أخبار_عالريق6️⃣3️⃣0️⃣6️⃣

#أخبار_عالريق6️⃣3️⃣0️⃣6️⃣
✅يكتبها/سعيد الطويل
■الكورونا شادة حيلها شوية بغزة وعدد الحالات بزيادة اله من مبارح لهلحين.
■شكلها الداخلية حتشدد الاجراءات شوية بخانيونس وغزة اذا ضلت الأمور زي هيك.
■ مدير الطب الوقائي بغزة بيقول انه ممكن نوصل لتسكير قطاع غزة من أول وجديد اذا ضل عدد الاصابات يزيد
■ بالضفة لحالها 10 حالات وفاة و329 إصابة جديدة بالأربعة وعشرين ساعة اللي راحت.
■ستة وأربعين حالة موجودة بغرف العناية المكثفة بفلسطين من الكوورنا.
■الرجوب صرح انه اتخذنا قرار بنصير بعده ملناش بكل الاتفاقيات مع اليهود.
■ ماهر الأخرس اليوم صارله 73 يوم بيواجه الموت لحاله بالسجن، ومحدش مدور عليه ولا في مسؤول حكا بقضيته زي الخلق.
■الاحتلا.ل أفرج مبارح عن الأ.سير محمد شكري صالح البابلي عمره"49 سنة" من النصيرات بعد ما قضى17 بالسجن.
■مظاهرات طالعة نازلة ضد نتنياهو منكدين عليه عيشته.
■بعد فلسطين وقطر ..ليبيا قالت بدهاش تكون رئيسة الجامعة العربية هذه المرة.
■ توفى الشب الغلبان مبارك عثمان فؤاد محرم عمره "31 سنة " وهو بيلقط عيشه وقع من الطابق الثالث.
■الشؤون الاجتماعية بدها تقدم مساعدات طارئة للمرضى
■سلطة الطاقة وافقت على العرض اللي قدموه تبعين اتحاد المقاولين عشان يبيعوا الكهرب التجارية ب2شيكل .
■حيصرفوا مخصصات جرحى وشهد.اء مسيرات العودة اليوم بالبريد وحيكملوا صرف ال100دولار تبعت العمادي كمان.
■الصحة العالمية بتقلك فيه لسة أمل انه يوفروا لقاح لفيروس كورونا آخر السنة.
■تسعة وتسعين بالمية من حبايبنا بالجزائر بيرفضوا اعتراف بلادهم "باسرائيل" بآخر استطلاع رأي عملوه.
■برفح مسكوا تقريبا نص طن لحمة فاسدة بالسوق المركزي.
■الجها.د الاسلا..مي بيقول انه احنا بنرفض نشارك بأي انتخابات تشريعية أو رئاسية .
■ال‏وكالة الأوروبية منزلة ع موقعها انه
شهر تسعة 2020 اللي راح هو أكثر شهر كان شوب بكل العالم.
■فتحوا سوق حي الأمل بخانيونس .
■البندورة الها كم يوم سعرها زي سعر التفاح يخوي.

#صباح_الخير لطلاب الجامعات الجداد "السنافر" اللي مشفوش لسة ولا يوم حلو بالجامعة وع وجهم سكرت البلد ،ولا حضروا ولا محاضرة ولا أكلوا أندومي من قدام باب الجامعة ولا حتى طلعوا بالباص وشافوا نهفات الصبح ومقضينيها محاضرات وملازم عالنت ..بكرة بتفرج وبتفتح وبترجع تاخذ مصروفك وتجمس وتتشيكي وتروحوا عالجامعة وتكيفوا وتتصوروا كمان ان شاء الله.

#صباح_الخير لمصورين حفلات الشباب ومصورات الأفراح الجدعات وتبعون الصالات والبياعين اللي بيكونوا قدام صالة الفرح وتبع الاستريو اللي وقفت الكورونا حالهم وضربت موسمهم ..بس تفاقيد الله رحمة ..بتفرج ان شاء الله.

#صباح_الخير للدكاترة والطواقم الطبية واللي بيشتغلوا بالمختبرات اللي ماخذين القصة ع نفس واحد ومرتاحوش بشغلهم والغلطة عندهم مش زي أي غلطة ..ربنا يحفظهم ويحميهم.

#صباح_الخير لكل بياع بيحط مخافة الله بين عنيه وبيزودش بالسعر عالناس ولا بيطلع بضاعته المضروبة عشان ينفقها وبتفرقش معه تنضر الناس ولا متنضرش؛ربنا يباركله بماله وعياله.

#يسعد_صباحكم بكل الخير وراحة البال 🌸
الأربعاء 7/10/2020