من تحتّ خيمتنآْ

شهر و سنة عم تمرق الأيام
و الليل باكي فوق خيمتنا
وأطفال تحت البرد عم بتنام
خيمة و ريح الظلم عصفتنا .. خييّ
و جدي مريض بتوكلو الأسقام
أختي و أنا بنلوك دمعتنا
أمي حزينة دموعها أرقام
أرقام تحكي بعد نكبتنا
تحكي عن المعراج يا إسلام.. خييّ
عن مهد عيسى و عن كنيستنا
و تحكي عا جور خوالنا و عمام
وتسكب ملح عا جرح طعنتنا
لوحات .. تعجز ريشة الرسام
بعد و دما و دموع عيشتنا
نحنا يا أمي بذل ما بنام
ورد الردى و الفدى عادتنا
لازم نفجر حمم من الخيام
و نسمع التاريخ صرختنا .. يا أمي
واحنا ياامي للوطن إعلام
من دمنا بنكتب قضيتنا
و ياامي أنا دمعة من الأيتام
و نوح الحمامة فوق تينتا
وشبابة الراعي ورى الأغنام
وعنة عتابا فراق ديرتنا .. آه يا امي
و تنهيدة الحصاد تالي العام
و موال من رجاد حقلتنا
وفية زيتونة معبعبة الكمام
وريحة خبز طابون حارتنا .. آه يا امي
و يا امي أنا صرخة "دلال" تصارع الإجرام
عا أرض حيفا و حد طيرتنا
و زئرة فدائي فجر الألغام "بسافوي" حتى الناس سمعتنا
قومو اسئلوا العرقوب و الخيام
"تبنين" تتغنى برجولتنا
فينا الكرامة تزايدت اكرام
الأغوار عم تبكي عا سيرتنا
اعتز المجد فينا و عملنا وسام
تا يعلقوا في صدر امتنا
ياامي كفانا نعيش بالأوهام
كذب و دجل ووعود حاجتنا
حاجتنا نشكي الظلم للظلام
ونبوس الإيد اللي ذبحتنا
ياإمي كفانا نعيش بالأوهام
ما عاد بدها شرح حالتنا
بدها برودة رصاصها الأقلام
و القنبلة توقع شكايتنا
بدها رجولة و تضحية و إقدام
بدها عروبة تصون دولتنا
بدها عروبة تحطم الأصنام
و تشيل الخاين من عروبتنا
و القاهرة ترجع لأرض الشام
و تقول يا احباب الوفا
عودو بعز و شرف يا طيب عودتنا