مشاهدة النسخة كاملة : سمــره ツ
بصراحه زعلت ع مدونتي اللي كانت، من قد ما كتبت فيها وطلّعت كل الاشياء اللي كانت جواتي وبعقلاتي من مشاعر وافكار ومعتقدات ..
بس يمكن ما بطلعلي ازعل كتير، لإنها لساتها موجوده هناك، يعني بكلمات اخرى بقدر ارجع اكتب فيها ايمتا مبدي، إلا إني انا من الاشخاص يللي بيحبوا يستطعموا المنتدى ويتلذذوا فيه،
لهيك ما فيني شارك بمنتديات تنين بنفس الوقت، ما فيني شارك غير بمنتدى واحد لحتى اعطي المنتدى حقو وبنفس الوقت ليعطوني هوي واعضائه اشياء كتير، من مواضيع، تقدير، معلومات عامه، صداقه ومحبه إلخ ..
بكتفي لحتى قول إني مقتنعه بوجودي هون لأسباب شخصيه ..
width=1 height=1
حنين الروح
07-10-2016, 11:41 PM
يسعد قلبك دنيا وأخرة ياسمرة شو بحبك
بربي انك أصيلة وبتنحطي ع الجرح بطيب
واحنا محظوظين بوجود وحدة متلك بينا
اعذريني انك اقتحمت مدونتك
بس كلمتين بقلبي وحبيت أحكيهم
موفقة ان شاء الله
متآبعة لك بصمت
:mmo:h11
الطائر المفقود
07-11-2016, 04:20 PM
الله يعطيك العافية
إرتواء تسلميلي عيوني، وانا كمان مبسوطه لإني موجوده بين ناس احترموني وبعدن بحترموني ..
بتقدري تفوتي تكتبي ايش مبدك وايمتا مبدك،
مدونتي مرحبه فيكي وبالطائر المفقود وبالكل كمان ..
:po3:
مبيرح لمن فقت من النوم الصبحيات، لقيت ابوي صار فايق، دايما بقوم من نومه قبل الكل فالبيت،
لقيتو عند المغسله ليغسل وجو، وكان في 3 انواع معجون سنان بقلب كباي، سنسوداين، ميريدول، كولجيت،
اجا ابوي استعمل ميريدول، قمت قلتله : "يابا استعمل كولجيت احسن للسنان"،
قلي : "مش مهم يابا، بالنسبه إلي كلو زي بعضو"،
ونسيت انو ابوي ختير ونسيت إنو صار عمرو 76 ويا دوب ضللو اكم سن ليقدر ياكل فيون،
وما بعرف إذا الختياري عموما بفرشي سنانو لحتى ميحسش إنه كبر بالعمر ..
تأثرت ومشيت ..
ضروري دايما يكون في نهايات ؟!
الماسة
07-25-2016, 06:02 PM
هلا سسمرةة وانا بصراحةة اشتقت لمدونتك وكتاباتگ ..
وحتابعك هنا اكيييد
موفقةة عسسولةة
اهلين سنابل، مع إني معرفتكيش، شكلك من المنتدى القديم،
بنبسط بوجودك فأي وقت، مدونتي مرحبه بالجميع ..
:po3:
ع فكره دايما بعلمونا إنو شرف البنت هو "غشاء البكاره" تاعها، وانو الرجوله فض هالغشاء،
بس معلموناش إنه الشرف اساسا "فكر وحريه" !
مشان هيك حافظوا اغلب البنات ع غشاء البكاره ومحافظوش ع الشرف !
شباب وبنات هالايام بحس في عندون "حاله إستعراضيه" بحاولوا يبينوا إنون بفهموا بكل اشي وإنون بنتموا لفئة المثقفين،
يعني بتلاقوا الواحد بين كل كلمتين بشهدلك "بمحمود درويش" وحاطط صورة "تشي جيفارا" !
حلو الاشي ومش غلط بس دايما بسأل حالي انتي يللي عم تحكي هاي الاشياء وتعبر عن حالك فيهون، قديش فاهمون؟ قديش بتنتمي إلون؟ قديش بشبهوك؟
بحس في حاله استعراضيه وبس لا اكثر ولا اقل !
دايما كنت اقول الإنسان لمن ينزل من بطن إمه بكون قدامه خيارين "الخير / الشر"، بيختار واحد منون ليسلك طريقو بالحياة،
ولكن مع الوقت إكتشفت بإنه مفش اشي اسمه إنسان شر او إنسان خير،
الخير والشر بكونوا موجودين بنفس الوقت، لإنه بكل بساطه يُعتبر "إنسان"، ولكترة تناقض المشاعر اللي بتكون موجوده جواته من الصغر للكبر !
لمن يصح ويشفى الإنسان من جرح او كُسر معين كان بجسمه،
بضل بمخه هالمنطقه يللي انجرح او يللي انكسر فيها بجسمه، ويضل يشعر بوقت من هالاوقات إنه كان في اشي بحياته !
وممكن بدعسه وحده يرجع ع نفس الجرح واكتر كمان ! هون انت وذكائك وشو بدك من الحياة !
width=1 height=1
الرجل بيفكر إنه الخيانه الها علاقه مرتبطه برجولته او بأدائه كرجل، وع فكره هذا الاشي مش مزبوط !
لإنه المرأه لمن تخون الرجل، غالبا بتخون "عاطفيا"، نتيجه نقص عواطف لهيك بتقوم تخون عاطفيا او بتلاقي محل ترمم فيه الفجوه او الفراغ يللي بكون موجود بحياتا !
ع فكره كل واحد فينا حياته كلها عباره عن "خزنات"،
ولإنه إسمها خزنه يعني لازم تكون بأمان وتضل مسكره ومقفوله !
خلوا مفتاح الخزنه دايما معكوا، لإنه المفتاح مش لازم ينعطى لحدا صدقوني،
وإذا شي مره ملقتوش محل الي تخبوا فيه المفتاح إبلعوه !
اقوى سلاح بالحياة من وجهة نظري هو "المحبه"، من خلالها بتكشف الشخص اللي قبالك،
وبالمحبه بنقدر نحارب الحقد،
ونحارب اصعب الامور بالحياة !
في حِكمة الله دايما موجوده بكل شغله بتمرق بحياتك،
انت بتكون بتفكرها مش منيحه بس هي بتكون لمصلحتك،
بتكشفها بعدين !
