شعب ما بتراهن عليه

شعب ما بتراهن عليه

- عمري ما شفت أغرب من التناقض الموجود بغزة :_
تدخل مطعم فاخر تفكر غزة سنغافورة، تمر من عند بسطة طحل تقول الناس جعانين !
- تشوف السيارات داخل غزة المدينة تقول أنه احنا ما بنركب إلا موديل السنة، تمر من عند الترنس في مخيم جباليا وتشوف سيارات خط تل الزعتر بتفكر أنه تجمع لسيارات الخردة من أجل كبسهم !
- تدخل كفي شوب تستريح من شغل اليوم تشوف المكان زي الخمّارة وضباب الدخان مالي المكان، تروح تصلي في الجامع تلاقي الشباب قاعدين في حلقات بيقرؤوا وبيحفظوا القرآن !
- شاب ع قد حاله بحب بنت أهله بيرفضوه لأنه ع باب الله، بس لما ييجي فلان ابن العيلة الفلانية ويصف الـ BMW ع باب دارهم أهلها وهم مغمضين بوافقوا حتى لو أخلاقه اسوأ ما يكون !
- بتشوف الفنادق وطبقة الناس الوافدة إليها بتقول أنه غزة مليانة برجوازيين، في نفس الوقت خدلك لفة في أحد مخيمات اللاجئين بتتفاجئ من حجم البروليتاريا !
- إذا حكيت كلمة الحق بتتبهدل من السلطات وإذا سكتت الناس بتحكي عنك جبان !
- بعضنا يحلم بمستقبل باريسي وواقعه صومالي !
- تشوف كمية الناس عند أبو السعود كيف هاجمين على النابلسية بتظن أنه الوضع لوز والناس من فرحها نازلة تتحلى، بتشوف المناشدات على الفيس بوك لأسر مستورة بتنصدم من الواقع الموجع المرير !
- الناس في تعاملك معهم بتحسهم أنبياء أو ملائكة في خلواتهم هم ألعن من شياطين الجن !
- شرطي ما بيتقاضى راتب ممكن يقمع مجموعة شباب نازلين ليطالبوا بحقوق شعبنا ومن ضمن هالحقوق هو راتبه المقطوع !
- لما تشوف الناس هاجمين على حسبة السمك و meat city بتقول أوف هذا كل الشعب صحي وبيأكلش إلا الطازج، في حين أنك قد تنصدم من حجم إقبال الناس على سوق لبد للمجمدات وشركة شاكر حرب !
- من شدة التناقض بطّلنا نعرف نميز بين أي شيء ومش فاهمين أي شيء والواحد صار عايش زي الأطرش في الزفة !

و هالتناقض من وين اجا غير من سوء الحال
و ضيق المعيشة و الحكم الجائر
ربنا يصلح الحال
كلام واقعي جداً
شكراً مؤمن

طرح رائع ومميز
يعطيك العافية
يسلمو دياتك

الا شعب فلسطين هو يلي بتراهن عليه

وحال الناس يكوون هيك سنة الحياة

يسسلمو للطرح