|
سنة قاسية ودروس كثيره ،، شو خسرنا، شو كسبنا، وشو تعلمنا وشو تغير فينا ؟
السنة الماضية، بنقدر نحكي انها كانت متل كابوس أو حلم تقيل على القلب، خاصة على أهلنا بغزة
الظروف يلي مرت عليهم كانت صعبة بمعنى الكلمة، من حرب ودمار وحصار، لقلة الأكل والدوا، ومع هيك، الناس هناك لسا واقفة على رجليها بإرادة من حديد وعزيمة ما بتنكسر الظروف الصعبة دايما بتعمل فينا شي غريب، بتخلق منا شخص تاني، يمكن أقوى، يمكن أحيانا أكتر حزن، بس أكيد بتختلف من شخص للتأني كل واحد فينا مر بهالسنة بطريقته الخاصة، وكل واحد حس بالتغيير تعالوا نفكر مع بعض ونجاوب ع الاسئلة // شو خسرت؟ يمكن بيت، يمكن حلم، أو يمكن شي أغلى من كل هادا ؟ // شو تعلمت؟ الظروف القاسية شو علمتني وعلمتك عن الحياة وعن حالك؟ // شو تغير فيك؟صرت أقوى، أرق، أو يمكن أكتر حذر من الأول؟ // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ السنة يلي مرت كانت متل مراية خلتنا نشوف حالنا والدنيا بزاوية جديدة فكر فيها واحكي عن حالك لأن كل اجابة أكيد بتحكي قصة |
// شو خسرت؟ يمكن بيت، يمكن حلم، أو يمكن شي أغلى من كل هادا ؟
خسرت كثير احلام وامال وتطلعات حتى اشخاص / / شو تعلمت؟ الظروف القاسية شو علمتني وعلمتك عن الحياة وعن حالك؟ الدنيا مش دايمة لحد ..تعيش كل بحظة بحياتك كأنها الأخيرة لأنه الواحد بأي لحظة راح يكون ذكرى // شو تغير فيك؟صرت أقوى، أرق، أو يمكن أكتر حذر من الأول؟ تغيرت كثير ..الدنيا مش مستاهلة الواحد يجري وراها // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ انجزت ..عملت رواية والجزء الثاني عالطريق وكتبت عدة اغاني وحاليا بعمل بودكاست و ان شاء الله ينجح و تكون مواضيعه يستفيد منه الجميع الاسئلة بردوا الك ...حابب اسمع اجاباتك |
اقتباس:
خسارة أحلام وآمال وأشخاص مش شي بسيط هي تجربة صعبة بتخليك تحس انك كبرت فوق عمرك عمر انك تكتشف انه الدنيا ما تستاهل كل هالركض هي قوة بحد ذاتها ووعي ونضج وإنجازاتك ،،، رواية، جزء ثاني، أغاني، وبودكاست… هادا مو مجرد شغل هادا إرادة وعزيمة قوية مجرد انك لسا واقف وبتبدع بهالطريقة هادا نصر كبير وكل خطوة بتعملها دليل ع انك أقوى من الظروف بتمنالك التوفيق بالجزء الثاني من الروايه وان شاء الله البودكاست ينجح نجاح يفوق توقعاتك ويوصل صوتك وفكرك لكل واحد محتاج يسمعه شكرا خالد ع وجودك وإجاباتك ومن دون ما تطلب أنا كنت فايته أجاوب ع الاسئله نورت موضوعي |
// شو خسرت؟ يمكن بيت، يمكن حلم، أو يمكن شي أغلى من كل هادا ؟
خسرت أغلى حدن ع قلبي ،، خسرت بابا الله يرحمه ويغفرله خسرت صحتي وعافيتي خسرت إيدي اليمين والقدره إني أقدر امسك أي شي فيها خسرت قدرتي ع البلع ، والتنفس بدون ما استخدم جهاز الأوكسجين خسرت ضحكتي وشغفي وحبي للحياة خسرت قدرتي ع انه أعمل كتير شغلات لحالي بدون مساعده من غيري // شو تعلمت؟ الظروف القاسية شو علمتني وعلمتك عن الحياة وعن حالك؟ تعلمت انه الإنسان شو ما بعطي رح يلاقي ،، أديه بتقدم محبة رح تلاقيها تعلمت أقدر كل لحظة بحياتي تعلمت انه جوا كل إنسان قوة كامنه رح يستخدمها بأضعف أوقاته تعلمت أكون صبوره واحتسب وجعي عند ربنا تعلمت اقدر نعم كتيره ما كنت أقدرها من قبل تعلمت اقدر كل لحظه ما أحس فيها بوجع تعلمت اقدر كل دعم ومحبه لأنهم بمدوني بالطاقه // شو تغير فيك؟صرت أقوى، أرق، أو يمكن أكتر حذر من الأول؟ صرت انطوائية وما بحب احكي مع أي حد صرت أفكر بكتير شغلات بعمق بطل عندي شغف لأي شي والحزن والاستسلام مسيطرين علي //شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ انه قدرت أحافظ ع حياتي بعد ما وصلت للموت قربت من ربنا كتير وهالشي بعتبره إنجاز كبير كتير بالنسبه لإلي |