لمن نكون صغار منفكر إنه كل اشي منلمسو هو الحقيقي وإنه كل اشي بتفسّر هو الحقيقه،
بس كل ما منختبر الحياة اكتر منلاقي إنه كل ما في امور اللي مالهاش تفسير،
في اشي اكبر من هالتفسير واكبر من إنها تتفسّر وتصير تفهم اكتر عمق الحياة !
انا شخصيا بعتبر حالي شخص كتير مؤمن،
بحس حالي وصلت للإيمان اكتر من بعد تأمل كبير، من بعد تعمق،
وهالنتيجه يللي انا وصلتلها بعتبرها افضل بكتير من إنه واحد يخلق ويكتسب الإيمان فقط من العيله !
S T E L L A
09-15-2016, 04:06 AM
ممدونهه بتجججنن ♡
تثثبت كمانن اسسبوعع ")
وردهه
ننوش شكرا كتير عالتثبيت مره تانيه،
بالوقت اللي كان فيكي تختاري مدونه ثانيه لتثبتيها،
يعني عنجد انا بقدّر هالإشي، الله يسعدك.
:po3:
الانثى عموما انوثتها مش بمفاتنها، ممكن يكون مبين من جسمها بس وجها وتكون اكتر من فاتنه !
مُنْية
09-15-2016, 09:20 PM
سمرة
مدونتك واقعية وبتلمس حقايق في حياتنا
وأماكن كتير جوانا
من أجمل الحاجات اللي عجبتني
فيها إنها بلهجتك العامية
وده بيوصل المعنى بشكل واضح
تسلم ايديكي وان شاء الله هكون من المتابعين
ليها لأني معجبة بكل حرف هنا
مُنيه، شكرا لإنك مريتي من هون وحبيتي مدونتي،
العاميه اسلوب سهل للتعبير عن جوات الإنسان، لهالسبب بعتمد عليها فكتاباتي هون،
خصوصا إني بميل للفلسفه نوعا ما، فلو اعتمدت ع الفصحى من البداي كنتوا ممكن تستصعبوا الفهم "غالبا"،
بس انا كتير بيهمني تفهموا يللي انا بكتبه عن حالي او عن الحياة والمجتمع والبشر، لهالسبب فضلت العاميه.
ان شاء الله مدونتي تنال الاعجاب كل الوقت،
واكيد مرّحبه فيكي وفالجميع بأي وقت ..
:po3:
خيانة الوطن كل شخص بيحطها بخانه معينه، وبالنسبه إلي شخصيا تندرج تحت إطار واحد بس، وهو "الوطن" فقط،
ولمن اقول الوطن، بقصد فيه الارض والشعب يللي هني الولاء المطلق للوطن لإلو، مش لأي طرف تاني، ولا لأي شخص تاني،
والولاء المطلق هو للشعب، هو الولاء لأهلي ولناسي،
طلعت من البيت ونزلت ع السوبر ماركت شريت غرضين ومن بعدا اخذتلي شي تاكسي ورحت لعند رفيقتي ومن بعدا رجعت ع عالبيت، وبطريقي الناس بالحارات عم يلعبوا بالطابه وختياريه قاعدين عالكراسي عم بيديونوا ويسترجعوا ذكريات ايام زمان ونسوان عم تنشر غسيلها ع الحبل بالسطوح وفالبرندات وولاد صغيري عم يلعبوا غميضه مع بعضون ... إلخ ..
هذول الاشخاص هني الشعب وهني الوطن، انا بقبلش اخون هاي الناس، من هون بيتحدد مفهوم خيانة الوطن !
width=1 height=1
إذا حبيتك وقبلت المحبه، سيعتا بترجعلي محبتي اللي اعطيتك اياها مع محبتك،
وإذا انت مقبلتش محبتي، رح ترجعلي محبتي وإنت اللي فيك بدو يضل فيك !
الماسة
09-19-2016, 10:05 AM
سمرة !
رآئعة أنتي بحق !
ليش إحنا دايما أعداء السلام ؟!
ليش منعرفش عبارة "لا تدين لأن لا تُدان" ؟!
ليش منعرفش نحب بعض ؟!
عنجد الحب شو إنها كلمه تقيلة ع قلب البني آدم !
مولٱنآ
09-19-2016, 11:30 PM
سوري ع المداخله
بس انا برأيي قرار ننوش كتير رائع
لانو المدونه الوحيده الي بتابعها وبحب كلماتها مدونتك
متابع دايماً
انا كأنثى بحياتو ما بيكون عائق عندي الشخص يللي مرق بتجارب وعلاقات كتيره بماضيه،
ليش ارضى ع نفسي اخوض تجارب سابقه وما ارضاها ع الطرف التاني إنه يخوض تجارب سابقه؟ بالعكس من حقه يكون عندو تجارب،
واساسا التجارب هي اللي بتفيدنا لقدام، وخاصةَ الانثى لمن يكون عندها تجارب ناضجه،
هالإشي بساعد إنه وقت تخوض علاقات جديده تنجح فيها اكتر من اي علاقه قديمه وتصير تعرف كيف تتعامل مع الرجل !
عنا نوع من الانفصام بين اللي عم نعيشه وبين اللي منحب نعيشه،
يعني اللي منفكر فيه واللي عبالنا نعمله بكون مختلف كليا عن اللي منعمله بالحياة اليوميه !
الخيانه تركيبتها مختلفه كليا عن إنه نخاف او منخافش،
لإنه الواحد لمن بدو يخون، بخون لإنه هاي مشاعر وعم تتدفق وعم بتصير بحياة الإنسان، فا بالنهاي رح بتصير وبيخون !
دڵوعة ٱڵمنتدى
09-22-2016, 09:24 PM
رآئع هآك النزف غاليتي
سـ أظل اترقب بوحك عن بعد
ف لنزفك عذوبه ك عذوبه روحك العطره
حرسك الله ف لكٍ نزف يضاهي بريق
النجوم ب روعته
آعدك ب آنني سـ أظل بالقرب لـ إرتشآف
كل ماهو جديد من نزفك المعطر بالياسمين
غيم ...!<كآنت هٌنا
بتصور الإنسان بيرضى ع هالنفسيه بإنه كل حياته تكون وقفات عِز !
بصرف النظر بشو بدها تخدمه وبشو بدها تضره،
وقفة العز بتبقى بالاخلاق والتربيه !
الماسة
09-24-2016, 11:43 AM
انا شوي بكرها هالحياة ..
