تفاصيل خطوبتي ..!

مقدمة

في ساعة متـأخرة من أحدى ليالي الشتاء البارده رجعت للبيت ولقيت ابوي وأمي حفظهم الله قاعدين عند التلفزيون ويتابعون لهم فيلم لعل يجي فيه لقطه تهيظهم ، دخلت عليهم وسلمت ولا رد احد منهم طنشتهم واندمجت مع الفلم قام ابوي ومسك جواله وخذ الريموت وحط التلفزيون على قناة روتانا وقعد يكتب بالجوال رساله وشوي الا اقرأ في الشريط اللي تحت حق الرسايل ، قلبي انت يا لابس الاحمر نروح ننوم ، شوي الا امي ماخده جوالها وكاتبه يا لابس العلاق وشورت الاوميك ياللي ما يطلع في صدره شعر يابو فيلسوف يابعد قلبي اصبر شوي الين يروح يرقد هالثور اللي جنبي ، قام ابوي وكتب طيب افرضي انه ما نام الا الفجر بنقعد نساهره ، اخذت جوالها وتوها بتكتب ، قلت هاااااااااااااااه انتي واياه 200 مليون عربي دروا عنكم ، قم رح انت واياها فضحتونا الله يفضح عدوكم
^
^
^
^
ترى الموضوع بيصير مثل ذا المقطع اللي فوق ،،، يعني لا تستغربون اذا لقيتوني ( اتمايل ) !! <<<< من فوائد مجالس الشيّاب

يتبع ..>>>

هذي يقالك مدخل للسالفة ،،

قبل فتره اتصلت عليّ امي وقالت كيفك فيلسوفوه.. ؟
قلت بخير يا ميمه.
قالت يقولون انك عقلت امس !
قلت انا من يومي عاقل بس محد معطيني وجه
قالت خل عنك الهبال وتعال الاربعاء القادم ابيك في هرجة رأس !!
قلت فديتك ولا يهمك اطلع من الدوام يوم الاربعاء ولا اغسل يدي الا عندكم >> شغال في مطبخ
وجاء يوم الاربعاء ورحت يم اهلي في القرية وبعد الاستقبال والسلام جلست مع امي قالت ياوليدي ما ودك تكمل نص دينك .. ؟
ما خلصت كلمتها الا وانا ناقز أحبها فوق رأسها .. الا ودي ونص وثلاث ارباع، قالت اركد والزم الارض هذا وانت طالع لك ضرس العقل .. فشلتني واستحيت وجلست وانا عيني على الارض ..قالت خلاص روح غرفتك وانا بكلم ابوك واشوف وش يقول .. قمت وحبيت راسها ورحت غرفتي .
وعقب المغرب نادتني وانا خارج وقالت وش نويت عليه ياوليدي يا فيلسوف ؟
قلت بروح امر واحد من الشباب وبنروح السوق ..!
قالت ياملكع انا اقصد مستقبلك وش نويت عليه ؟
قلت ناوي ادور لي شغل بعد الظهر
قالت وجع يوجعك انت ما تترك ثقالة الدم ..اقلك وانا امك كلمت ابوك يخطب لك فطوم بنت الشيخ حمد !
وشهوووووو فطوم فطوم ماغيرها ..!
قالت ايه فطوم ماغيرها .
ليه يايمه قلّو البنات ..؟
قالت فطوم تسواك وتسوى اهلك بعد .. انت تطول حتى ظفرها ..
وفطوم الحين مزيونه وتجنن وتهبل وخطابها كثيرين وزين اذا وافقت عليك !!
قلت يعني الحين فطوم صارت مزيونه ..؟
قالت ايه وان شاءالله بس توافق عليك .
قلت يارب توافق لاني احب فطوم من الطفولة ..
بلا نصب انت وخشتك توك تقول انك ما تبيها ..!
يايمه انا اتذكرها من زمان كان وجهها كنه مخطط وخشمها كنه جرّة ...والحين تقولين حلوه ..يمه انا ابيها واحبها توسطي لي عندهم تكفين .
قالت طيب.. يوم الخميس بنروح نشوف اهلها ونخطبها لك ..



