منتديات قلب فلسطين - عرض مشاركة واحدة

04-03-2025

أكتر شي تعلمته من مرضي هو التأمل
صرت أشوف الحياة بعيون مختلفة، ببطء، بعمق، وكأني لأول مرة بكتشف تفاصيلها الحقيقية
زمان كنت عايشة كأني بسباق ،، مستعجلة على كل شي،، مستعجلة على بكرا،، على الإنجاز،، على اللحظات الجاية
بس هلأ.. بمشي ع مهلي، بتأمل، بفكر بكل شي حواليي، بكل لحظة، بكل نفس، بكل تفصيلة صغيرة كنت أمر عنها بدون ما أنتبه
صرت أراقب الناس مش بس بأفعالهم ،، كمان بمشاعرهم الحقيقية،، بكلامهم يلي بين السطور، بنظراتهم يلي بتحكي أكتر من كلامهم
صرت أسمع بدل ما أرد بسرعة، وأحس بدل ما أحكم
صرت أقدر النعم يلي كنت أشوفها عادية.. ضحكة شخص بحبه، صوت العصافير الصبح، نسمة هوا باردة ، ريحة الأرض بعد المطر، حتى كوب المي البارد صرت أحس فيه وكأنه معجزة
صرت أعرف انه الحياة مش بعدد الأيام
الحياة بلحظات الوعي يلي بنعيشها، بالحب يلي بنعطيه ونستقبله
باللحظات الصادقة، بالحكي يلي بيجي من القلب
المرض أخد مني أشياء كتير، بس علمني أكتر..
علمني كيف أعيش اللحظة بصدق وكيف أشوف الجمال حتى بالأشياء البسيطة يلي ما كنت أنتبهلها
يمكن نهايتي قربت، بس كل لحظة باقيه الي صارت كنز وصارت حياة كاملة بحد ذاتها

نقاء ,قمر الماما ,مُبتسِم معجبون بهذا