بس بحبا ..
بكرها وبحبا بنفس الوقت !
حلوو توقيعك ^ ^
هوآ فعلآ كلنآ بنكره الحيآة وبنحبهآ بنفس الوقت
بنكرههآ عند اللحظآت المرة وبنحبهآ عند اللحظآت الحلوة ^ ^
ولا حدا بعرف قديش انا عايشه بشغفي ومشتاقه بدون ما احسب ع حالي ايام عم تمرق ع شكلي من برا او ع جسمي،
إحنا ثلاثه، روح نفس جسد، إذا دايما بدي افكر بجسدي، فليش لحتى ما افكرش بنفسي وبروحي بنفس الوقت؟
وإنه وقت بدي اعمل إشي لحتى هذول التنين (النفس والروح) لما يكونوا مرتقيين، سيعتا الجسد بيضل مرتقي كمان،
وهيك ما بيعود خطوط الزمن تأثر عليه !
width=1 height=1
مش دايما منقدر نكون حقيقيين وخاصةً بالمواقف يللي بتمس قلوبنا،
مهما خبينا إحنا بشر !
بكفيش يكون عندك ثقافه تعليميه، بدك كمان يكون عندك ثقافه إنسانيه،
اللي بيعلمك اياها الدين، اللي بيعلموك اياها اهلك ومجتمعك !
الحب !
قديش هو حلو بالحياة، بس قديش صعب بنفس الوقت !
لإنه لمن بدك تيجي تحب، بدك تحاول كل الوقت إنك تعطي بدون مقابل !
يعني انا شخصيا بعتبر الحب شغله كتير كبيره بالحياة !
انك تحكم على الإنسان؟ مانو موضوع بسيط !
وقبل ما نحكم عالناس لازم نعرف إنه كلنا منملك نفس العينين بس منختلف فالنظره !
عشان هيك حكمك مش ضروري يكون بمحله ويطلع مزبوط !
الكذب ممكن يكون خير لمن بيكون للخير،
وممكن يكون شر لمن بيكون للشر !
حابه اشكر الاداره ع منحون وسام الوفاء إلي،
ما بعرف إذا انا هيك محظوظه لكن الوفاء من الاشياء النادره بالحياة،
وكيف انكو منحتوني هالوسام، بعتبرها خطوه كبيري منكوا،
عنجد ممنونه بس بتمنى إني كون عنجد بعيونكوا هالإنسان الوفي،
وإنه ما ييكون إنعطى هالوسام مجامله.
شكرا من القلب.
السلام ولا بعمرو بيجي عن طريق العنف او رمي القنابل او استعمال الاسلحه !
السلام الحقيقي بيجي عن طريق تنوير الناس وتعليمون كيف يتصرفوا بأسلوب "مقدس" !
إحنا عايشين بمجتمعات ميالين دايما بإنه نصدق الفضيحه !!
إنعدام المحبه بقلوب البشريه، هاي الخطيئه الوحيده اللي مش ممكن تغتفر !
عمر الإنسان بالنسبه لإلي مش الرقم،
العمر هو الصحه، الخبره والنجاح.
بحب اشكر الاداره ع وسام الالفيه الاولى. وان شاء الله بضلني مستمره معكوا فالمنتدى وعلّي من الفيه لألفيه.
كل ما منكبر بالعمر، كل ما منوعى اكتر،
وكل ما منوعى، النضج بوعّينا ع شغلات ونقط معينه بحياتنا اللي لازم ننتبه عليها اكتر !
مش ممكن اقتنع بشي مرحله بالحياة إنو هالإم يللي بتتعب ع ولادا،
وبتربيون وبتعطيون من قلبا مدى حياتا وبتعلمون ع الايمان والمحبه والتسامح،
بإنو يجي ربنا يوم الحساب يسألا "انتي وين كانت ديانتك او شو كانت ديانتك؟" !
تفاجئت بموت الفنان الموسيقار ابو المجد "ملحم بركات" توفى اليوم،
يمكن هالخبر مش هذاك الخبر العظيم، ولكن فنان متل ملحم يُعتبر من عمالقة الفن القديم، إلو تاريخ فني كبير، طبعا هذا بالنسبه إلي،
واكتر شغله كان يتميز فيها ملحم حالة "العظمى" اللي كان عندو ياها، لإنه كان دايما يعتبر حالو "التوب" وإنه ما في حدا بعدو او يغلبو بطريقة الغنا والغناني،
الله يرحمه !
انا إنسانه بستحيش لمن اعتذر للي قبالي،
بالعكس الاعتذار بيعطي قيمه للمعتذر اكتر من للي عم يعتذرلو !
اوقات لمن تحمل لنفسك لقب معين، مش كتير لازم تصدقو، او حتى يمكن مش من المفروض تصدقو،
لإنه بالنهايه بيكون "مجرد" لقب !
إذا منحبش حالنا بِـ قدر معين، مش رح نعرف نحب الناس صح،
ولا رح نعرف كيف نكون هالقد إحنا نفسنا للناس،
لهالسبب ضروري احب حالي بِـ قدر معين لحتى اقدر اكون انا نفسي الحقيقيه !
الغرور عموما كلمه كتير كبيري، وبيكون معناها إنه إنسان معين لا قادر يشوف الناس ولا الناس قادره تشوفوا،
وممكن يكون عند هالإنسان اللي بالنسبه إلي بكونوا فاهمينوا غلط لحتى بينعتوه بالمغرور، بكون عندو كبرياء،
الكبرياء اصبح شي تاني غير الغرور، بس هو مفسر بالغرور، الكبرياء بالنسبه إلي "عزة نفس"،
وإنه بكون عند هالإنسان شهامه،
وإنه بيرتفع عن كل الاشياء اللي مش كتير بتشبهو،
يمكن لهالسبب الناس بيحكوا عن المغرور مغرور ولكن هو اساسا مش مغرور !
ملاحظه صغيري - بحب اهدي هالكلمتين اللي حكيتون للعضو ماجيك ع أمل يقراهون ..
:po3:
إتعود دايما ع إنك تخلي الدمعه إلك والفرحه للناس !
إتعلم كيف تحط الوجع جواتك لحتى تعمل منو حاله معينه اللي تخليك تعيش الحياة بطريقه ايجابيه !
بحياتي بخافش من العمر ولا بخاف من بكرا، لإني إنسانه بآمن بسنة الحياة !
