله يفرجها ي رب
شكرا الامير

تسلم لنقل والمتابعه امير

شكرا على النقل