*

الليلة روضت نابي ع الضحكـــــــــة*** …شاحنت اللي فوق دمعاتي ضحكو
قالو راح حبيبها تهبل ضركـــــــــة***** …ما عرفو عن واش من لبة يحــــكو
أنا جفني محذراتو كان بكـــــــــى****** …يبكي ع اللي كي نغيب انا يبكــو
ما يبكيش على الخارج من عركة****** …مهزوم بعينين كسرولو شوكـــــو
ما يبكيش على الغارس لي شوكة*****في قلبي و انا قلعت انا حسكــــو
ما يبكيش على القاتل كان شكــى*****و اللي قتلو بدم يديهم يشكـــــــو
أنا ما نبغيش نسبح في بركـــــــة***** …و جمالي قطعو برور و ما بركـــــــو
أنا عمري شايفة عمرو يزكـــــى****** …و همومي كللي سبولات اتحكــــــو
أنا ما صدقت شاعر كان حكـــى*** * ** … الشعارا هايمين و غي يحكــــــو
الشعارا كلامهم خيط و شبكــــة* * * واللي طاحو في الشبيكة ما سلكو
الشعارا كلامهم ريحة مسكـــــة*** * * * * …بصح يدو عمارهم غير يلكــــــــو
ما كثرت كلام ماني لكاكــــــة****** …كلامي قاسي هيبة الورد بشوكـــــــو
ماهو ضعف ايذا تبعتو حرف الكا*** ..حتى الكاف حكايتو ماهي ملكــــــــو
كاف اللي دخلو اترخف و اتكى***** …بعد جيال تفطنو فيه و حركــــــــــــو
قالو قيلنا سويعة براكــــــــــــة** * ** * …بصح وين ديارنا؟ وين انتركـــــــــــو؟
يا ولفي خليتها دنيا زركــــــــة*** * * .. و طيوري من بعد ما غبت تمسكـــو
كسر كبير على الجناحات اتمركى* ..و انا و انت في الهوى واش نمركــــــو؟
انا و انت في الهوى كنا ضحكة * * ..انا و انت في الهوى زوج اتفركــــــو
انا و انت في الهوى ..خلي بركة * ** ..كنا قصة بطالها كامل شركـــــــــــــو
يا ولفي قلبي حلفلك في مكة …هات ايدك من ذا العما بيدك فكـــــــو



قصيدة باللهجة الجزائرية للكاتبة مي غول