مؤشر سهم الإنسان دايما بيضل يطلع وينزل طول ما قلبه بينبض حياة وطموح،
لإنه كل ما الإنسان عندو طموح وعارف شو بدو ولوين بدو يوصل، بتصور مفش اشي ممكن يوقفه،
ممكن ينزل ويوصل لمرحله بحياته إنه خلص، عمل كتير بحياته،
بس بريقه مستحيل يروح،
البريق يللي هو السمعه المنيحه والبصمه الحلوي يللي دايما بيتركون وراه.
انا إنسانه بشكل عام بيهمني الإنسان مش اكتر،
لا الطوائف بتعنيني ولا الانتماءات الوطنيه ولا غير وطنيه،
بيهمني الإنسان كإنسان،
سواء إن كان مسيحي او درزي او مسلم او من اي ديانه تانيه ..
اليوم الإنسان لازم يشكر حالو بمطرح من المطارح ع النعم اللي بيحطها ربنا بحياتو،
اللي تخليه يقدر يوقف ويقدر يكون جاهز، بوقتها رح تجيه تجربه كتير كبيري !
أيقنت بإنه الإنسان ممكن يرتقي لمن يوصل لمرحله بحياته اللي يكتشف فيها مدى تفاهة الحياه اللي عم بعيشها !
وبالوقت ذاته بقية البشر بكونوا غاطسين بملذات الحياة، يللي ما بحياتون رح يوصلوا لهيك مفهوم.
مجتمعنا العربي لمن يشوفوا إنسان فاشل بتركوه محلو بدل ما يدعموه ليرجع يوقف من جديد !
اما الناجح بحاولوا يعملوا المستحيل ليحاربوه وبدوروا ع سلبياتو دواره ليفشل ويوقع ع الارض !
مجتمع مكيود ههّ.
دايما عُمر ومرحله الشباب قصيره، بس بالنهايه كلنا بدنا نكبر بالعمر،
وهالموضوع مش من المفروض يعمل عُقده للإنسان،
ومع هيك كل إنسان بيحب يضل صغير وما يكبر !
الإيمان اهم شي بالإنسان،
وإذا نفسية الإنسان معندش إيمان فيها، رح يصير بعيد عن الإنسانيه،
وحتى يمكن عن كل شي !
لإنه الإيمان بيقوّي الإنسان بعطيه قوه وبيخلي عندو إنسانيه،
وإذا هالإنسان ما بيخاف الله ولا بيتمسك فالإيمان وكتير اشياء بتتضمن هالموضوع،
سيعتا مستحيل يكون خير لا لنفسه ولا للناس ..
انا من النوع اللي بحبش اساير حدا عشان يحكيلي انتي صبيه منيحه وبتجنني وفش منك،
لمن انا بستحق ينقال عني إنو انا مش منيحه بسمحلون يحكوا ! ولمن بستحق إني أُنْتَقَد، بسمحلون !
لإنه النقد البناء انا شخصيا كتير بستفيد منه،
الحكي اللي بنقال لمجرد إنه "لازم ينقال" بحب اسمعه !
حلنا نتحرر من قيود الفِكر،
ونطلق الصراح لنفسنا وذاتنا،
لإنه هاللحظه هي اللحظه يللي إحنا منحتاجها،
لحتى نقدر نوصل للي بدنا اياه بالحياة ..
http://store6.up-00.com/2017-02/148831265080631.jpg (http://www.up-00.com/)
بكفيش إنك تكون إنسان ذكي بالحياة،
وغالبا ذكائك مربوط بالمبادئ يللي انت بتحددها بحياتك،
وإذا كانت مبادئك بناحه، وعقلك بناحه تاني، سيعتا رح تلاقي حالك واقع بمشاكل بتقدرش تطلع منها !!
بالزبط متل لمن تحب إنسان فقير بس بتختار انك تكفّي طريقك وتتزوج شخص غني،
بهالحاله بتكون خسرت الحب وبنفس الوقت مش عارف تعيش مع الغني !
"لا شرف إلا بعد الموت" متل ما قال "توماس هود" بأبياته الشعريه !
الخطيئه مهما كان كبرها بتنمحى وبتروح مع الموت،
وكلنا للخطيئه لإنه كلنا إنسان !
الاسلوب يللي بدو اياه المجتمع .. اسلوب الخطيئه !
ورغم هيك رح تضل البنت بنظر المجتمع إنها شريفه، لإنها رح تضل تحافظ ع "عذريتها"،
اما غير هيك؟ كله رح يكون مباح !!!
كله رح يكون مباح ورح تمشي مع التيار مثل ما بدو، طالما رح تحافظ ع عذريتها ..
لحد ما تتزوج وتفقدها ..
للاسف هيك مجتمعها بدو !
الزواج عيشه، والحب مزاج،
الزواج تفتح بيت، تخلف ولاد، تشتري غراض وخضره، تروح زيارات ومناسبات ..
الحب حكي حلو، صور حلوي، غناني حلوي، غزل، بوسه، عبطه ..
صعب تلاقي العيشه والمزاج بشخص واحد !
الماسة
03-14-2017, 10:07 AM
اششتقنآلك سسمرةة :62::62:
العيناء الغالي،
تشتقلك السعاده يارب :po3:
الإنتقادات مش دايما بتكون ضدك،
أوقات كتير ممكن تكون لصالحك خصوصا إذا حاولت تفهمون !
مين هالحدا يللي اعطاني هالانتقاد؟
وليش اعطاني هالانتقاد؟
بدك تفصفص انتقاده إلك من كل النواحي،
لتوصل لأجوبه والاهم تكتشف إذا انتقاده إجا لصالحك او ضدك !
زٍهٌرُةُ اٌلِـلِـوِتْسُ
03-16-2017, 03:13 AM
من أكثر المدونآت التي تشد إنتبآهي وتثير على إعجآبي بالدرجة أولى
تجيدين إحآكة الكلمآت لتمثلي حقآ مجريآت الحيآة
فعندمآ أتوه بومآ في معرفة مفآهبم الحيآة يمكن أن تكون هذه المدونة كمرجع لي
سمرة طآلمآ أحببتك من أسلوبك فقط
حفظك الرحمآن عزيزتي. :19:
كنت هنآ اليوم
16/03/2017
حبيبتي زهرة اللوتس،
انا هذا اكتر اشي بتمناه،
وجودي يكون منفع للأعضاء،
شكرا كتير ع وجودك وحبيت اكتر إنك كتبتي التاريخ اللي فوتي فيه ع مدونتي،
هالتفاصيل الصغيري ما بتتصوري قديش بتعنيلي وقديش بالاكتر بتخليني اخد نظره عن الشخص !