يوم اجى الخميس راحت امي وابوي يشوفون فارسة احلامي وأنا كنت انتظر على احر من الجمر رجعة الوالدين حفظهما الله من المدينه
وانا متضايق ورحت لعشة الحمام وامسك لي فرخ وانتفه واقول بتوافق مهيب موافقه ، بتوافق مهيب موافقه ، بتوافق مهيب موافقه ، شوي الا صوت سيارتي ابوي واجيك نازل مع الدرج انا اذكر ان درج بيتنا حوالي 32 درجة << هذه ضروس مهيب درج ، بس ذاك اليوم صاروا ثلاث بقدرة قادر ، والقى الوالده يخليها ربي توها بتدخل البيت ، قلت هاه وش قالت وافقت عسى ما قالت ابشوفه قالت امي اصبر شوي خلني ابفصخ عباتي واصفطها لاني مطيبته بدخون عندهم وش زين ريحه وعطني التلفون خلني اكلم ام دحيم اعلمها اني ذقت الكيوي الي يقولون ، قلت ياميمتي والله انتي فاضيه البنت وش قالت عساها وافقت بدون شروط قالت امي ايه وافقت لكن بشرط انها تقابلك وتجلس معك وتسألك اسئلة وعلى ضوئها ، كأني قلت على ضوئها ياربيه احس ان لساني انطلق عقب هالكيوي ، تقرر هي توافق والا لا ، قلت طيب ياميمتي معزمه هي ، قالت مرررره هذا شرطها وتقول بعد لازم يكون هالكلام بعد يومين ، بس وش هالبيت عندهم من كبره وشجر وهالسناميك تمشي على سناميك ، قلت لها وشو سناميكه يابنت الحلال هذا اسمه سراميك ،المهم البنت زينه ، قالت يقول زينه ياولدي هذه البنات مهوب بناتنا في هالديرة ما تفرقهم عنكم الا بالصلاة في المسجد ، هذه طول وعرض وشعر وخشيم وعيون وثويمها كنه شق في وجها مهوب مثل مرة اخوك وبراطمها كنها عاضة عقال ، قلت يمه بس ترى ابتغر انا ما اتحمل ، قالت لا اجل لو تشوف حمامهم والله انه ازين من حجرتي ، يمه الحين اقول علميني عن البنت وانتي تقولين حمامهم زين ، اقول وين ابوي هو الي بيعلمني بكل شي ، وشوي الا هو داخل قلت هلا والله هاه يابوي وش رايك قال والله لو تشوف مغاسل الرجاجيل قلت ياربيه هذه غلطتي اني ما رحت معكم ، بس يالله تقول بعد يومين بتقابلني مهيب مشكله اقابلها بعد يومين وش يصير

يتبع >>>>

\
بداية المقدمة ما الها علاقة بالموضوع وممكن نستغني عنها
لكن تفاصيل الخطبة بجزئها الاول حلوة وضحكتي نهايته
بانتظار باقي القصة ..
يعطيك العافية وموفق بكتاباتك ..

ههههههه حبيت و جداً

* هاي قصة طويلة يعني .؟
* فيها جرأة متل البداية و لا لأ .؟
* اللهجة هاي للبدو صح .؟

صح ما فهمت كتييير كلمات
بس حبيت القصة و الله
ممكن لو تكتب بالفصحى تكون اسهل للقرّآء
بس مع هيك انا رح كون من المتابعين اكيد


دخيلك فسرلي هالمقطع ( هذه البنات مهوب بناتنا في هالديرة ما تفرقهم عنكم الا بالصلاة في المسجد ، هذه طول وعرض وشعر وخشيم وعيون وثويمها كنه شق في وجها مهوب مثل مرة اخوك وبراطمها كنها عاضة عقال ، قلت يمه بس ترى ابتغر انا ما اتحمل )

