مسيرات العودة فعلت بالشباب ما لم تفعله الحروب الثلاثة !
 

الناس الي مكيفة ع حالها أنها بتروح على مسيرات العودة
عارفين أنه مسيرات العودة عملت بالشباب ما لم تفعله الحروب الثلاثة على غزة ..
هل تعلمون أن نصف عدد الخريجين أصبحوا لا يبحثوا عن وظيفة ؛ بل عن علاج!
عارفين أنه تكلفة المحروقات لسيارات الإسعاف التي عملت لتغطية مسيرات العودة تقدر بأكثر من مليون شيقل.
عارفين أنه حق جهاز البلاتين ٤٠٠٠ شيقل !!
تخيلوا كم عدد المصابين وكم واحد ركب جهاز بلاتين؟
بتعرفوا قديش الصحة دفعت حق أجهزة بلاتين ( مبالغ خرافية)
بتعرفوا أنه لو هذه المبالغ الهائلة لو تم صرفها للشباب العاطلين عن العمل كرواتب شهرية مقابل تنظيف الشوارع لأصبحت غزة أحلى من سنغافورة!
بس احنا للأسف شعب مُتخلف بدنا طبلة ونرقص عليها !
كل واحد بروح هناك مبسوط ع حاله ، تأكد إنك لا تفقه شيء بالسياسة ولا الوطنية !
وبدي أقول كلمة لكل واحد دمه حامي وبقولك الوطن غالي
ياسيدي لما تتصاوب ،بدي أشوف مين الدكتور المحترم ابن المحترم يلي بده يوفرلك علاج مجاناً عشانك بتحب الوطن
ولما تفوت مستشفى الشفا ما تسب على الموظفين والتمريض لسوء تقديم الخدمة العلاجية وتقولوا الدكاترة حمير!
راجع نفسك منيح ، بتعرف مين الحمار الحقيقي!!

منقووووول

كلام سليم
الله يهدي الحال يارب

عوآفي إلك ..

متأسف على التعبير
مسيرات التخلف والجهل
للأسف أتضح لي أن أغلب شباب غزة
وفئة كبيرة من المجتمع مثل القطيع التي يقودها أي شخص
ولا اي مكان حتى لو للهلاك
بتقدري تحكي قطيع غنم
الله يهديهم ويصلح حالهم
وربنا يعاقب إلي بحرض الشباب على المسيرات
شكراً لكِ

مش فاهم المغيب الي بيروح على الحدود علشان يموت او رجله تنقطع
شو الي بيقدمه للوطن ؟
للأسف ما بيعرف انه هيك بيكون عالة على الوطن
ولا حول ولا قوة إلا بالله
شباب مغيب وفصائل وتنظيمات بتحركه لمصالح حزبية
مشكورة
كلام مقنع

تيجي الطلقة من اليهود احسن من الأخ
اذا عندك حل تاني اتحفينا

ليش تيجي الطلقة من الاساس ؟
ليش هالفلوس اللي راحت ما عمرنا فيها البلد ووفرنا فرص عمل للشباب بدل ما تروح علاجات لرجلين مقطعة !! او ع الاقل طورنا سلاحناااا

هو قبل ما يكون في مسيرات و كان في اشوي اسمو شغل و توظيف
الشباب لقت حاجة تفش غلها و قهرها فيه اللي هو سبب الرئيسي فيه

اتركوهم يعملو اللي بدهم اياه
وبلاش عد فلوس لانو يحنا ما بقهرنا غير هالعد اللي ما جاب لا حق و لا باطل

كل واحد بروح ع الحدود عارف مصيروا
و فاهم شو راح يحصلوا

فبلاش من المزايدات
وافضل اشي هو الصمت و تفرجي ع غلاف غزة هو بلكن ترتاح نفسيتك

الله المستعانن

يعطيكِ العافية

@m0m3n

انت من المشاركين اكيد بالمسيرات

رأيك بهمنا ^_^

صحيح كنت من المشاركين بدايه المسيرات لحد يوم استشهاد ال 60 شهيد
بعديها قررت اني ما اشارك نهائياً
لانو اكتشفت انو الامر مالو اي فايدة
الجندي متخبي وبصيد بالناس وكانهم بط
كثير تصاوبو شباب وانا واقف قريب منهم
بتيجي الرصاصه برجلو وبقع وبصير يصرخ وبقول الرصاصه الثانيه فيه
ووصلت لاقرب نقطه للسلك بس كلو علي الفاضي
تقريبا من سنتين وانا بشارك في هالامر قبل ما تاخذ زخم اكبر وتصير بشكل اوسع واكبر
وبقلك والله ما منها فايدة بس اصابات وشهداء بالمجان
انا داري ربنا يهونها