اخدتك و قلعت عيون الكل

بعيوني اللي بدو يوكلهم الدود ، إن شاء الله انطس بنظري اذا بكذب ، وانا فاتح الفيسبوك ، وعيني بتضرب يمين وشمال ، شفتلكم التالي :

وحدة منزلة صورة جوزها من عرسهم ببدلة العرس ، متجوزين جديد الهيئة ، كاتبة تحتها ( بحبك ، اخدتك و قلعت عيون الكل )

اول اشي حابب اقول سلامات للصبايا اللي تقلعو عيونهم ، و إن شاء الله اكبر المصايب ، معلش الله الشافي !

هسا تعالي جاي ، شو العرس الدموي اللي كاينه عامليتو ، مش عارف ليش حسيت بفقرة تقطيع الكيك ، كاينه ماسة السيف وبتقلعي بعيون المعازيم ، والدم للرُكب ، شو حفلة التقليع هاي؟!

اه ولا قصدك مجاكرة؟! ولك يا بنت الحلال هو حدا سائل؟! الدنيا رمضان والواحد عايف حالو ، همه فاضيين يفكرو فيكي وبعرسك وبمين اخدتي!
مين قصدك؟ صاحباتك؟! ولك صاحباتك ، اكثر وحدة بتفكر فيكي منهم ، وجبة الشاورما عندها اهم منك ومن عرسك ومين عريسك النظوة !

ليكون قصدك اختو اللي رافضيتك اصلا؟! اذا قصدك عنها ، ف حابب ابشرك انك داخلة ع معركة ، لانها اكيد شافت الصورة وهي بتوكل حبة قطايف ، تركت حبة القطايف وحلفت مليون يمين ، وقالت وحياة هالنعمة اللي بإيدي ، اللي اخليكي تندمي عهالجيزة يا ام شعر كاتت ، ولك مهو الحق مش عليكي ، الحق ع اخوي الهامل ، مش عارفه شو اللي عجبو فيكي ، ولك رموشك شاريتهم من النت!

والله لو ماخده جبل شيخ الجبل مهو هيك ، ولك قلعتي عيون مين بمين يما؟! هو انتي متجوزة شوكة؟ ولا إبرة صوف؟!
اسكتي ساكتة ، ولا قلعتي عين حدا ، اصلا ريحتي امك منك ، وريحتي اختك من النومة معها بنفس الغرفه ومن مكالمااتك مع خطيبك اللي نصها كذب وعياط و اذا ما تسحرت ما بتسحر ، ويلا نسكر الخط مع بعض!

وصاحباتك اصلا خلصو منك و من تهربك الضريبي عند كل قعدة بكافيه ، بكفي انك طلعتي من جروب الواتساب اللي كل يوم كنتي تبعتي عليه صورتك مع خطيبك ، والهدايا اللي بجبلك اياهم ، اللي اغلى اشي فيهم ملقط حواجب من ابوال ٣ بليرتين ، و من صور حسبي الله ونعم الوكيل ، وصور الحسد والنق !

بعد الصورة هاي يا حصتي ، قلعي شوكك ب ايدك ، وتلقي ع راسك ، بدنا نشوف مين اللي بعد سنة رح تنزل نفس الصورة وتكتب عليها ، قلعة اللي تقلعك وتقلع جارتنا اللي اقنعتني فيك !


#عمر_زوربا