هون بتشكر فيها و لا بتذم فيها هههه .؟
ما فهمت و الله


رائع رائع
تقييمي فيلسوف

المهم يوم الخميس العصر وانا في القرية وعند ميمتي تلقنّي بعض النصائح السديدة واقعد اتطيب وامي تبخرني وتلبسني الثوب وامطخها ببوسه على راسها وهي تدعي لي بالتوفيق .. وامر على ابوي وانسدح عن رجوله واقول سامحني يابابا .. ويرفسني برجوله وقال وجع وين انت رايح وراك تقول هالكلام ...قلت عفواً يا ابتي انني ذاهب الى المجهول ..وتخبرني يا أبتي قليل خبره ..والملعون شكسبير يقول لا تطلب الفتاة من الدنيا الا زوجا ، فأذا جاء طلبت منه كل شي !! وأنا خايف يابابا ..
عندي فكرة يابويه .. وش رأيك تتصل على أبوها وتخليه يجيبها ويجي ..؟
قال أبوي .. وحسافة التربية فيك يالسربوت..أقول تكلم زين ولا تفشلنا مع البنيه واهلها وخلك ثقيل ولا تضحك كثير ..والله يوفقك ياوليدي ..وتصير هالبنيه من نصيبك ..!
وامطخة بحبة على خشمة وادرعم على بيت أبو فطوم ..
ووصلت بيتهم ودقيت الجرس الأ وابو فطوم يفتح الباب قلت له انا زوج بنتك الي مابعد اعرست عليها ، قال قصدك بانك انت من خطب ابنتي واليوم موعد مقابلتك معها قلت له ( يس ) على بالي فصحى قال تفضل وادخل معه وقال لي تصدق يابني انني لم ارى في حياتي قط وقاطعته وقلت وين بتشوف قطو فيه وهذا بيتك تعال عندنا في الديرة من درجة الميانه بينا وبين القطاوة نسلم على بعض ولو انك في السيارة تدق لها بوري ، قال لي عن ماذا تتكلم ويحك ، قلت له لا مو لهذه الدرجة انه يحك لك ظهرك الا كانك مربيه من يوم انه صغير وناظرني شوي وقال ثكلتك امك ، قلت له اسكت ياخال مابقي الا هي الي ما كفلنني والا كل هل الديره كافليني ، وتبسم وقال ساقوم بتغيير ملابسي واعود اليك ، قلت له خلنا نشوفك عاد ، قعدت شوي لحالي الا وشوي الا هو راجع تقهويت انا واياه ، واسمع صوت جرس الباب جاء بيقوم يفتح الباب واحلف عليه انه ما يقوم واروح وافتح الباب والقى فلبيني مع اكل واخذه وارجع لخالي << يمون ، وقال من يكون ، قلت هذا فلبيني يوزع عشاء والديه ، قال يا ابني هذا اسمه التوصيل المجاني هل اعطيته فلوس ، قلت له لا << ما معي اصلن ، وقام وحاسبه ، بعد الغداء بشوي دخلت علينا بنت في المجلس والا وش اشوف ، وش هالامل كانت لابسه بنطلون ضيق مرررررررره وبلوزه بيضاء وعدسات لونين وقالت مساء الخير واقوم اشاهق واتكلم تسني بزر يتسبح في برد ، بس فهمت اني اقصد مساء النور ، شوي وقام ابوها وقال ادعكم لوحدكم لكي تخططوا لمستقبلكم ، قلت أي ياشيخ من اول ، وقالت لي وش تشرب ، قلت لها عصير ( قها ) << قديم مرررررره وينفتح بمفتاح الصلصه ، قالت وشو هذا يعني منجا ، قلت منجا منجا اتصلت بالتلفون وقالت عطونا عصير منجا، شوي وتدخل الشغالة علينا واقوم والقط راسها على انها خالتي ، وقالت وش فيك هذه الشغالة ، قلت عادي احنا في ديرتنا نحب روس الشغالات علشان ريال << العن ام الي ما يكمل دراسته يا شيخ ، قالت المهم ودي ابداء معك المقابلة بس قبل ما نبدأ وش رايك في لبسي قلت منتاز جدن بس لو تلبسين ملابسك احسن من انك تكشخين بملابس اختك الصغيره << أسلوب شريطي ، قالت وش تقصد قلت البنطلون هذا ضيق مررررره ، قالت ليه انت ما تعرف الاسترتش قلت الا والله بس اذا ضغطت المربع بقوه طارت الكورة فوق << على بال امه انها تكلم عن البلاي استيشن ، قالت طيب ابروح البس شورت وش رايك ، قلت لها تلبسين شورت اجل شورتك وهداية الله ، شوي ودخلت علي وقالت تعال هنا قلت والله ما اقوم <<< هذا عيب الي يلبس سروال قطن وهو رايح يشوف خطيبته ، شكلها فهمتها وقالت براحتك ودي ابدأ المقابلة معك ، قلت تفضلي قالت انا اسمي امل وشهادتي ماجستير في علم الاجتماع قلت انا فيلسوف جوالي استقبال فقط ومعيد ثالث ابتدائي يعني تاريخ وجغرافيا لاتسأليني ما خذناها ، تبسمت وقالت ما يخالف نبدأ قلت على بركة الله قالت كم راتبك قلت الف قالت ايش ، حسيت انها زعلانه ، وقلت الف وادور هاليومين على وظيفه احسن من وظيفتي يعني بيصير راتبي فيها سبعه الاف <<< تسذوب ، قالت فيلسوف قلت لبى قلب سخانتكم ، قالت انت الحين تعرف انه لازم ان نقاطع المنتجات الامريكية يعني مثل الماكدونالديز وش رايك ؟ قلت شوفي اذا هي في استراحة ومع شباب تعرفهم انا ما عندي مانع <<< احسبها تحسي عن الويك اند ، كتاب تعلم اللغة الانجليزية في اسبوع حاسني . ناظرتني شوي وقالت طيب باين انك رومانسي انت تعرف نزار قباني ؟ قلت والله شوفي الحنفسان انواع والقبان هذا اصغر انواعه وشلون عاد اذا صارت نزرة قبان وش بتجي << واحط رجل على رجل واثق الولد ، قالت طيب الدول الاسكندنافيه وش رايك فيها ؟ قلت والله مع العلم انه يجيب لي حرقان لكن نسكافيه مع الحليب عادي اشربه قالت طيب الجغرافيا هذه ابد ما تعرفها قلت ابد ، قالت حتى المناخ قلت لا المناخ اعرفه يصرف لنا ثلاثة الاف ريال كل سنه لكن ان شاء الله بيضيفنا ابوي معه وابشرتس بتصير تسعه ، قالت وش رايك في العولمة ، الاخيره هذه لخبطت ابو جدي وحسيت اني حست الدعوة كلها قلت لازم اصرف الموضوع ، قلت عن اذنك الحمام واقوم واروح للحمام وشوي الا القى في رجلي قطعة زوليه فخمه مررررررره كانت في المجلس اثرها نشبت في الشقوق الي في رجلي وسحبتها معي ، رجعت للمجلس ولا لقيت احد في المجلس وانتظر الى اذن العشاء ولا احد دخل علي وشوي الا الشغالة داخله علي ومطفيه انوار المجلس وافهمها وارجع لبيتنا .
تدرون وش صار ........ الغريبه انها وافقت لانها تقول لازم يكون لي دور في المجتمع وبينفعني هذا في تحضير شهادة الدكتوراه وابيه قريب مني ، وابشركم العرس بعد كم شهر بس شارطين اني اسكن معهم وانا متردد . هاه وش رايكم اخذها واسكن عندهم والا وش تقولون