ونجاوب ع الاسئلة
// شو خسرت؟ يمكن بيت، يمكن حلم، أو يمكن شي أغلى من كل هادا ؟ بينت اني خسرت الحقائق // شو تعلمت؟ الظروف القاسية شو علمتني وعلمتك عن الحياة وعن حالك؟ كل العالم كذب على، بقصص حياتي // شو تغير فيك؟صرت أقوى، أرق، أو يمكن أكتر حذر من الأول؟ كلهم // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ مقولة شيكس، بير ليس، كل ماتراه تراه وما تسمعه تسمعه السنة يلي مرت كانت متل مراية خلتنا نشوف حالنا والدنيا بزاوية جديدة فكر فيها واحكي عن حالك لأن كل اجابة أكيد بتحكي قصة اسئلتك رووعه كروعة حضورك الجذاب بيننا شكرا لك |
// شو خسرت؟ يمكن بيت، يمكن حلم، أو يمكن شي أغلى من كل هادا ؟
خسرت حلم حياتي. خسرت بيتنا. خسرت اصحاب كتيرة هما كانو سبب في خسارتي الهم. // شو تعلمت؟ الظروف القاسية شو علمتني وعلمتك عن الحياة وعن حالك؟ علمتني شغلات كتيرة. علمتني اد مابتعطي مابتاخد.علمتني مااتعامل مع اي انسان. علمتني اكون حذرة كتير في الايام القادمه. علمتني لين القلب مابنفع مع اي انسان.تعلمت من خاف سلم. // شو تغير فيك؟صرت أقوى، أرق، أو يمكن أكتر حذر من الأول؟ صرت اقوى مش كتير يعني. صرت بس اعيش ليومي ماافكر بالمستقبل. كنت امزح واضحك هلا صار بحدود ومش مع اي احد. // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ الحمدلله في شغلات كتيرة كانت مهمه وخاصه جدا انجزتها وارتحت. اسئله رغم سهلتها لكن اخدت وقت كتير عندي من الاجابت يمكن فتحت مواجع. يمكن خلتني اقعد مع حالي اشوي بالاخر جاوبت هههه اسئله كتير كتييير حلوة مبدعه دائمه غاليتي ب الاختيار م ننحرم يارب هالطله الحلوة ♡ |
اقتباس:
يمكن الاجابات فتحت جروح قديمة بس بنفس الوقت هي بتبين انك أقوى من كل يلي مريتي فيه الحياة ما بتمشي دايما مثل ما بدنا بس الشطارة انك تكملي رغم كل شي وانك تتعلمي من كل تجربة حتى لو كانت بتوجع وجودك وكلماتك بحد ذاته اله أثر حلو وأنا مبسوطه انه الأسئلة خلتك تاخدي لحظة مع حالك حتى لو كانت صعبة تذكري دايما انك قوية وأنه الأيام الجاية ممكن تكون أحلى الله يكتبلك الخير والسعاده ويعوضك بكل شي فقدتيه ♡ |
اقتباس:
الحياة بتعلمنا كتير لكن يلي ببقى هو قوتنا بعد كل تجربة مش مهم شو فقدنا ،المهم شو تعلمنا من كل يلي مرينا فيه بتمنالك حياة افضل وكلها سعاده |
// شو خسرت؟ يمكن بيت، يمكن حلم، أو يمكن شي أغلى من كل هادا ؟
على الصعيد العائلي خسرت الامان لأولادي وهم بعيدين عني غير هيك الحمد لله // شو تعلمت؟ الظروف القاسية شو علمتني وعلمتك عن الحياة وعن حالك؟ علمتني اني اعتمد على نفسي وادور على شغل يكون الي دخل شهري وما احتاج حدا علمتني اني ما اخلي وقت فراغ واني اتعلم شغلات استفيد منها علمتني اضل مرحة برغم انو جواتي حزززززن اد الدنيا علمتني ما افكر بالمستقبل واعيش كل يوم وكل لحظة علمتني انه الرفقة الصالحة احلا مكسب بالحياة // شو تغير فيك؟صرت أقوى، أرق، أو يمكن أكتر حذر من الأول؟ الرقة راحت من زمان القوة عم بحاول كون قوية بظل هاي الظروف الصعبة // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ خلصت سنة اولى تجويد حفظت عدد من اجزاء القران اخدت دورة شوكولاتة واخدت دورة لصناعة العجوت بلشت اتعلم مخارج الحروف التزمت بنادي رياضة لمدة سبع اشهر وما زلت بهتم بصحتي شوي وبعمل فحوصات كل فترة وزادت معرفتي ببنات بشجعوني عالقران السنة يلي مرت كانت متل مراية خلتنا نشوف حالنا والدنيا بزاوية جديدة فكر فيها واحكي عن حالك لأن كل اجابة أكيد بتحكي قصة سنة ال2024 كانت نقلة نوعية لحياتي صراحة بطريقة ايجابية كانت مليانة انجازات ودورات وقصص حلوة اسئلة مليان قصص وحكايات فيها الحلو وفيها الصعب ربنا يغير الحال للأحسن |