ممنونتك :po3:
الموت حق ! وانا بآمن بإنه في حياة بعد الموت !
بتهيألي الكُرِه احيانا مطلوب !
لإنه الإنسان لمن يكرهك بيضل يركض وراك وينبِّش بكل إشي فيك،
ولمن بيلاقيش إشي ممكن يبلش يحبك !
لمن الإنسان ينجح ويوصل لمحل معين بالحياة، إذا مصابوش الغرور بمحل النجاح يللي قدر يوصلو،
معناتو إحتمال يكون في عندو اشي غلط، لإنه بلحظتا مثل كإنو مش عم بعرف قيمة نفسه !
هَمسّ
03-24-2017, 10:17 PM
بهذا التحليل تكوني قد سَهوتي عَن مَبدأ التواضع ،
الغُرور يُصيب مَن يناله النجاح صُدفه _بِـ رأيي _ ،
وَ اما مَن يَجتهد له ، تَجديه متواضع غالباً ..
اعتذر لمقاطعتك ^^
صدفه او مجهود شخصي،
عالجهتين لازم الإنسان يوصل لمرحله اللي يشعر فيها بقيمة نفسه.
واللي بوصل للنجاح صدفه، يمكن كانت فرصه إلو واستحقها، ليش لاء؟
وإذا ركزي بكلماتي رح تفهمي إني عم بحكي عن غرور "مؤقت".
همس يسعد مساكي،
كتير مبسوطه بشوفتك هون،
وبعتبر حالي محظوظه اذا شخص مثلك بدو يفوت كل الوقت ع مدونتي،
لإنك انتي اكتر صبيه مميزه هون "بالنسبه إلي".
بتقدري تقاطعيني وقت ما بدك، مدونتي مرحبه بتعليقاتك وتعليقات الجميع.
مساكي راقي رقي طبعك :po3:
بعرفش مين يللي ثبت المدونه "للمره الثاني"،
بس بحب احكيله شكرا وانا شخصيا كتير بقدّر هالإشي !
:po3:
برفض كلمة "أزعل" !
لإنه الحياة مثل ما فيها ربح، برضو فيها خساره،
والحياة فصول، فيها طلوع وفيها نزول،
ممكن اربح اليوم !! بس ممكن اخسر بكرا ...
مولٱنآ
03-26-2017, 12:03 AM
ممكن اربح اليوم !!
اكبر مربح هوون وجودك بلمنتدى
متل م بحب اراءك وطريقه تفكيرك بحب أقرأ مدونتك وكلماتك
موفقه ومتابعك دايماً
ماجيك، دايما بقدرك وبقدّر كل كلمه بتحكيها بحقي،
قديش المعرفه والتواصل بينا بسيط وخفيف،
بس قديش عضو متلك بعزه وبحترمه،
شكرا لإنك رفعت من معنوياتي بكلمتك هاي بإنه وجودي اكبر مربح،
شو بدي اكتر من هيك؟
غالي :po3:
بتصور اغلب الناس لمن يكذبوا، بكونوا عم بكذبوا الكذب اللي رح اسميه "المبطّن"،
اللي بيخبي اشي وما بدن هالناس اي حدا يعرفوا فيه، او يمكن بكونوا مش عارفين يواجهوا نفسون،
بهالحاله هالنوعيه من الكذب مش لازم نعتبره من هذيك الكذبات الكبيري الفظيعه !
كل إنسان بمرق بحياته ممكن يغلط، ممكن يفكر بالمخدرات ! ممكن يفكر يشرب المشروبات الروحيه ! ممكن يفكر بالخيانه !
كله معرّض ..
بس برضو بيتعلق بالإنسان، حسب كيف بلّش حياته، كيف ولوين إتَّجه ورح يتِّجه ..
الطفل حتى لو كان صغير، الأيام بتخليه يحس بالحقيقه اكتر وبوجودها !
لمن بدك تعرف معدن الإنسان، بتعرفه باللحظات الصعبه والمهمه،
مش باللحظات العاديه او حتى التافهه ! اللي كلنا منعرف كيف نطلع فيها أبطال !
صلاتنا هي لقاء مع ربنا،
رغم اي ظروف صعبه منكون عم بنمر فيها،
إلا إنه بيضل شغله وحده وهي قديش الإنسان بيعرف كيف يكون قريب من ربو،
وقريب من كل هالظروف اللي بتكون حوليه،
لإنه بوقتا رح بيكون عارف قديش يسلم الحقيقه ..
البُعد مش دايما بيقرّب الناس من بعضون بالشوق والحنين،
اوقات كتير ممكن يكون خنجر !
الإنسان لمن ياخذ قرار معين بحياته، وقتها بكون رئيس جمهورية نفسه !
صحيح انا درزيه وما بنتمي للدين الاسلامي بس بعض الآيات القرآنيه بعتبرها خريطة طريق للحياة !
حتى لدرجه ممكن تحسها قديش مختصره ..
وبتهيألي مش صعب عالإنسان المسلم او أي إنسان ثاني بإنه يحفظ أي آيه قرآنيه،
يمكن شوي يستصعب فهمون بس سهل يحفظون عن غيب !
آيات كتير انا شخصيا بعتبرها مبدأ للحياة، ومبدأ لكل إنسان ...
مين مننا نقّى ابوه وإمه؟ مين مننا نقّى وطنه؟ مين نقّى وطنه؟ جرب جيب شخص ويقولك إنه انا نقيت !
مين نقّى شكله؟ مين نقّى امراضه الوراثيه؟ مين نقّى ابوه بأي عمر بدو يموت؟ او إمه بأي عمر بدا تموت؟
محدا نقّى اشي !
إسمنا ما نقيناه .. عيلتنا ما نقيناها !
كل إنسان لمن بيخلق، بتنخلق معه كل هالإشياء من سيعة ما ينولد، وإحنا بصفتنا كبشر لازم نحترم كل الناس ونبعد من إنه نكون اشخاص جارحين بالحياة،
لازم نتقبل كل الناس بمختلف انتمائون الديني، بمختلف اوضاعون، جنسياتون، حالاتون الاجتماعيه،
حتى يللي خلقوا بحالات شاذه، ومانون شرعيين ومانو معترف بوجودن ولا بأي شكل !