اقتباس   المشاركة الأصلية كتبت بواسطة الصياد \ بداية المقدمة ما الها علاقة بالموضوع وممكن نستغني عنها لكن تفاصيل الخطبة بجزئها الاول حلوة وضحكتي نهايته بانتظار باقي القصة .. يعطيك العافية وموفق بكتاباتك ..

شكرا لأهتمامك ومشاركتك

اقتباس   المشاركة الأصلية كتبت بواسطة البريئة ! ههههههه حبيت و جداً * هاي قصة طويلة يعني .؟ * فيها جرأة متل البداية و لا لأ .؟ * اللهجة هاي للبدو صح .؟ color="red"]شوفي كل بدايه ولها نهايه .. وكل نهايه ولها بدايه <<< وكل تبن ولاتسوي فاهم اصرفلك لذلك فأن الشخص الطبيعي ينولد تحت اثار فسيولوجيه تنم على طبيعه الشخص ربما يكون هادئ وربما يكون عصبي وربما يكون عاقل وربما داشر وربما وربما وربما اما انا فان طبيعيتي منذ الطفوله لم تنم على ذلك البته بل تنم على ثواره ودلاخه وعدم احساسي بطفولتي الكامله من يوم اني في ظهر ابوي كنت احس اني دلخ الناس تقعد في الفقره الرابعه من العمود الفقري وانا جالس في الحوض ابي ادحدر بسرعه وهذا اكبر دليل ثاني يدل على اني مخ فاصل ومضروب ..وكانت البداية كذا [/color] صح ما فهمت كتييير كلمات بس حبيت القصة و الله ممكن لو تكتب بالفصحى تكون اسهل للقرّآء بس مع هيك انا رح كون من المتابعين اكيد هذا اللي لاقالولك فيلم هندي بس بالطبيعه دخيلك فسرلي هالمقطع ( هذه البنات مهوب بناتنا في هالديرة ما تفرقهم عنكم الا بالصلاة في المسجد ، هذه طول وعرض وشعر وخشيم وعيون وثويمها كنه شق في وجها مهوب مثل مرة اخوك وبراطمها كنها عاضة عقال ، قلت يمه بس ترى ابتغر انا ما اتحمل ) هون بتشكر فيها و لا بتذم فيها هههه .؟ ما فهمت و الله هو الشرهه مو عليك على اللي كاتب الموضوع افتهم شيء..حتى انتي تفهمين كح كح بمزح هذه قاعده تمدح فيها .. رائع رائع تقييمي فيلسوف

تسلمين لنا دوم وعسى هالابتسامة ما تفارق خشيشتك << عنده اسلوب بس ظروفه