أخبار_عالريق

#أخبار_عالريق 538 يوم
✅يكتبها /سعيد الطويل
■بصراحة تغير كل مود النشرة اليوم ،من كثر الأخبار الصعبة والأحداث إللي فيها ،فكرت القصة حتكون ع قد المدارس ورجعة الأولاد عالدوام،طلع الوضع اليوم مختلف عالآخر.

وأول حاجة الله يصبحكم بالخير ..
■في 3 شهد اء بعز شبابهم ارتقوا فجر اليوم برصاص اليهو د في مخيم جنين .
■القوات الخاصة اقتحمت المخيم والأبطال اشتبكوا معاهم وربنا اصطفاهم بهذا اليوم المبارك
■قبل الفجر بشوية وقع راجل هو وبنته الصغيرة من فوق عمارة بالخليل وماتوا عالمطرح ،الله يرحمهم.
■واحد طعن أخوه وقتله بطوشة برضه بالخليل .
■مبارح طبعا جما عة طالبان صلوا العصر في القصر جوا كابل ،بعد ما شرد الرئيس أشرف غني وفكح.
■ارتفع عدد القتلى بانفجار تنك البنزين في لبنان لأكثر من تلاتين نفر وعشرات لسة بالمستشفيات.
■حرايق كبيرة جدا صارت مبارح بجبال القدس وأحراشها وربك ستر،سيطروا عليها
■طبعا اليوم أول يوم دوام بالمدارس بعد غياب سنة كاملة مرحوش فيها الأولاد ولا يوم عشان الكور ونا .
■الشرطة بتقول انه نسبة الجريمة ارتفعت بفلسطين وصارت تقريبا 70%.
■في سلفيت سكروا منطقة كاملة اسمها الزاوية وممنوع تنفتح صالاتها ولا جوامعها عشان انتشرت فيها الكو رونا.
■نسبة الكو رونا ارتفعت عنا من أول وجديد
■رواتب المتقاعدين صارت بعلم الغيب ،والسلطة بتقول عنا أزمة بالمصاري.
■ع فكرة الأزمة بس هذه موجودة عند موظفين غزة.
■الوضع واقف ع نكشة واليوم بتوقع الأمور تبلش تتصاعد شوية شوية عشان اليهو د معندين بقضية المنحة بالذات.
■فش منحة ولا شؤون لحتى الآن،والله يكون بعون الغلابا.
■بكفي أخبار لعند هان بدناش ننكد عليكم بزيادة ،عارف فش ولا خبر كويس .

#صباح_الخير رغم الوجع لجنين وأبطالها وناسها وصغارها وكبارها ،لكل واحد بيرضاش عالذل فيها ،ولكل واحد حمل برودة ودافع عن شرفها وكرامتها.

#صباح_الخير لكل أم صحيت من الفجر عشان تجهز أولادها وبناتها وتمشطهم وتلبسهم وتفطرهم و تحشيلهم الخبزة وتزبط أمورهم وتوصلهم للمدرسة كمان.

#صباح_الخير للبياعين أصحاب البسطات اللي قدام أبواب المدارس وخص نص لأم عماد الست الطيبة إللي بتبيع عشان تقدر تكمل حق ايجار دارها

#صباح_الخير للناس اللي طلعت توجيهي السنة ،ربنا يفرحكم ويجعلها سنة خير عليكوا وعلى أهاليكم.

#يسعد_صباحكم
لو وصلتكم النشرة صبحوا علينا الله يسعدكم🌹
الاثنين 16-8-2021