لإنه بالنهاي محدا فيون اختار حياته .. البيئه والمجتمع هني اللي بحطوه بكل هذا !
بتهيألي في فرق بين الخطأ والخطيئه،
ممكن الإنسان يخطئ ويصلح غلطو وبقدر يتحمل،
اما الخطيئه؟ ولا يمكن ! لإنها تُعتبر كُفر !
الإنسان اللي بكون مفكر إنه كل الناس بتحبه، اكيد بكون غلطان !
الكلمه بتقتلش،
الكلمه بتعمِّر وبتبني ..
بس ممكن تقتل اصحاب النفوس الضعيفه !
الإنسان يللي بيصليش ممكن يكون معذور !
وقت تكون الحياة هيي اللي بدها هيك، وعفكره مش معناها إنه هالإنسان ما عندو وقت !
بالنهايه الصلاة اشي شخصي بين الإنسان وربو، علاقة هالقد خاصة ومباشرة ..
التواضع اكبر نعمه من عند الله !
إذا اختلفت وجهة النظر، مش معناها إنه يصير في عداوه،
بالنهايه كل إنسان حُر بوجهات نظره،
وهالإشي بفرض إنه يكون في إحترام الآراء !
اوقات لمن تكون عم تتواصل مع الناس او قاعد معون او عم تحكي معون،
بتصير تكتشف نفسك مش بتكتشف الناس !
وحتى بتصير تشوف حالك من خلالون،
بتشوف انت وين بهالحياة،
بتشوف إنسانيتك، ثقافتك، كل إشي !
كل الأشياء اللي إحنا منعملها او اللي إحنا منفكر فيها، حتى لو بتكون قصيري،
بتحس في إلها بداي وإلها نهاي بذات الوقت،
حتى الأشياء اللي بتشبهنا وبتشبه حياتنا بيكون في إلها بداي ونهاي !
إحنا بمجتمعاتنا كل نوعية موضوعاتنا هي البكائيات والحبيب اللي غاب واللي حب يقول إلخ ..
يعني الغزل عموما، مقولة الغزل.
اما مقولة الاشيااء الإنسانيه مالهاش هذيك الاهميه !
يعني ع سبيل المثال لمن ينعمل شي اغنيه عن الأمومه،
بصيروا يحكولك إنها اغنيه موسوميه، يعني بتنعرض بِـ عيد الام وبعدين للكب وع طول بينقلب صفحه عنها !
ليه؟
إحنا مش من المفروض نسأل بعضنا اسئله افتراضيه إذا مالنا مارقين بالفعل، لإنه الاسئله الافتراضيه اللي منمرقش فيها بالفعل، بحسها بتزبطش خصوصا لإنو خيالنا ممكن يكذب علينا !
ومرات من خجلنا منحكيش الحقيقه !
لإنه مرات منلاقي بالحقيقه في مبالغه !
النجاح شغله كتير صعبه ..
لإنه مش كل إنسان قادر يوصل وينجح ..
لهالسبب لازم الإنسان يضل ماشي بإيمان، بمحبة، وبمصالحة مع ذاته،
مش مهم شو رح بيصير او لوين بدو يوصل !
كتير احياناً ممكن نتفاجأ بأشياء إحنا ممكن نعملها ومنكنش متخيلين اصلا انه ممكن نعملها !
وعلى فكره كلياتنا منقدر نعمل شغلات غريبه عننا !
إحنا بس منكون بحاجه للظروف المناسبه لحتى نعمل هاي الأشياء !
جمال الحياة مانو مرتبط بجمال الشخص بالمره،
ياما في بشر حلوين شكلاً بس ما إلون حظ بهالدنيا،
الجمال جمال النفس فقط.
لمن نقرر شو بدنا نكون بالحياة وكيف نتعامل بالحياة، لمن بدنا ناخد اشي مش إلنا او لمن بدنا نتطلع ع اشي مش إلنا، وشو شكل المقابل اللي منكون منفكر فيه لكل اشي منقدمه بحياتنا .. الحكايه هون ممكن تكون "نسبيه" يعني الاشخاص البُسطا هني اكتر تعرض لضغوطات الحياة وبتبقى امتحاناتون بالحياة اصعب بكتير، مع انه هالبُسطا ممكن نشوف فيون صاحب كرامه وصاحب إنسانيات ولكن بمروا بإمتحانات حياة اقسى واصعب بكتير من الاشخاص اللي الظروف بالنسبه إلون متاحه وببقى مهيألون كل اشي ..
غالباً بيكونش عنا أعداء لمن نكون عم نعيش ظروف طبيعيه، بتقدرش تتوقع مين هو عدوك او ليش،
واحياناً بتفكر حالك شايفو وبتعرفه منيح، بس بتتفاجأ إنه عدوك هو اللي ماشي جمبك وماسك ايدك !
بس بتعرقش ليش صار عدوك !
إحنا اليوم بحاجه ولو جزء بسيط مننا اللي يعرف يعيش عشان بقية الناس يتمسكوا فينا ويحبوا الحياة ويعيشوا !
لإنه إذا منفتش حولينا منلاقي إنه في ناس اللي عنجد متمسكين فينا، مش مجرد نخليون يتمسكوا فينا هيك من باب الفراغ !
إحنا مضطرين نعيش او حتى مضطرين نمثّل السعاده لحتى نحسها للسعاده ! ولحتى نحبب بعض الناس بالحياة ..
غير هيك منقدرش نكون وصعب نعيش ..
الإنسان قد ما كان حقير بيقدر يحسّن من مستواه الاجتماعي !
بالحياة دايما في حدا غني وفي حدا فقير،
في حدا وسط وفي حدا فقير،
بقدروش يكونوا متساووين،
هاي طبيعة الحياة وبتساووا بإشي واحد "وقت الموت".
غير هيك بيتساووش !
بعتقد ما في شي بالحياة perfect وناجح ميه بالميه،
لازم الإنسان يضل يشتغل ع حاله حتى لو وصل وحقق نجاحات كتير بحياته وإلا بتتوقف الحياة،
بدو يستمر ..
التجاهل ممكن يكون سلاح وخصوصا وقت تتجاهل ناس غبيه،
لإنه رفقة هالنوع من الناس تضييع وقت،
وإذا شي حدا غبي استفزك بتكون عنجد عم تضيع وقتك !
