منتديات قلب فلسطين - عرض مشاركة واحدة

02-26-2025

خلال هالسنه يلي فاتت يمكن المعظم فقد حد غالي وعزيز عليه وأن وحدة منكم ،،، فقدت بابا وأنا تحت الاجهزه
راح بابا وراحت روحي معه ، ما في أي كلام ممكن يعبرعن حجم الوجع يلي جواتي ، دفنوا بابا من دون ما أشوفه ولا أودعه
مش قادره أتخطى فراقه كل يوم ببكي ع غيابه وفراقه ، مشتاقه كتير اله ولحضنه ، كنت أستمد قوتي منه ، كان أمني وأماني وسندي وعزي وقوتي
ما كان بالنسبه لإلي مجرد أب ، كان صديقي وحبيبي وكل شي
محتاجه كتير إلك بابا ولهلأ بستناك تفتح الباب وتفوت ع البيت ، في كتير شغلات بدي أحكيلك إياها ومخبيتها جواتي بتتعلق فيك لحالك أهمها انه ما قدرت أحب شي في الحياة متل ما حبيتك
حابه أحكيلك أديه هالايام ثقيله علي وأديه نفسي أرتمي بحضنك
عمري ما كنت متشائمه لكن خلال هاليومين يلي فاتوا مشهد آخر لقاء النا قبل لافوت للعمليه ما بروح من بالي ولا بغيب عني لما حضنتني الحضن الأخير وقلتلي بصوت برجف بحبك ، بابا العملية سهلة وأنتي قويه ورح تكوني بخير ،، كنت بتحاول تمسك دمعتك لكن كالعاده دمعتك غلبتك بسبب قلبك الرقيق
لحتى الآن بتذكر مشهد الوداع الأخير وأنا بشوفك وأنت بتطلع علي من فتحة الباب وبتلوحلي بايدك ،ما بروح هالشي من بالي وما بتغيب عني أنت ولا كل ذكرياتك معي
كنت بتمنى لو حضنتك وعانقتك في آخر لقاء بقوة لحتى يكفيني هالحضن لكل هالايام الخاليه من وجودك
سلاما ع ايديك البيضا والمجعدة يلي كنت ترفعها لحتى تدعي النا بالتوفيق والرضا وانه ننال من حظوظ الدنيا أجملها ،، كتير مشتاقه أقبل هالايدين
سلاما ع شعرك الأبيض يلي كان ينور طريقنا ويرشدنا ويجعلنا معززين ومكرمين
سلاما ع خدك المجعد يلي كان شعلة من الأمان والحب والدفا
الى جنات النعيم جزاء ما علمتنا وربيتنا وأدبتنا وعطفت علينا
كنت خير الأب وخير الزوج وخير الجد وخير الأخ ،،رحيم وحنون كتير ، عمرك ما بخلت علينا بأي شي
رحم الله وجهك الباسم وروحك الطاهرة وخلقك الرفيع ونفسك الراضية
اللهم جبرا وصبرا وقوة لنكمل الحياة حتى نلقاه بالجنة لقاء أبديا لا فراق بعده
ربي ارحم قلبا نقيا رحل عنا ولا ينسى
ربي ارحم من كان نورا لبيتنا وسعادة لارواحنا وملاذا بعد الله لشتات قلوبنا
ربي ارحم قلبا رحيما أخذته إليك ووجها جميلا فاض شوقي اليه ولم أعد أراه
ربي ارحم روحا نقية كسرني غيابها وأوجعني رحيلها
اللهم ارحمه رحمة واسعة واجعل قبره روضة من رياض الجنه
اللهم آنس وحشته وأكرم نزله وارفع درجته
ربي ارحمه واغفرله وأسكنه الفردوس الأعلى من الجنه وأجمعنا به في جنات النعيم
اللهم آمين