منتديات قلب فلسطين - لكل شه.يد قصة وجع 💔✌️

#هنا_غزة💔
احكيلكم عن الوجع؟؟

الوجع لما تكون طالع تصل رحم بالعيد وترجع تلاقي امك وأخوتك تحت الانقاض 💔

الوجع لما تكون الك سنتين خاطب وبس تروح ع خطيبتك يلي فرحكم تاني يوم عيد والكم سنتين عم تستنوه يقولولك ليكها بتلاجة الموتى بلا ما تشوفها لانه ما رح تقدر تتعرف عليها 💔
الوجع لما توعد بنتك وانت طالع انك رح تشتريلها العاب وما ترجع لانك صرت فتات ومش قادرين يلمو جثتك ! وما تنفذ وعدك لبنتك بسبب مغت.صب لعين💔

الوجع لما تكون نايم بأمان الله وتصحى تلاقي حالك انت وامك تحت الردم ومش قادر تقوم بس عم تترجاها ما تترك وتموت بجملة كلها وجع وقهر وعذاب وموت وحرقة ( يما تسبينيش امانة يما ، يما عشان الله اتنفسي يماا سمعيني صوتك يماا لا تموتي )! وما تقدر تقوم لانك انت وهي تحت الانقاض والحضن بينكم بهاي اللحظة محرم دولياً 💔

الوجع تكون نايم انت ومرتك واولادك الخمسة بس ما تصحى وتصحى منكم بنت بعمر ٣ شهور لتسأل كمان ٣ سنين عن اهلها والجواب است.شهدوا الله يرحمهم💔

الوجع إنك بسبب ٥٠ صا.روخ تكون ماسك امك بإيد ومرتك يلي ع وجه ولادة بإيد وفجأة تفقد الجنين وبعد الحمدلله وانك تصبر وتتحمل وتنزل ع شغلك لتنقذ ارواح تاني يوم ، تروح تفحص الموتى يلي بالتلاجة تلاقي إخوانك الاثنين!💔 يعني ابنك واخواتك بيومين

الوجع انك تنام وانت طفل عنده ١٠ سنين وتصحى تاني يوم عم تمشي بجنازة أبوك وتصرخ حسرة وقهر عليه 💔
الوجع إنك تكون إنسان ويحكولك في ٧ اشخاص تحت الانقاض وتنزل لحتى تنقذ روح وحدة عالأقل منهم تطلع وانت كلك قهر وتحكيلهم للاسف كلهم جثث امسحوهم من السجل المدني 💔
الوجع إنك تصحى وتلاقي بيتك يلي انولدت وتربيت فيه كلو ركام 💔

الوجع انه بس يست.شهد إمك او ابوك او اخوك او اختك او ابنك يحكولك مشوه مش رح تتعرف عليه ولا رح تقدر تنسى منظره فلا تودعه حتى ما تتعذب 💔

الوجع تكون ناطر انه يكون إلك ولد وبس يجيك ثالث يوم يست.شهد وتروح تدفنه 💔

الوجع طفلة عم تقول : دمروني نفسياً قبل ما يدمروني جسدياً 💔
الوجع إم وأب وأخ وأخت وعم وخال وخالة وجد ما قدرت تودعهم حتى
الوجع بيت وطفولة ورحمة و وطن يا عالم

قصص من بين ٢٠٠ قصة ، لكل شه.يد قصة وجع 💔✌️
حسبنا الله ونعم الوكيل