أخبار اليوم

■خبر فتح الجوامع يوم الخميس عالفجر فش منه للأسف .
■اشتيه بيقلكم حينخصم من كل موظف يومين هذا الشهر .
■اليهود حيسكروا المعابر اليوم وبكرة عشان الأعياد اللي عندهم.
■تكافل بدت تبعت رسايل للناس عشان ياخذوا كابونة ب140شيكل .
■بيقلك قطر دفعت مصاري ل120عيلة بيوتها بدها توقع بغزة .
■الجامعة الإسلامية برضه طلعت بتسكر الشاشة قدام أي طالب مش دافع مصاري هذا الفصل .
■ع ذمة شب كان قاعد عند الحلاق مبارح سمعته بيقول فش أتقل من دم فتحي اللي بمسلسل البرنس هذه السنة.
■قصة مسلسل أم هارون شايفها عاملة قلق عالفيس بوك.
■شايف لسة في شركات ومحلات كبيرة حتنقل عالنصيرات يا معلم والأمور حتشعلل.
■زلمة كبير بالعمر من غزة مات مبارح من الكورونا بأمريكا.
■الشب اللي دبح الكلب وسلخه وكان بده يشويه طلع مريض نفسي ،بس الرامبو اللي صوره ،طلع غاوي شهرة و شكله حيتزبط.
■اشتية بده يدفع لأكثر من أربعين ألف واحد بيشتغلش مساعدة الأيام الجاية.
■منظمة الصحة العالمية بتقول انه لسة كورونا مش حتنتهي من العالم بسرعة زي ما انتوا متوقعين .
■الرئيس السيسي مدد حالة الطوارئ بمصر تلت تشهر جداد.
■الشمام تبع العصير بينباع الخمسة بمية وطعمه زي العسل.
■الفراولة أكثر سنة يطول موسمها هذه المرة.
■هذا يا معلم بيقلك بلش موسم جني العسل والشمع والحاجات الزاكية اللي بتفتح النفس.
■ البلدية مغيرة اسم شارع دار خالتي ياسمين ببيت حانون ومسميينه شارع أهل الجنة.
■وزارة الصحة بتقول انه في ناس تشافت من الفايروس رجع الها من أول وجديد.
■شكله حفتر روح الحكومة المعترف فيها بليبيا وطلعها عالتوتة.
■قصة فتح وتسكيرة الكفيهات لسة مش واضحة بس القرار تقريبا للمطاعم انه تفتح فش أي مشكلة.
■جماعة الحجر الصحي هدت طيورهم فش الهم حس ولا خبر شكلهم تأقلموا مع الوضع خلص .
#صباح_الخير للمهندس أكرم اللي فتح بسطة فلافل محشية وبيبيع الصايمين منها عالسحور وقبل الفطرة.
-صباح الخير للحجة أم إياد اللي الها أكثر عشرين سنة بتبيع قطايف زاكي ومرتب بدير البلح عشان تصرف ع أولادها.
-صباح الخير لكل شب بيبادر وبيحاول يساعد غيره من الناس اللي محتاجة حد يقف جنبها.
-صباح الخير لمحمد الأول ع دفعته اللي صار يشتغل بمخبز خبز بلدي عشان القعدة بتأكلش عيش.
-صباح الخير للست ميسون الجدعة اللي خلصت المنهج مرتين مع بناتها وهما بفترة الحجر.
-صباح الخير للحج حلمي اللي بيسمع الراديو كل يوم الصبح عشان يبل ريقه بخبر كويس .
-صباح الخير للأخت الوسطانية الراكزة اللي دايما بتكون رزينة وقد حالها واللي بتشيل شغل الدار ودور الجلي عن اختها اللي أكبر منها .
-صباح الخير لكل زلمة قام زي الأسد وعمل السحور اليوم وسخن الخبز