أخبار_عالريق

#أخبار_عالريق 298
✅يكتبها/سعيد الطويل
■المعبر مفتوح اله يومين للي رايح واللي جاي.
■سافر لحتى الآن سبعميت واحد من غزة.
■جاية اليوم موجة حر قوية حتضل عنا يومين ورا بعض.
■زي اليوم قبل عشرين سنة دنس المجرم شارون المسجد الأ.قصى،وطلع أبو عمار بقرار الا.نتفاضة.
■مات الولد ..رصاصة ..هذه الكلمة أول كلمة عرفنا منها بالاعلام انه في انتفا.ضة لما نشر تلفزيون فلسطين مشهد اعدام محمد الدرة وهو بحضن أبوه.
■تسع حالات حالات وفاة وستمية وعشرين حالة جديدة وفي فوق الألف حالة تعافوا من الكوورنا بفلسطين .
■حالتين ماتوا من الكوورنا بالعاصمة القدس أعلنوا عنهم مبارح.
■في كمان حالتين ماتوا برضه من الكورونا بغزة.
■توفى الشاب المغترب ببلجيكا أبو أنس ماضي وهو من مخيم الشاطئ.
■الجانب المصري أفرج عن عشر معتقلين بينهم وحدة ست وطالب طب.
■اليهود اليوم سكروا كل معابر القطاع بحجة الأعياد تبعتهم.
■احتمال كبير الأسبوع الجاي يفتحوا الجوامع بس بالوسطى وبجنوب القطاع.
■ماتياس شمالي بيقلك احتمال كبير منقدرش ندفع رواتب 30 ألف موظف للوكالة منهم 13 ألف بغزة.
■بكرة ان شاء الله حتنصرف رواتب السلطة بالضفة وغزة.
■لسة فش أخبار عن رواتب تبعون الشؤون الغلابا.
■وزارة التعليم بغزة صرحت انه حنعيد النظر بكل المناهج والكتب.
■أحمد مجدلاني بيقول انه الشباب هما مستقبل الدولة وعنوان المرحلة الجاية وبدنا نزبطهم بالانتخابات الجاية.
■هنية صرح انه قاعدين بنضغط انه نروح الصياد الثالث ياسر الزعروع سالم غانم.
■حسين الشيخ بيقول انه الحصار المالي الحالي هو عشان يجوعوا الشعب الفلسطيني ويستلسم وأوامره أمريكية.
■الرجوب حكا انه مصر معندهاش مشكلة عى التوافقات اللي شفتوها بين فتح و7.ــماس في تركيا.
■الدولار ب 3.46 اليوم بالبلد.
■المحكمة الرياضية أعلنت بشكل رسمي انه شباب رفح هو بطل الكاس.
■عدد وفيات الوباء بالعالم صاروا فوق المليون والإصابات 33 مليون وشوية.
■الهند بعتت شحنة مساعدات مرتبة النا.
■عشان ما ننساش الأ.سير ماهر الاخرس دخل بيومه ال64 وهو مضرب عن الطعام بالسجن.
■سمحوا انه نستورد البندورة لغزة ومبارح دخلت اول شحنة من مصر.
■أذربيجان أعلنت حالة الحرب على أرمينيا واحنا لسة مش عارفين مع مين فيهم حنقف 🙂.
■الملك عبد الله حل مجلس النواب الأردني.
■نيوكاسل يونايتد تعادل مع توتنهام بقون لكل فريق ،بالدوري الإنجليزي الممتاز.
■وكمان فريق هوفنهايم دخل أربع قوان في بايرن ميونخ بالدوري الألماني.
■وتعون أتلتيكو مدريد حطوا في غرناطة ست قوان نظاف مقابل قون واحد بالدوري الإسباني.
■الجاج بعشرة ونص الكيلو والخضرة سعرها مش مستتب كل ساعة بحال فش غير البتنجان اللي سعره زي مهوا.

#صباح_الخير اليوم خص نص لأهلنا المغلوبين على أمرهم اللي بيستنوا بقبضة الشؤون كل 100يوم وزيادة ،اللي الدين صار متلتل عليهم بالدكانة وكرت الكهرب مش عارفين يعبوه وجرة الغاز فاضية من اسبوعين ،والغسالة بدها تصليح وفش مصاري يعطوا الزلمة وضلت عنده من يوم الخميس اللي فات وبيمر عليهم يوم الجمعة زيه زي التلات ..الله يكون بعونهم ويفرج همهم ويرزقهم رزق واسع يارب.

#يسعد_صباحكم جميعا🌸
الاثنين 28/9/2020

ششكراا الكك
عووافي

تسلم على المتاابعه

ييسسلمموو
وردهه

	السلام عليكم ورحمة الله وبركاته يسلمووووا ع الاخبار المنوعة والمتابعة يعطيك الف عافية بانتظار جديدك دائما تحيتي

يعطيك الف عافية