من نهفات جيل اليوم ..

- أنا اول مرة ارتبطت فيها كنت صف تاسع 🍼
و الحب كان أول ثانوي ، اتفقنا انا وياه نسمي ولادنا جود و ريان ، اسماء موضتها دارجة و شبابية بما إنو احنا جيل جديد و يافع و حيوي ،
كنت أنا لسا جديد مبلش يطلعلي حب شباب ، و أبو ريان سابقني شوي ، لإنو جبينو و منخارو مرشومين ،
بس كنا متشجعين لفكرة النمو معاً ، و النضوج سوياً ، 🌱
بس ما لحقنا كم شهر ، إلا أبوه لأبو ريان ( يعني حماي الأولاني ) ، صادر تلفونو لجوزي و حبسو بالدار عشان يدرس لتوجيهي ،
و آخر مسج كان من أبو ريان ، ( إم ريان حب حياتي ، استنيني ، ولا تنسيني ، راجعلك وحياة الخط الأخضر الي فوق شلاطيفي ) ،
بعدها مسجاتو نقطعت ، و اختفى عن الوجود ! 💔
أنا حاولت استناه ، ضليت ع ذكراه كم شهر ، بس بعديها بفترة ، تعرفت ع أبو آدم صدفة عالفيسبوك ، أبو آدم راسب توجيهي و مستنفذ حقو و قاعد بالبيت لا شغلة ولا عملة ، بس بكره الحياة و تعبان من فكرة الوجود و حبيبتو الأولى ميتة و بسمع أغاني لتامر عاشور كتير ، 💘
حكالي يا إم آدم أنا ما رح اقدر اجيبلك قصر ، و ألبسك حفر !
أنا في غرفة عنا عالسطوح ! و ازا بتحبيني بتصبري علي تا الله يقدرني و أدهنها و أركبلها باب ،
أنا بالاول ما كان فارق معي ، و كان كل همي الحنان الكبير الي بحتويني فيه ابو آدم ! و احساسو الرهيف الدافي ! و آدم ! 👪
بس لما مرت كم سنة و أهلي دخلوني الجامعة و كبر العالم بعيني ، بطل طموحي أبو آدم و الحمام الي ع سطحهم ! فبعتلو أنا معي مرض خطير و ما بدي احرقلك قلبك ، لا تبعتلي !
أصلاً هو متعود عالصدمات فمخفتش عليه ، ✋
بعد فترة وجيزة ارتبطت بأبو جاد ، ابو جاد كان بدرس بكلية الأعمال ، و بلبس شورتات ع قمصان مفصلة و موردة ، و شعرو كتير واقف مو شوي ، و لحيتو متناسقة و محددة !
كنت كتير طايرة فيه ! بس ع آخر سنة الي بالجامعة اكتشفت اني مو لحالي أم جاد ! بكل كلية في ام جاد مضحوك عليها متلي !
انكسر قلبي و اعتزلت الشباب ! اعتزلتهم تقريباً شهر و نص ، لإنو اجاني عريس عن طريق مرت بياع الدكانة الي بحارتنا !
و أنا حالياً أم مفلح ، الولد ع اسم حماي الرابع ،

منقول من صفحة لما صالح هههههه رهيبة هالبنت

هههههههههههههههه

هذا كل يوم بحب جديد

يعطيك العافية

قرأتها ع صفحتها

فعلا رهيبةةة


شكرا حنين