هي خلص العيد , و محداش طلب ايدي !

هي خلص العيد , و محداش طلب ايدي !
ولا حدا قلي أريدك عيدي القادم ! ولا وحدة قالتلي إنتي لإبني !!
مع إني من ليلة العيد ! قبل صلاة العيد حتى !
رحت عملت إعادة هيكلة لملامحي بالصالون ! دفعت الي فوقي و الي تحتي !

مشيت ع مبدأ الي بقدم السبت بلاقي الأحد , و فعلاً ! خمسة مسكوني بالصالون ! خمسة ! مسكوني مسكة الله لا يوريكو !
ايدين شغالات بشعري ! ايدين شغالات بوجهي ! ايدين شغالات بأضافري ! ايدين شغالات برجلي ! ايدين شغالات بس بحواجبي !
و نازلات نحت ! حفوني حف ! نتفوني نتف زي الجاجة !
حتى خلال العملية أكتر من مرة ينقطع عني النفس و أنا بين ايديهم ! أزورق و أصير ألاهث ! و أصير ألوحلهم بإيدي إنو يوقفو !
و فعلاً يتركوني دقيقتين أروق بعدين يرجعو يكملو المعركة !
قص شعر ! تريتمنت ! و صبغة ! و هايلايت ! و سشوار ! و واكس ! و سكرب ! و بدكير ! منكير ! تاتو حواجب ! و شوارب ! و تركيب رموش ! و عدسات ! و قصارة ! و سمنت ! و دهان !
نفضوني نفضة حسيت حالي مولودة جديد ! ساعة بس و أنا واقفة عالمراي و مدمعة زي البنات الي بتحولهم جويل !
روحت عالبيت حتى مشيتي تغيرت ! ايدي مش مسدق إنهم إيدي الي تحللو من جلي رمضان ! حتى ملمس الأشياء تغير ! قعدت ساعة أحسس ع باب السيارة !

دخلت ع أهلي قبل الفجر بشوي , إمي كانت بتعزل و بتسب ع حالها ! و أبوي بجهز حالو للصلاة و أخواني بتحممو !
فجأة بس شافوني إمي و إيديها بالهوا قاعدة بتدعي سكتت و صفنت فيي ! أبوي كان بوكل حبة معمول شرق فيها و فز من مكانه ! أخوي الصغير كان بغير بنطلونه شافني استحى و هرب جوا !
أبوي و هو ملخوم قلي " عفواً يا آنسة كنك غلطانة بالبيت ؟ "
قعدت ساعة أحلفلهم إني بنتهم ! ما سدقوني غير لما ورجيتهم الوحمة الي ع شكل قرد الي ع كوعي !

و ما خليت مكان يعتب علي ! صلاة العيد ! لفة القرايب ! جمعات العيلة ! جمعات الجيران ! أعمال خيرية ! طشات الصاحبات ! حفلات ! كافيهات ! مطاعم ! ملاهي ! اقتحمت كل التجمعات البشرية !
أربع لبسات غيرت ! كل لبسة أدندش من التانية !
روحت عالبيت ساعة و همة يطلعو اجري الورمانات من الكعب ! اخدوني عالمستشفى الدكتور منعني ألبس أحذية لمدة أسبوع ! ولا بتصير اجري بدها بتر !
مع هيك ما استسلمت ! اشتريت حفاي طبية و كملت مسيرتي و أنا بعرج بلكي حدا لفته إصراري ! و هي وجي الضيف !
هيني مزتوتة بالبيت و مش هاينلي أتحمم عشان تسريحة شعري كلفتني هديك الحسبة !

و ع قولة العم فيتالس برسوم ريمي , " لا يأس مع الحياة , ولا حياة مع اليأس " ,
ع العيد الكبير بإذن الله ! رح أضاعف جهودي , و أحقق هدفي , الله يقويني .

#صراع_التكاثر

هههههههههههاي
شو بتعئد حبيتهااا
قعدت ساعة أحلفلهم إني بنتهم ! ما سدقوني غير لما ورجيتهم الوحمة الي ع شكل قرد الي ع كوعي !
الله يسعدكك
جورياااتي

هههههههه
ان شاء الله ع العيد الكبير بتلاقي العريس
عسسسل هالبنت
يسلمو تشرين

ههههه الزواج رزق مهما نسعى له مابجي لنا غير بالوقت اللي ربنا رايده لحكمة لايعلمها سواه

بس حبيت الأسلوب الفكاهي اللي طرحت فيه القصة
دامت روحك المرحة

هههههههههههههه
يخرب عقلها
من وين بتجيب كلام
مش طبيعيه بجد
بس نهفه هالبنت من الاخر
يسلمو نبوضه يا عسل

اقتباس   المشاركة الأصلية كتبت بواسطة شــام هههههههههههاي شو بتعئد حبيتهااا قعدت ساعة أحلفلهم إني بنتهم ! ما سدقوني غير لما ورجيتهم الوحمة الي ع شكل قرد الي ع كوعي ! الله يسعدكك جورياااتي

الف شششكر ل حضضوركك الحلو

اقتباس   المشاركة الأصلية كتبت بواسطة شَغف ! هههههههه ان شاء الله ع العيد الكبير بتلاقي العريس عسسسل هالبنت يسلمو تشرين

الف شششكر ل حضضوركك الحلو

اقتباس   المشاركة الأصلية كتبت بواسطة آنثى إستثنآئية ههههه الزواج رزق مهما نسعى له مابجي لنا غير بالوقت اللي ربنا رايده لحكمة لايعلمها سواه بس حبيت الأسلوب الفكاهي اللي طرحت فيه القصة دامت روحك المرحة

الف شششكر ل حضضوركك الحلو

اقتباس   المشاركة الأصلية كتبت بواسطة نقاء هههههههههههههه يخرب عقلها من وين بتجيب كلام مش طبيعيه بجد بس نهفه هالبنت من الاخر يسلمو نبوضه يا عسل

الف شششكر ل حضضوركك الحلو

هههه
لو كان الموضوع بدو تشطيبات بس كان ماحد غلب هههه
هي نصيب بالاول والاخير
شكرا نبض