تقريبا من اكتر الاشياء اللي بتحاسب عليها الإنسان هي قيمة المحبه الموجوده بحياته !
lonely heart
09-14-2017, 10:21 PM
بعتقد ما في شي بالحياة perfect وناجح ميه بالميه،
لازم الإنسان يضل يشتغل ع حاله حتى لو وصل وحقق نجاحات كتير بحياته وإلا بتتوقف الحياة،
بدو يستمر ..
حبيت كلامك هون سمرة
فعلا الانسان لازم يضل دايما بشتغل ع نفسه ويحاول يطور نفسه باستمرار
بحب هيك اشخاص وبحب رفقتهم بحسهم هم الناس يلي ناجحين بحياتهم
مدونتك حلوه كتير وبتعكس كتير من واقعنا
حبيت كلامك هون سمرة
فعلا الانسان لازم يضل دايما بشتغل ع نفسه ويحاول يطور نفسه باستمرار
بحب هيك اشخاص وبحب رفقتهم بحسهم هم الناس يلي ناجحين بحياتهم
مدونتك حلوه كتير وبتعكس كتير من واقعنا
رانيه انبسطت بشوفتك هون،
ما تنسي انك انتي كمان من ضمن هالاشخاص يللي عندون طموح كبير الحياة،
واكيد شخص مثلك ما بستاهل غير كل نجاح.
مدونتي مرحبه فيكي كل الوقت، الله يسعدك عيون :po3:
دايما في عنا معاناه حقيقيه وهي "المبررات"،
خرب شعري، في بكاك وزحمة سير بالشوارع، تناقرت مع جوزي، قطعني الباص ووو ..
كلنا بتصير معنا هاي الاشياء،
كلنا شعرنا بخرب، كلنا منتناقر مع الشريك، كلنا منصادف بكاك بالشوارع، كلنا بقطعنا الباص.
بس اﻹلتزام مالوش ولا أي مبرر !
موضوع "اﻹلتزام" بالنسبه إلي وكإنه مبدأ حياة، وبعتبره شكل من اشكال المحبه.
كل ما الشخص بلتزم معك اكتر، كل ما كان في احترام اكتر، إلك ولنفسو وللعلاقه !
الإنسان ممكن يكون ظالم ومظلوم بنفس الوقت، التنين سوى،
لإنه مفش إنسان معصوم.
الدين "بحد ذاته" مش عائق قدام اي علاقه مختلفة الانتماءات الدينيه بالطرفين،
بس المحيط والتقاليد والاهداف اللي بترافق الديانه هني اللي بجعلوا من هالفكره تنرفض من حيث المبدأ !
الموت هو الحاله الوحيده اللي ما فيه جدال،
وما بكون إلو إلا وجهة نظر وحده،
لإنه الموت هو النهايه المطلقه اللي ما بقدر الإنسان غير إنه يتقبلها،
بس بذات الوقت هو الحقيقه الوحيده اللي ما بيرضى يتقبلها اي إنسان !
الزواج نهاية حتميه لكل بنت بس مش مقتنعه بإنه الزواج غايه بحد ذاتها،
المفروض يكون في شي ثاني اللي يكون سبب وجودنا بهالحياة، ويكون للحياة مبرر،
لإنه إذا منتطلع ع الزواج كخطوه منلاقيه واحد من مظاهر الحب، بس الحب لحالو بيكفيش ليكون مبرر لوجودنا بالحياة ..
لإنه الحب عاطفه والعاطفه ما بعتقد بإنه تقدر تتحمل رغبة الإنسان بالإستمراريه فالحياة.
صعب نتكل كل الوقت ع الحب وع مظاهر الحب، لإنه إن اتكلنا عليه بتخلص قوته ع بكير،
المفروض يكون في شي تاني، هدف معين او إيمان بشي معين،
لإنه القوه اللي بترافق الحب بتدومش،
بس من كتر تأثير هالقوه علينا هو اللي بخلينا نطيل هالحب لأشهر وسنين.
في فرق كبير بين إنك تنغرم بشخص.
وبين انك تنغرم بما وراء هذا الشخص !
البساطه فالحياة وفالمواقف وفالعواطف وتعبيرنا عنون ..
معظمنا عنا عقده فهالموضوع،
ليش ما منحب البساطه؟
ليش ما منجرب نكون بسطا بحياتنا وبمواقفنا وبعواطفنا؟
ليش دايما منخاف من عواطفنا ومنخفيها جواتنا؟
اتعودنا ناخذ بدون ما نعطي، ونجرد الكلمات من معانيها،
ونعطي معاني ثاني لكلمات ثاني مانها موجوده بحياتنا !
ليش كل هالتعقيد؟
الإنسان مره وحده بحياته لمن بيسجّل موقف، ببقى بيسجّل الموقف الصح بالوقت المناسب !
لمن بدي ادور ع شغله معينه بالرجل، بدور ع فكرو،
وع شبعه النفسي وع إحترافه بالحياة،
يللي بكون بكل المطارح وبكل المجتمعات !
بعتقد في فرق بين الأب المثالي وبين الزوج المثالي،
لمن نقول الأب المثالي منقصد فيها التربيه، منقصد الولد والمسؤوليه إلخ ..
اما الزوج المثالي منقصد العلاقه نفسها وكيف بتكون مبنيه بين الطرفين وقديش ممكن تستمر وقديش بكون إلها حظ إنها تكمل هالعلاقه،
لإنه بكون الواحد دماغه اشي والثاني دماغه بكون اشي ثاني،
تركيب راسين ببعضون كل الوقت، مسأله كتير صعبه.
مجتمعنا أساسه الحب، وبكل اشي فيه من نيران وثوره وإندفاع،
الذكر بمجتمعنا بحاول دايما إنه ينتصر بس على مين؟
والانثى بتحاول دايما انها تتمرد بس على مين؟
ثنيناتون بمجتمع واحد بحاولوا إنون يدمروا كل إشي بإسم الحب، بإسم شريعة الغاب،
بس مين المنتصر بالنهاي ؟!
الخسران هو الربحان بهالجوله !
والربحان هو اللي رح يتدمر بالنهاي !!
مين قال إنه الحب بيلتقي مع المنطق ؟!
ومين قال إنه بالحب في منطق وحقيقة اساسا ؟!
القيم اللي بتخلقها مجتمعاتنا مش مقدّسه لهذيك الدرجه !