…
|
اقتباس:
حبيبتي ملوكه كلامك فيو ووجع وبنفس الوقت فيو قوة واصرار يلي مريتي فيه مش سهل بس واضح انه خلاكي شخص أقوى وأوعى وخلاكي تفهمي قيمة الأشيا الحقيقية بالحياة فقدان الأمان لأولادك وجع كبير بس حبك الهم وقوتك أكيد رح توصلهم وأجمل شي انك ما استسلمتي ، بالعكس تعلمتي واشتغلتي ع حالك إنجازاتك مش بسيطة ،،، من التجويد لحفظ القرآن، لدوراتك لاهتمامك بصحتك كلها خطوات بتقول انك عم تمشي للأمام وبثقة الرقة يمكن خفت بس أنا متأكده انه جواتك لسا مليان حب وانك قادره تعطي وتقدمي كتير أشيا حلو كتير أنه رغم الحزن يلي جواتك لسا عندك ضحكة وروح مرحة،، هادا لحاله شي كبير الله يكتبلك أيام أحلى ويعوضك بكل الخير يلي بتستحقيه شكرا ع مشاركتك بموضوعي نورتي |
// شو خسرت؟ يمكن بيت، يمكن حلم، أو يمكن شي أغلى من كل هادا ؟
خسرت أخوي ، زوجته ،وأولاده ، خسرت ابن اختي، خسرت بنت أختي وزوج اختي ، وخسرت ابن عمتي ، كلهم بيوم واحد ب ليلة لا تذكر الا صوت الانفجار وشيلة النيران في الخيمة بس مش خسارة فيهم الشهادة وخسرت بيتي وبيت اهلي اللي ضم ذكرياتي ، وخسرت كمان بيوت اخواتي جميعا بكل الذكريات اللي جمعتنا سوى الله يعوضنا خير // شو تعلمت؟ الظروف القاسية شو علمتني وعلمتك عن الحياة وعن حالك؟ علمتني الظروف أني اكون قوية ، اتعلم قوة التحمل والصبر ، وعلمتني مهما كانت الايام الماضية جميلة تبقى ذكرى لا غير تذكر بحلقات الجلوس وتنسى ولكنها مغروسة فينة // شو تغير فيك؟صرت أقوى، أرق، أو يمكن أكتر حذر من الأول؟ هي ما غيرتني بس خلتني اكون أنسانة قد حالي ، وما اكون الا قدوة للأصغر مني سنا والاكبر مني سنا قدوة لي ولكن الحرب غيرت شغف الالهام الروحي داخلنا عندما اوجعتا القدر واخذ ما اخذ ولكن يبقى الايمان بالقدر الافضل سيطرة علينا لا شيء بقي على ذاته ، جميعنا غيرنا الايام في ذاك العامين وكأننا عشنا كابوساً لا يفسره راهب // شو أنجزت؟ يمكن مجرد انك لسا واقف لحد هلأ هادا بحد ذاته إنجاز؟ انجزت اني رجعت اشتغل من جديد بعد ما كنت فاقدة الشغف بالشغل والخروج من الخيمة وكيفية التكيف بين البيت والخيمة وأن الوضع اصبح اكثر سلاسلة عن ذي قبل ، لهذا يجب علينا أن ننسى بعض من الألم لنكمل المسير ونمضي قدماَ السنة يلي مرت كانت متل مراية خلتنا نشوف حالنا والدنيا بزاوية جديدة فكر فيها واحكي عن حالك لأن كل اجابة أكيد بتحكي قصة السنة اللى مرت خلقت نفساً جديدة لاتعرف ولا تقرب للاولى بصلة ، كنت هادئة صبورة متحملة لابعد حد ، ولكن تلك اجبرتني ان أخلق انسانة تسعى لخلق السعادة حتى لو كانت بعيدة المنال لان الاستنزاف الداخلي والجلد للنفس اخذ منا ما أخذ واوجعنا بما فيه الكفاية لذلك علينا ان نبقى أصحاب ابتسامة ، تقهر ولا نبقى أصحاب حزن يهلك الروح والنفس والصحة وتفرح عدوا لذا يجب علينا نجعل السعادة اول اهتماماتنا ونعيد هيلكة أنفسنا بالتدريج كي نتعدى الالم والوجع بالتناسي وليس النسيان مشكورة حبيبتي ع الأسئلة يسلمو |
| الساعة الآن 10:04 PM |
Powered by vBulletin™ Version 3.8.7
Copyright © 2025 vBulletin Solutions, Inc. All rights reserved.
هذا الموقع يتسخدم منتجات Weblanca.com
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd.