#أخبار_عالريق 245

#أخبار_عالريق 245
✅يكتبها/سعيد الطويل
■شب من رفح اسمه ماجد أبو عرار شنق حاله بدارهم بالشابورة، وهذه الحالة الثانية خلال العيد...الله يرحمه.
■عالساعة تسعة بالضبط طلع صاروخ من غزة عاليهود.
■بعد شوية طلعت طياراتهم زي كل مرة تقصف المواقع وبعدها نزلوا البيان وكملنا سهرتنا عادي.
■ست ماتت مبارح من لدغة حية بالشمال.
■بنت صغيرة اندهست وهيا لابسة أواعي العيد بالنصيرات.
■أسعاف قلب 180درجة باللبابيدي وتصاوبوا كل اللي فيه ،والحمد لله هما بخير وسلام.
■اليوم آخر يوم بالاجازة وكله يتكتك أموره ويلم عزاله ويستعد لدوامه.
■دوام مدرسين الوكالة بعد بكرة.
■في الجولان اليهود أعلنوا انهم قتلوا أربع شباب حاولوا يزرعوا عبوة ناسفة عالحدود.
■بنت متجوزة اسمها ايناس المبيض من غزة ،مفقودة ومش مبينة من قبل العيد بكم يوم ،أهلها بلغوا الشرطة عن انها مختفبة ومش معروفة وين أراضيها.
■عدد مصابي الكورونا بالعالم صاروا فوق ال18مليون مصاب.
■المانجا الماية بخمسة شيكل الكيلو والخوخ الكيلو بينباع ب2 شيكل كان يزعق عليه بآخر الليل .
■الأفوكادو نزل بس لسة أعجر وغالي.
■عروض مراييل المدارس والشنط بلشت تنزل عالسوق والنت.
■بيقولوا الوكالة حتوزع دستات دفاتر عالأولاد بأول أسبوع حيداوموا فيه.
■الدولار نازله شوية ،اليوم سعره ب3.40.
■خلص موسم القناديل من البحر.
■كلها كم يوم وترجعوا للبامية والسلق وقلاية بالبندورة ،بعد الشوي والشلوحة.

#صباح_الخير للناس اللي انبسطت بالعيد ومفرقتش معها حاجة وأبسطت أولادها وطششتهم وفرحتهم ولو بكاسة برد.

#صباح_الخير لكل أب مخه موقفش تفكير ليل نهار كيف بده يسجل بنته بالجامعة ومعوش ولا شيكل ،ومن وين حجيب حق أواعي المدرسة لأولاده التانيين ،الله يكونله معين .

#صباح_الخير لطلاب الجامعات اللي بيستنوا بدوامهم استني خاصة السنافر الصغار ،اللي اشتروا جوالات جديدة.

#صباح_الخير للناس الطيبة أولاد الأصول اللي بتحب الخير لغيرها وبتتطلعش بعين الحسد لأي حاجة مش الها.

#صبااااح_الخير_والرزق🌹

يعطيك العافيه امير

يعطيك الف عافية