عموما هيي انخلقت لتحمي الناس من بعضون مش اكتر ..
وهذا يعني إذا صار تناقضات معينه بهالقيم بعنيش إننا صرنا معدومين الشرف !
الاسطوره دايما بترجع تعيش من جديد،
بتكرر مع الإنسان، بنفس الأوضه ويمكن ع التخت نفسه كمان !!
وهذا حال البشر هالايام،
صحيح الابطال دايما بيتغيروا ..
بس الحكايه بتضل نفسها، ابطال حكاية "الخيانه" !
حكاية جوع وظمأ !
مش بالضروره الإبداع ينخلق من الوحده والإنطوائيه، مثل ما إحنا دايما بتهيألنا ..
الوحده أوقات فيها تخلق أشياء بشعه اكثر ما بتخلق أشياء حلوي !
"قد يعشقُ المرء من لا مال في يده ويكره القلب من في كفّه الذهبُ،
ما قيمة الناس إلا في مبادئهم لا المال يبقى ولا الألقاب والرتبُ"
وفعلا الإنسان يللي ما بيحترم موقفه فالمجتمع، واللي الناس كمان بيحترموش مواقفون تجاهو، كلياتون سوى تركيبتون هيك بتكون !
دايما مننسى إنه الطرف الثاني يللي هو "الذكر" إنسان مثلو مثل الأناث،
يعني إنسان إلو مشاعر وبيخاف ..
الصورة النمطية يللي زرعوها فينا من واحنا صغار إنه الذكر هو "سوبر مان او باتمان" بالقوة !!
وحتى هو نفسه كذكر بكون مصدق الاشي !!
وبيضل هالشرح موجود بينه وبين نفسه، وبينه وبين الشريك "الانثى" يللي بتكون عايشه معه.
لحد ما يجي موقف بيوم من الايام وفجأه تطلع كل المشاعر الطبيعية (الخوف) من جوات الذكر مش بس من جوات الانثى ..
بس لإنك ذكر محرّم عليك الخوف !! فا بتصير تتفسّر هالمشاعر "ضعف شخصية وجبن" وينظلم بينما هي مشاعر اقل من طبيعيه !
محدا بيفكر بهاي التفاصيل اللي بتمرق ع السكت بحياتنا ...
مرات الإنسان بشي مرحلة من مراحل حياته بوصل للغرور وبتحوّل لإنسان مغرور لمن يكون عم بعمل اشي مميز او اشياء مميزة،
بس آخرته بتخطى هاي المرحلة وبتخطى الغرور تبعو،
ورح يوصل لمرحلة جديدة وهي مرحلة الواقعية،
وفعلا ببطّل غرور وبتحوّل لإنسان واقعي !
بحس الحياة مبنية ع المصلحة اكثر مهي مبنية ع الوفا ..
الدنيا كلها "حُب"،
رب العالمين لمن خلق الحياة وكل إشي فيها، خلقون بِحُب،
المشكله فينا إحنا كبشر مش فالحب،
إحنا اللي منعرفش نحب بعضنا !
لمن العلاقة تكون مبنية ع الإحتياج أكثر من إنه تكون مبنية ع الحب, يعني طرفين بيحسوا إنون بحاجة لبعض او طرف واحد بحاجة للثاني,
هذا الإحتياج ولا مره بيهين العلاقة او بينقّص من قيمتها,
بس بيخلي هاي العلاقة يكون إلها عُمر محدد, يعني اشبة بعلاقة مؤقتة,
وللأسف فش اشي ممكن يطول من عُمرها إلا الحب.
بكل اشي إحنا منعيشه وبكل ظرف, قد ما كان صعب,
بس ممكن نلاقي فيه جمال ومصدر بسيط "للسعادة",
لازم نتمسك فيه ونعيشه بكل تفاصيله,
لإنه منقدرش نعرف اذا رح يرجع يتكرر بحياتنا او لاء ..
الماسة
07-12-2018, 03:24 PM
بتحكي درر
يسسعدك ربي
بتحكي درر
يسسعدك ربي
ماسة الغالي،
دايما بنبسط بشوفة الطيبين مثلك،
تسلميلي والله يسعدك :po3:
الماسة
07-12-2018, 10:46 PM
يسسسعدلي قلبك الطيب شو مزوقة
لازم نستمتع بحياتنا وبأوقاتنا اللي عم نعيشون قد ما فينا،
مرات أبسط الأحداث اليوميه اللي بتصير معنا، قادرة تعطينا إشي من السعادة،
مع إنه الحياة ممكن تكون صعبة لكتير من الناس لإنها قاسية بس من الصعوبات فينا نشوف الإشي الحلو وإننوّره بقلوبنا وطاقتنا،
مش لازم نخسر طاقتنا الإيجابية،
نعيش سعادة التفاصيل الصغيري،
محدا بيحس بهالإشي إلا يللي بفقد وبخسر هاي التفاصيل وما بيعود يلاقيها ..
كثرة المصاري مش للإنسان، لإنه محدا فينا إلو اشي بهالدنيا !
كل إشي بعمله الإنسان مش لإلو،
لإنه إحنا لمن نعمل إشي، منعمل ومنترك كل اشي ورانا ومنمشي (ع الموت) وسبقونا ناس كثير غيرنا !
لهيك محدا إلو إشي بهالدنيا،
الثراء وكثرة المصاري وغيرون، كلها اشياء مالهاش قيمة ..
خسارة الإنسان لنفسه، هي الأجدر بإنه يخاف عليها ويفكر فيها منيح !
الإنسان الحُر بيلاقي رأيه "بيحرز" بكل الظروف،
حتى لو كان هالرأي غلط او مش بمحله،
بس لمن يكون الإنسان حُر الرأي وبيحكي الصراحه، بيحسبش حسابات.
كلياتنا عم نمرق بفترة اللي فيها عنف وفيها حرب،
انا بشوف دايما إنه الحب والصوفية اللي مبنية ع الحب، والعشق والوله بأقصى درجاته، هو الصداد للعنف دايما، الحب والتعاطي فالحب ..
فالحل الوحيد من وجهة نظري لأي عنف موجود بالحياة هو الحب !!
S T E L L A
04-14-2019, 02:29 AM
اديششش ممششتألكك :(
Powered by vBulletin™ Version 3.8.7 Copyright © 2025 vBulletin Solutions, النسخة الماسية
diamond