لو سمحتو صبايا تعو هونا

[قصي]

نصائح مهمة

بس تتزوجي... او اذا كنتي متزوجة..الكلام هام والموضوع خطييير. الحكي مهم

يا عمي نحنا مو متل الاجانب ، والاتراك بالمسلسلات ، ماتحاولي تقلدي اي حركة ب اي مسلسل اجنبي او تركي !!
لانو احنا نفسيات..


مثلا بالمسلسل التركي ، بكون جوزها نايم ،
قال هي بتشوفو نايم متل الملاك ،
اول شي بتبوسو من جبينو ،
بعدين بتجيب قلم و بتخربش ع وجهو ، مشان يصحى ،
ويتفرج عالمراية ، ويتفاجئ ، ويضحك ، ويروح يحضنها

هي ما تحاولي تقلديها أبداااااا
لأنو أصلاً مبدئياً جوزك مارح يكون نايم متل الملاك ،
هو عبارة عن جرافة موتورها حامي وصافة استراحة

واذا اجيتي تبوسيه من جبينو ، رح يفكرك مديرو بالشغل ،
ونحنا اصلاً شعب ناقز ، ومتوقعين اي مصيبة ب أي وقت ودائماً متأهبين وجاهزين ، ف احتمال تاكلي كف يلزقك بالمراية

ثانيًا ، اوعي تفكري مجرد تفكير تمزحي وتخربشي ع وجهو ، لأنو القصة رح توصل للطلاق !

وفي شوية امثلة نصييييييييحة لا تقلديهم :

١- ماتحاولي ترمي عليه مخدة بغرفة النوم مشان يطير الريش منها وتعيشو جو أليسا و أجمل احساس ،
لانو نحنا بناخد هالقصص جد ، وأصلاً مافي عنا مخدات فيهن ريش ، كلها سفنج منتوف وتريكو وصوف بلايز قديمة

٢- اذا رحتو عالبحر ، رحلة خميس ع جمعة ، ماتخلي جوزك يركض وراكي مشان تعيشي جو الرومنسية
لأنو اذا ما قدر يمسكك ، رح ياخد الموضوع شخصي ، ويرمي عليكي حجر يجي براسك من ورى وتوقعي طب ع وجهك !

٣- لا تيجي من ورا جوزك ، وتسكري عيونو ب ايديكي ، عند الاجانب رح يحس ب ايدها ويبوسها
بس عنا مارح يعرف ايدك ، ورح ياخد القصة انو حدا جاي يسرقو ، واذا عرف ايدك ، ما رح يبوسا ، رح يعضك منها
و احتمال يشيل اصبعك السبابه بسنانو

٤-ما تحاولي تفاجئيه قبل ما يجي بالليل ، وتعملي سفرة عليها ورد مع اضاءة خفيفة
وتفرشي الارض ورد احمر ومن هالحكي
لانو رح يفوت تعبان ، ومديون ، ورح يدعس ع الورد ويمشي ،
ويشوف السفرة ،
ويسألك مين عازمة؟ اهلك؟
تقوليلو لا حبيبي هدول مشانك
رح يقعد ، ياكل ، وياكل ، وياكل ، ويشفط كاسة البيبسي ،
و يتدشى بنص خلقتك ويقوم ينام ،
وانتي صافنة فيه

٥- اخيرًا وليس آخرًا ، الاتراك بالمسلسل ، بس تزعل منو قال بتتدلع ، وبتفوت ع غرفة النوم ، وبتسكر الباب ، وبتوقف وراه ،
فهو اول شي بدق الباب بهداوة ، وبقولك سوري حبيبتي ،
وبزيح الباب بهداوة كمان ،و هية بكل بساطة بتسامحو ، وبتبعد عن الباب ، وبفوت وبحضنا

عنا اوووعي ، اوووعي ، تتدلعي ماتتدلعي ،ما توقفي ورى الباب ، اوعي ، اوعي
لانو اذا إجا يفتح الباب ، وما فتح معو ،
ما رح يزيحو بهداوة ، رح يرجع لورا ويدفشه برجله مداهمة
واحتمال انتي تصفي عالبرندة
اوعي ، اوعي ،
ترى هي بنظرو غرفة النوم اللي جايبا اقساط ،
يعني غالية عليه و يمكن تكون عنده اغلا منك كمان .هههههه